બોટાદમાં ટ્રાફિક જાગૃતિ અભિયાન અંતર્ગત નવતર પહેલ કરવામાં આવી છે. જિલ્લા પોલીસ અધિક્ષક કિશોર બળોલીયાના માર્ગદર્શન હેઠળ, ડીજીપી-આઈજીપી કોન્ફરન્સ-2024ની સૂચના મુજબ આ કાર્યક્રમનું આયોજન કરવામાં આવ્યું.
.
જ્યોતિગ્રામ સર્કલ ખાતે સિટી ટ્રાફિક શાખાના પીએસઆઈ બી.વી.ચૌધરી અને તેમની ટીમે એસ.જે.દાણી શાળાના એસ.પી.સી.ના વિદ્યાર્થીઓ સાથે મળીને આ અભિયાન હાથ ધર્યું. આ અભિયાનનો મુખ્ય હેતુ માર્ગ અકસ્માતો ઘટાડવાનો અને લોકોમાં ટ્રાફિક નિયમો પ્રત્યે જાગૃતિ લાવવાનો છે.
કાર્યક્રમ દરમિયાન વિદ્યાર્થીઓએ ટ્રાફિક નિયમોનું પાલન કરતા વાહનચાલકોને પ્રોત્સાહિત કરવા તેમના વાહનો પર સરાહનીય સ્ટીકર્સ લગાવ્યા. જ્યારે નિયમોનું પાલન ન કરતા વાહનચાલકોને જાગૃત કરવા માટે વિશેષ સ્ટીકર્સ અને પત્રિકાઓનું વિતરણ કરવામાં આવ્યું.
વિદ્યાર્થીઓએ વાહનચાલકોને ટ્રાફિક નિયમોનું પાલન ન કરવાથી થતા ગંભીર પરિણામો વિશે માહિતી આપી અને નિયમોનું પાલન કરવાથી થતા ફાયદા સમજાવ્યા. આ પહેલથી માત્ર લોકોમાં જાગૃતિ જ નહીં, પરંતુ વિદ્યાર્થીઓમાં પણ ટ્રાફિક નિયમો પ્રત્યે સમજ વધી છે.
