ભાવનગર લોકલ ક્રાઈમ બ્રાન્ચ (LCB)ની ટીમે વલભીપુર પંથકમાં પેટ્રોલિંગ દરમિયાન મળેલી ચોક્કસ માહિતી આધારે ચોગઠ રોડ પરથી ઇંગ્લિશ દારૂ બિયર ભરેલું ટેન્કર ટ્રક સાથે રાજસ્થાનના મારવાડી યુવાનની ધરપકડ કરી છે અને આ અંગે ઉમરાળા પોલીસ સ્ટેશનમાં ફરિયાદ દાખલ કરી છે.
.
સમગ્ર બનાવ અંગે જાણવા મળતી વિગતો અનુસાર ગતરોજ એલસીબીની ટીમ વલભીપુર પંથકમાં પેટ્રોલિંગમાં હતી. એ દરમિયાન ચોક્કસ માહિતી મળી હતી કે હરિયાણા તરફથી એક ટેન્કર ટ્રકમાં ઇંગ્લિશ દારૂ બિયરનો જથ્થો ભરી રંઘોળા તરફ આ ટેન્કર ટ્રક જવાનું છે, જે માહિતી આધારે એલસીબીના જવાનો ચોગઠ રોડપર વોચમાં હોય એ દરમિયાન બાતમીવાળું ટેન્કર ટ્રક નં HR-65-A-0497 આવતા તેને અટકાવી ટેન્કર ચાલકને બહાર બોલાવી નામ સરનામું પૂછવા સાથે ટેન્કરની તલાસી હાથ ધરી હતી.
LCBએ અટક કરાયેલા શખસ પોતાનું નામ કરનારામ જયરૂપરામ કાલર ઉ.વ.22 રહે.ગાંધકવકલા ગામ તા.ગુડમાલાની જી. બાડમેર રાજસ્થાનવાળો હોવાનું જણાવ્યું હતું તથા ટેન્કરમાંથી વિના પાસ-પરમીટે ઇંગ્લિશ દારૂની 570 બોક્સ બોટલ નંગ 15126 તથા બિયરની 84 બોક્સ પિન નંગ 2016 મળી આવતા આ અંગે ચાલકની પૂછપરછ કરતા તેણે જણાવ્યું હતું કે, હરિયાણા રાજ્યના કુરુક્ષેત્ર જિલ્લાના બાબેર ગામના રાજેશ આસુરામ રાણા તથા હનુમાનગઢ રાજસ્થાનના રાજુ જાટ નામના શખસોએ આ દારૂનો જથ્થો હરિયાણાથી લોડ કરી આપ્યો હતો અને ઉમરાળા તાલુકાના રંઘોળા ગામના બૂટલેગરને આ દારૂ બિયરની ડિલેવરી આપવાની હોવાનું જણાવ્યું હતું,
રંઘોળા ગામે પહોંચ્યા બાદ મોબાઈલ મારફતે સંપર્ક કરનાર વ્યક્તિને આ દારૂ બિયરનો જથ્થો પહોંચાડવાનો હોવાનું જણાવ્યું હતું. આથી એલસીબીએ દારૂ બિયર તથા ટેન્કર ટ્રક મળી કુલ રૂપિયા 53,18,240નો મુદ્દામાલ કબ્જે કરી ઝડપાયેલ મારવાડી શખસ તથા દારૂ બિયર અને ટેન્કર ટ્રક ઉમરાળા પોલીસને હવાલે કરી દારૂની ખેપ લઈને આવી રહેલ કરનારામ તથા દારૂ મોકલનાર રાજેશ અને રાજુ સહિત રંઘોળાના અજાણ્યા બૂટલેગર વિરુદ્ધ ઉમરાળા પોલીસ સ્ટેશનમાં ફરિયાદ નોંધાવી વધુ તપાસ હાથ ધરી છે.
