આણંદ જિલ્લામાં માતા અને બાળ મૃત્યુદર ઘટાડવાના ઉદ્દેશ્ય સાથે જિલ્લા કલેક્ટર પ્રવીણ ચૌધરીની અધ્યક્ષતામાં એક મહત્વપૂર્ણ સમીક્ષા બેઠક યોજવામાં આવી હતી. બેઠકમાં જિલ્લા વિકાસ અધિકારી દેવાહુતી સહિત આરોગ્ય વિભાગના ઉચ્ચ અધિકારીઓએ હાજરી આપી હતી.
.
કલેક્ટર ચૌધરીએ સ્પષ્ટ નિર્દેશ આપ્યા કે, એકપણ સગર્ભા માતા કે બાળકનું મૃત્યુ ન થાય તે માટે તમામ શક્ય પ્રયાસો કરવામાં આવે. જિલ્લાના તમામ સામૂહિક આરોગ્ય કેન્દ્ર, પ્રાથમિક આરોગ્ય કેન્દ્ર, જિલ્લા હોસ્પિટલ અને શહેરી આરોગ્ય કેન્દ્રોમાં માતા-બાળ આરોગ્ય સેવાઓને વધુ મજબૂત બનાવવા પર ભાર મૂકવામાં આવ્યો હતો.
મુખ્ય જિલ્લા આરોગ્ય અધિકારી ડૉ. પિયુષ પટેલે માતા મૃત્યુદર ઘટાડવા માટેની વ્યૂહરચના રજૂ કરી, જેમાં સગર્ભાવસ્થાની વહેલી નોંધણી, નિયમિત તપાસ, પોષણયુક્ત આહાર, સમયસર રસીકરણ, આવશ્યક પૂરક તત્વોનું સેવન અને સંસ્થાકીય પ્રસૂતિ પર વિશેષ ધ્યાન આપવાનું સૂચન કર્યું. સગર્ભાવસ્થાથી લઈને પ્રસૂતિ પછીના ૪૨ દિવસ સુધીની સંપૂર્ણ દેખરેખની આવશ્યકતા પર ભાર મૂકવામાં આવ્યો હતો.
બેઠકમાં અધિક જિલ્લા આરોગ્ય અધિકારી ડૉ. પૂર્વી નાયક, વિવિધ તાલુકાના આરોગ્ય અધિકારીઓ, સ્ત્રીરોગ નિષ્ણાતો, કરમસદ મેડિકલ કોલેજના વિભાગાધ્યક્ષો, આશા કાર્યકર્તાઓ અને સંબંધિત લાભાર્થીઓના પરિવારજનોની ઉપસ્થિતિ નોંધપાત્ર રહી. આ બેઠક દ્વારા માતા-બાળ આરોગ્ય સેવાઓમાં ગુણાત્મક સુધારો લાવવાનો મહત્વપૂર્ણ પ્રયાસ કરવામાં આવ્યો હતો.
