સવારે 8થી રાતે 8ની ડ્યૂટી અપાતાં પોલીસ ‘ સરકારી નોકરી’ કરતી હોવાથી ટોળાંશાહીની જાણે ખૂલ્લી છૂટ હોય તેવા દૃશ્યો
અમદાવાદ,
– ગુજરાત રાજ્યમાં કોરોનાના રોગચાળાની સાૈથીવધુ અસર અમદાવાદમાં છે. અમદાવાદમાં 12000 પોલીસ ફોર્સને 24 કલાકમાં 12-12 કલાકની ડ્યૂટી સોંપવામાં આવતાં અંદરખાને કચવાટ પ્રવર્તી રહ્યો છે. તા. 1 એપ્રિલથી શહેર પોલીસમાં સવારે 8થી રાતે 8 સુધી સતત 12 કલાક અને રાતે 8થી સવારે 8 સુધી એમ બે શિફ્ટમાં નોકરી કરાવવામાં આવી રહી છે. આ કારણે ખાસ કરીને કોન્સ્ટેબ્યુલરી સ્ટાફમાં એવી બૂમ ઉઠી છે કે, બન્ને સમય એવો છે કે ઘરે જમવા અને આરામનો પૂરતો સમય મળતો નથી. થાકેલાં-પાકેલાં પોલીસ કર્મચારીઅો હવે સરકારી નોકરી કરવા લાગ્યા હોય તેવી સ્થિતિ દેખાઈ રહી છે. આ કારણે મુખ્ય માર્ગો પર અવરજવર અોછી જોવા મળે છે પણ અંદરના રસ્તાઅો, વિસ્તારોમાં લોકોની ભીડ યથાવત જળવાઈ રહેલી જોવા મળે છે. આ કારણે કોરોનાના રોગચાળા પર કઈ રીતે અંકુશ મેળવાશે તેવો સવાલ ઉભો થઈ રહ્યો છે. જો કે, પોલીસ અધિકારીઅોનું કહેવું છે કે, 12-8-4 કલાકની ત્રણ શિફ્ટના કારણે પોલીસનો મહત્તમ સમય અવરજવર કરવામાં રહે અને આરામનો સમય ન મળે તે સ્વાભાવિક છે. આ કારણે જ બે શિફ્ટ કરવામાં આવી છે. બે શિફ્ટથી પોલીસને 12 કલાક સતત ઘરે રહી આરામ કરવા ઉપરાંત પરિવાર સાથે સમય વિતાવવાનો વખત મળી રહે છે. પણ, હાજરીમાંથી ગુલ્લી મારવા ન મળતાં આ પ્રકારની ફરિયાદો થઈ રહી છે. આપત્તિકાળમાં પોલીસની નોકરીમાં બહાનાબાજી ચલાવી નહીં લેવાય અને લાપરવાહી દર્શાવનાર પોલીસકર્મી સામે ખાતાકીય કાર્યવાહી શરૂ કરાશે.
બીજી તરફ, લોકડાઉનના નિયમનો અમલ નહીં કરનાર સામે કડક પગલાં શરૂ કરાયાં છે. લોકડાઉનના પગલે ઘરમાં જ બેસીને કંટાળેલાં લોકો બહાર નીકળે અથવા તો ધાબા પર ઘર પાસે ટહેલતા હોય ત્યારે પોલીસે ગુના નોંધ્યાં છે. હવે, વોલીબોલ રમતાં યુવકો સામે પણ ગુનો નોંધાયો છે. વસ્ત્રાપુર પોલીસે ચિન્મય ક્રિસ્ટલ સોસાયટીમાં 4 યુવકો સામે સોસાયટીના ગ્રાઉંડમાં વોલીબોલ રમવા બદલ ગુનો નોંધ્યો છે. કાલપુર પોલીસ ડ્રોન કેમેરાની મદદથી ઝકરીયા પોળની સામે મોતી બિલ્ડીંગના ધાબા પર કેટલા શખ્સો ટોળું કરીને બેઠેલાં ત્રણ શખ્સો સામે ગુનો નોંધ્યો છે. માધવપુરા પોલીસે મહેદીકુવા ચાર રસ્તા પાસે શીવશંકર ચવાણા નામની ખુલ્લી દુકાન પાસે ટોળું જોતાં શંકરલાલ માલી અને રાજુભાઈ ઠક્કર વિરૂદ્ધ ગુનો નોંધી કાર્યવાહી કરી છે.
નોકરી બંધ થતાં માસ્ક વેચતા યુવક પર હુમલો
ગુલબાઈ ટેકરા પાસે રહેતા શંકરભાઈ સોલંકી પોતાની ખાનગી નોકરી અત્યારે બંધ હોવાથી માસ્ક વેચી રોજીરોટી રળવા નીકળ્યા હતા. બપોર વાસણા ચામુંડાનગર પાસે માસ્ક વેચતા શંકરભાઈને રાજુ ઉર્ફે બીલ્લા નામના શખ્સે અહીં કેમ આવ્યો છે તેમ કહી લોખંડના સળિયાથી હુમલો કર્યો હતો. શંકરભાઈને ઈજા થતા 108માં હોસ્પિટલ ખસેડી વાસણા પોલીસે ગુનો નોંધી કાર્યવાહી હાથ ધરી છે.
લોકડાઉનમાં ઉપયોગ માટે રાખેલા 40,000ની ચોરી
નિર્ણયનગરના નંદન આવાસ યોજનામાં એક પરિવારે રોગચાળા વખતે કામ લાગે તે માટે રાખેલા 40000 રૂપિયા ચોરાયાં છે. હંસાબેને ઘરની તિજોરીના લોકરમાં રોકડા રૂપિયા મુકી ચાવી પર્સમાં રાખી હતી. રાતે પુત્રી પાણી પીવા ઉઠી ત્યારે અજાણ્યા શખ્સને બાલ્કનીમાંથી ભાગતાં જોતાં બૂમો પાડી હતી. બાદમાં તપાસ કરતા રોકડ ચોરી થઈ હતી. વાડજ પોલીસે તપાસ શરૂ કરી છે.
અકસ્માતમાં સિવિલ કર્મી સહિત બે મહિલાને ઈજા
મંગળવારે સિવીલમાં નોકરી પૂર્ણ કરીને ઘરે જતાં સરોજબહેન ગુપ્તા નામના મહિલા કર્મચારીને યુએન મહેતા હોસ્પિટલના ગેટ પાસે પાછળથી આવેલા એક્ટિવાએ મારી હતી. સરોજબેને ટ્રાફિક પોલીસ સ્ટેશનમાં ફરિયાદ નોંધાવી છે. જ્યારે ગુરૂવારે કારે એક્ટિવા પર જતાં મહિલાને શાહીબાગના એનેક્સી કટ પાસે ટક્કર મારી હતી દેવિકાબહેન પટેલ નામના મહિલાની ફરિયાદ નોંધી પોલીસે તપાસ હાથ ધરી છે.
નીચે આપેલી લીંક પર ક્લિક કરીને જોડાઓ દિવ્ય સરદાર સમાચાર સાથે. તમે અમને ફેસબુક, ટ્વીટર અને યુ ટ્યુબ પર પણ લાઇક અને ફોલો કરી શકો છો. Click For Gujarat Samachar in Hindi, India Hindi News
