અમદાવાદ સાઇબર ક્રાઇમ પોલીસ મથક ખાતે ચાલુ મહિનામાં એક 73 વર્ષીય મહિલાએ ભારતીય ન્યાય સહીતાની કલમ 61, 204, 316(2), 318 (2) અને IT એક્ટની કલમ 66D મુજબ ફરિયાદ નોંધાવી હતી. ફરિયાદી મહિલા બોડકદેવની રહેવાસી છે. તેના પતિનું અવસાન થઈ ચૂક્યું છે અને તેના પુત્ર
.
વિજય ખન્ના મહિલાને જણાવે છે કે તેના નામે મુંબઈની કેનેરા બેન્કમાં એક ખાતું ખુલ્યું છે જેમાં 02 કરોડ રૂપિયાનું ટ્રાન્ઝેક્શન થયું છે. જેથી મહિલા સામે મની લોન્ડ્રીંગનો ગુનો નોંધાશે અને મહિલાની ધરપકડ કરવી પડશે. વિજય ખન્નાએ મહિલાની વાતચીત આકાશ સાથે કરાવી હતી. જેણે પોતાની ઓળખ CBI અધિકારી તરીકે આપી હતી. આરોપીઓએ મહિલાને ડરાવી હતી કે આ કેસમાં તેને 05 વર્ષની જેલની સજા થઈ શકે છે. જોકે મહિલા વૃદ્ધ હોવાથી અને તેની સાથે કોઈ સગા નહીં રહેતા હોવાથી જો મહિલા સુપ્રીમ કોર્ટમાં અરજી કરે તો તેની ધરપકડ કરાશે નહીં. ત્યારબાદ આરોપીઓએ મહિલાને સુપ્રીમ કોર્ટના ચીફ જસ્ટિસ ડી.વાય.ચંદ્રચૂડ સાથે વાત કરો તેમ કહેતા સ્ક્રીન ઉપર સુપ્રીમ કોર્ટના ચીફ જસ્ટિસ ડી.વાય.ચંદ્રચૂડનો ફોટો આવ્યો હતો. તેઓ કોર્ટ રૂમમાંથી વાત કરી રહ્યા હોય તેવું મહિલાને લાગ્યું હતું.
આ નકલી સુપ્રીમ કોર્ટના ચીફ જસ્ટીસે નકલી IPS અને નકલી CBI અધિકારીને ખખડાવતા કહ્યું હતું કે તમે શા માટે આ મહિલાની મદદ કરો છો. તેને 10 લાખ રૂપિયાના જામીન લેવા પડશે નહીંતર તેને 05 વર્ષની જેલની સજા થશે. આરોપીઓએ મહિલાની વોટસએપ ઉપર અરજી મંગાવી હતી. તેમજ તેને હાઉસ અરેસ્ટ કરાઈ છે તેમ જણાવ્યું હતું. ત્યારબાદ સુપ્રીમ કોર્ટના એક સિક્કા વાળો ડિજિટલ કાગળ પણ આરોપીઓ તરફથી મહિલાને મોકલવામાં આવ્યો હતો. ત્યારબાદ આરોપીઓએ મહિલાના બેન્ક એકાઉન્ટની વિગતો મેળવી હતી. મહિલાના ખાતામાં પડેલી રકમો વેરિફિકેશન માટે મોકલવાનું જણાવી તે 48 કલાકમાં રિફંડ મળશે તેમ પણ મહિલાને જણાવ્યું હતું.
આરોપીઓએ મહિલાને વીડિયો કોલ ચાલુ રખાવીને મહિલાના સ્ટેટ બેન્ક ઓફ ઇન્ડિયા અને યુનિયન બેન્કમાં ખાતા હતા ત્યાં મોકલીને RTGS મારફતે બંધન અને યસ જેવી પ્રાઇવેટ બેંકમાં ટ્રાન્સફર કરાવ્યા હતા. મહિલાએ કુલ 1.26 કરોડ આરોપીઓના ખાતામાં ટ્રાન્સફર કર્યા હતા. આ માટે તેને પોતાની ફિક્સ ડિપોઝિટ પણ તોડી હતી. મહિલાને 10 ઓક્ટોબરના રોજ આ નકલી અધિકારીઓએ ડિજિટલ અરેસ્ટમાંથી છોડી હતી. મહિલાને જ્યારે તેની મિત્ર મળી ત્યારે તેને સઘળી હકીકત જણાવતા મહિલાની મિત્રએ જણાવ્યું હતું કે તે સાયબર ક્રાઇમનો ભોગ બની છે. આથી મહિલાએ સાઇબર ક્રાઇમ હેલ્પલાઇન 1930 ઉપર ફોન કર્યો હતો અને બાદમાં ફરિયાદ નોંધાવી હતી.
મહિલાએ જે પ્રાઇવેટ બેંક ખાતાઓમાં RTGS મારફતે પૈસા ટ્રાન્સફર કર્યા હતા. તે ખાતાઓમાંથી પૈસા ઉપાડતા પોલીસે તપાસ કરીને ચાર આરોપીઓની ધરપકડ કરી હતી. જેમાં પહેલો આરોપી મોહમ્મદ હુસૈન જાવેદ અલી છે જે અમદાવાદના ફતેવાડીનો રહેવાસી છે. બીજો આરોપી તરુણસિંહ વાઘેલા છે જે સાબરમતીનો રહેવાસી છે. ત્રીજો આરોપી શુભમ ઠાકર છે જે નવરંગપુરાનો રહેવાસી છે. જ્યારે ચોથો આરોપી બ્રિજેશ પારેખ છે જે રાણીપનો રહેવાસી છે. આ તમામની સરેરાશ ઉંમર આશરે 30 વર્ષ કરતાં નાની છે. આરોપીઓએ આ પ્રાઇવેટ બેંકના ખાતાઓમાંથી કેટલાક રૂપિયા બીજી પ્રાઇવેટ બેંકમાં ટ્રાન્સફર કર્યા હતા.
મહિલાને જે વોટસએપ નંબર ઉપરથી ફોન આવ્યો હતો તેનું IP એડ્રેસ કંબોડિયાનું હતું. જ્યારે પકડાયેલા આરોપીઓના મોબાઇલમાંથી આ ગુના સંબંધિત વોટસએપ ચેટ મળી આવેલ છે. આ ગુના સંબંધિત આરોપીઓના રિમાન્ડ પૂર્ણ થતા એક આરોપી બ્રિજેશ પારેખે મેટ્રો કોર્ટમાં જામીન અરજી દાખલ કરી હતી. જેમાં તેના એડવોકેટ યશવર્ધન.કે.કોષ્ટીએ કોર્ટમાં દલીલો કરી હતી કે આરોપી નિર્દોષ છે અને તેને ખોટી રીતે આ કેસમાં સંડોવી દેવામાં આવેલ છે. આ કેસમાં વધુમાં વધુ 05 વર્ષની સજા થઈ શકે છે. આરોપી તપાસમાં સહકાર આપશે. આરોપીનો ગુન્હામાં રોલ નથી અને ભાગી જાય તેમાં નથી. જામીન માટે તે કોર્ટની તમામ શરતો માનશે. જોકે સરકારી વકીલે દલીલ કરી હતી કે આરોપી સામે પ્રથમદર્શીય ગુનો છે. આરોપી સામે તપાસ ચાલુ છે અને આરોપીને જામીન અપાય તો પુરાવા સાથે ચેડા થવાની શક્યતા છે. કોર્ટે બંને પક્ષોની દલીલો સાંભળીને આરોપીના જામીન નકારી નાખ્યા હતા.