Ahmedabad News : ગુજરાતના અમદાવાદમાં આગામી 25 માર્ચથી 18 મે, 2025 દરમિયાન IPL 2025ની કેટલીક મેચ રમાવાની છે, ત્યારે શહેરમાં ટ્રાફિકની સમસ્યા ન સર્જાય તે માટે શહેર ટ્રાફિક પોલીસ દ્વારા જાહેરનામું બહાર પાડ્યું છે. જેમાં કેટલાક રૂટ પર તમામ પ્રકારના વાહનોની અવર-જવર માટે પ્રતિબંધિત-ડાયવર્ઝન અને વૈકલ્પિક માર્ગને લઈને જાણકારી આપવામાં આવી છે. જ્યારે શહેરમાં IPLની મેચને લઈને મેટ્રો ટ્રેનના સમયમાં ફેરફાર કરવામાં આવ્યો છે. આ સાથે મેચ નીહાળ્યા બાદ ક્રિકેટ રસિકોને રાત્રે ઘરે પરત ફરવા માટે ખાસ પેપર ટિકિટ અપાશે.
IPL 2025ની મેચને લઈને મેટ્રો ટ્રેનના સમયમાં ફેરફાર
અમદાવાદમાં IPL 2025ની કેટલીક મેચ ડે-નાઈટ રમાવાની છે, ત્યારે ગુજરાત મેટ્રો રેલ કોર્પોરેશન (GMRC)એ શહેરમાં મેટ્રો ટ્રેનના સમયમાં ફેરફાર કર્યો છે. જેમાં IPL મેચ દરમિયાન સવારના 6:20 વાગ્યાથી મધ્યરાત્રિના 12:30 વાગ્યા સુધી મેટ્રો ટ્રેનનો સમય લંબાવવાનો GMRCએ નિર્ણય કર્યો છે.
મધ્યરાત્રિના 12:30 વાગ્યા સુધી મેટ્રો ટ્રેન દોડશે
અમદાવાદમાં હાલ સવારના 6:20 વાગ્યાથી રાત્રિના 10:00 વાગ્યા દરમિયાન મેટ્રો ટ્રેનની સેવા કાર્યરત છે. જ્યારે હવે શહેરમાં IPL રમાવાની છે, ત્યારે મધ્યરાત્રિના 12:30 વાગ્યા સુધી મુસાફરો મોટેરા સ્ટેડિયમ અને સાબરમતી મેટ્રો સ્ટેશન પરથી મેટ્રોમાં APMC અને થલતેજ ગામથી વસ્ત્રાલ ગામ મેટ્રો સ્ટેશન સુધી જઈ શકશે. આ સાથે GMRCએ સ્પેશિયલ પેપર ટિકિટની સુવિધા બહાર પાડવામાં આવી છે.
આ પણ વાંચો: દુષ્કર્મના આરોપી ભાજપના ફરાર MLA ગજેન્દ્રને બચાવવા પોલીસે મહિલાને જ આરોપી બનાવી
સ્પેશિયલ પેપર ટિકિટનું ભાડું પ્રતિ વ્યક્તિ દીઠ 50 રૂપિયા રહેશે. જેમાં જણાવેલા સમય મુજબ મુસાફરો નિશ્ચિત મેટ્રો સ્ટેશનથી બંને કોરિડોરના મેટ્રો સ્ટેશન સુધી જઈ શકશે. રાત્રિના 10:00 વાગ્યા સુધીમાં રાબેતા મુજબનું ભાડું લેવામાં આવશે, જ્યારે રાત્રિના 10:00 વાગ્યા બાદ સાબરમતી અને મોટેરા સ્ટેડિયમ મેટ્રો સ્ટેશનમાં પ્રવેશ કરવા માટે માત્ર સ્પેશિયલ પેપર ટિકિટ માન્ય રહેશે.
સ્પેશિયલ પેપર ટિકિટ અગાઉથી ખરીદી શકાશે
IPL મેચ દરમિયાન સ્પેશિયલ પેપર ટિકિટ લેવા માટે મેચના દિવસે લાઈનમાં ઊભુ રહેવું ન પડે એટલાં માટે સાબરમતી, મોટેરા, રાણીપ, એપેરલ પાર્ક, કાલુપુર, નિરાંત ક્રોસ રોડ, ઓલ્ડ હાઈકોર્ટ, વાડજ, જીવરાજ, થલતેજ મેટ્રો સ્ટેશન પરથી સ્પેશિયલ પેપર ટિકિટ અગાઉથી ખરીદી શકાશે. જેમાં મેચ દરમિયાન દર 8 મિનિટે મેટ્રો ટ્રેનની સેવા મળશે. જ્યારે રાત્રિના 10 વાગ્યા પછી મોટેરા અને સાબરતી મેટ્રો સ્ટેશનથી દર 6 મિનિટે મેટ્રો ટ્રેનની સુવિધા મળશે. જેમાં છેલ્લી ટ્રેન 12:30 વાગ્યે ઉપડશે.
વાહનોની અવર-જવર માટે પ્રતિબંધ અને વૈકલ્પિક રૂટ
અમદાવાદ શહેરના જનપથ ટીથી મોટેરા સ્ટેડિયમ મુખ્યમ ગેટ થઈ કૃપા રેસીડેન્સી ટી થઈ મોટેરા ગામ ટીમ સુધીનો જતો-આવતો માર્ગ વાહનોની અવર-જવર માટે પ્રતિબંધિત રહેશે. જ્યારે તપોવન સર્કલથી ONGC ચાર રસ્તાથી વિસત ટીથી જનપથ ટી થઈને પાવર હાઉસ ચાર રસ્તા થઈ પ્રબોધરાવળ સર્કલ સુધીના જતા-આવતા માર્ગ પરથી અવર-જવર કરી શકાશે. તેજમ કૃપા રેસીડેન્સી ટી થઈ શરણ સ્ટેટ્સ ચાર રસ્તા થઈ ભાટ કોટેશ્વર રોડ થઈને એપોલો સર્કલ તરફ અવર-જવર કરી શકાશે.
આ પણ વાંચો: અમદાવાદમાં બે અરાજક તત્ત્વોએ પેટ્રોલ પંપ પર યુવકને ઢોર માર માર્યો, પોલીસે ભણાવ્યો પાઠ
આ મેચ અમદાવાદમાં રમાશે
– 25 માર્ચ, 2025ના રોજ ગુજરાત ટાઈટન્સ વિ. પંજાબ કિંગ્સ
– 29 માર્ચ, 2025ના રોજ ગુજરાત ટાઈટન્સ વિ. મુંબઈ ઈન્ડિયન્સ
– 09 એપ્રિલ, 2025ના રોજ ગુજરાત ટાઈટન્સ વિ. રાજસ્થાન રોયલ
– 19 એપ્રિલ, 2025ના રોજ ગુજરાત ટાઈટન્સ વિ. દિલ્હી કેપિટલ્સ
– 2 મે, 2025ના રોજ ગુજરાત ટાઈટન્સ વિ. સનરાઈઝર્સ હૈદરાબાદ
– 14 મે, 2025ના રોજ ગુજરાત ટાઈટન્સ વિ. લખનઉ સુપર જાયન્ટ્સ
– 18 મે, 2025ના રોજ ગુજરાત ટાઈટન્સ વિ. ચેન્નઈ સુપર કિંગ્સ
