હિંમતનગર શહેરના પોલોગ્રાઉન્ડ વિસ્તારમાં આવેલી શિવમ સોસાયટીમાં એક ગંભીર ઘટના સામે આવી છે. બપોરના સમયે એક વ્યક્તિ ઘરમાંથી ચોરી કરીને ભાગવાનો પ્રયાસ કરી રહ્યો હતો. સ્થાનિક રહેવાસીઓએ તેને પકડી લીધો હતો.
.
સોસાયટીના રહેવાસીઓએ 52 વર્ષીય આધેડને 4/296 નંબરના વીજ થાંભલા સાથે દોરડા વડે બાંધી દીધો હતો. ત્યાર બાદ લોકોએ એકજૂથ થઇ પ્લાસ્ટિકની પાઇપો વડે તેને મેથીપાક ચખાડ્યો હતો. આ સમગ્ર ઘટનાનો વીડિયો કોઈએ રેકોર્ડ કર્યો હતો. હવે આ વીડિયો સોશિયલ મીડિયા પર વાઇરલ થઈ રહ્યો છે.
મળતી માહિતી મુજબ, હાલ આ મામલે હિંમતનગર બી ડિવિઝન પોલીસ સ્ટેશનમાં બે ફરિયાદ નોંધાઇ છે. જેમાં એક ચોરીની કોશિશ કરતા ચોર સામે અને બીજી ચોરીની કોશિશ કરનારને ત્રણ સહિત ટોળાએ બાંધી માર માર્યા અંગેનો ગુનો દાખલ થયો છે.
સાબરકાંઠા જિલ્લાના હિંમતનગરમાં બનેલી આ ઘટના કાયદો હાથમાં લેવાનું ઉદાહરણ છે. આવી પરિસ્થિતિમાં નાગરિકોએ પોલીસને તાત્કાલિક જાણ કરવી જોઈએ. કાયદાકીય પ્રક્રિયા અનુસાર યોગ્ય કાર્યવાહી થવી જોઈએ. કોઈપણ વ્યક્તિએ કાયદો પોતાના હાથમાં લેવો જોઈએ નહીં.
