ગીર સોમનાથ જિલ્લાના ઉના શહેરમાં પોલીસે મોટી સફળતા મેળવી છે. ગીર સોમનાથ SOG દ્વારા ઉના શહેરમાંથી 1.25 લાખની કિંમતના એમ્ફેટામાઇન-મેથાએમ્ફેટામાઇન ડ્રગ્સના 12.50 ગ્રામ જથ્થા સાથે બે આરોપીની ધરપકડ કરવામાં આવી છે.
.
SOG ટીમને મળેલી બાતમીના આધારે ઉનાના ઉપલા રહીમનગરના રહેવાસી સોહિલશા ભીખુશા જલાલી અને સાહિલ ઉર્ફે સોહિલ હારુન વલીયાણીને ગીર ગઢડા રોડ પરના બ્રિજ નીચેથી ઝડપી પાડ્યા હતા. તપાસ દરમિયાન આરોપીઓ પાસેથી શર્ટ અને જેકેટના ખિસ્સામાંથી સફેદ પાવડર મળી આવ્યો હતો.
પૂછપરછમાં ખુલાસો થયો કે, આ ડ્રગ્સનો જથ્થો મુંબઈના વરસોવા વિસ્તારમાં રહેતા આરોપી સાહિલના મામા ઇમરાન સતાર જરીવાલા પાસેથી મેળવવામાં આવ્યો હતો. FSL તપાસમાં આ સફેદ પાવડર એમ્ફેટામાઇન-મેથાએમ્ફેટામાઇન ડ્રગ્સ હોવાનું સામે આવ્યું છે.
પોલીસે બંને આરોપી પાસેથી ડ્રગ્સ અને મોબાઈલ ફોન મળી કુલ રૂ. 1.29 લાખનો મુદ્દામાલ જપ્ત કર્યો છે. ઝડપાયેલા બંને આરોપીઓ અને મુંબઈના શખ્સ સામે NDPS એક્ટની કલમ 8(C), 22(B) અને 29 હેઠળ ગુનો નોંધી આગળની તપાસ હાથ ધરવામાં આવી છે. પોલીસની તપાસ હવે મુંબઈ સુધી વિસ્તરી છે.
