વડોદરા, તા.21 ભાજપના પૂર્વ કોર્પોરેટરના પુત્ર તપન પરમારની સયાજી હોસ્પિટલમાં જાહેરમાં કરપીણ હત્યાના બનાવ બાદ ઝડપાયેલા બાબર પઠાણને સાથે રાખી આજે સવારે સયાજી હોસ્પિટલમાં રિકન્સ્ટ્રક્શન કરવામાં આવ્યું ત્યારે મોટી સંખ્યામાં લોકો ઉમટી પડયા હતાં. પોલીસને આજે હત્યામાં વપરાયેલું ચપ્પુ પણ મળ્યું હતું.
ઉલ્લેખનીય છે કે સયાજી હોસ્પિટલની કેન્ટિન પાસે તપન પરમાર સાથે વાત કરતી વખતે બાબર પઠાણે ખિસ્સામાંથી કાઢેલું ધારદાર ચપ્પુ તપનના પેટમાં હુલાવી દેતાં તેનું સ્થળ પર જ મોત નિપજ્યું હતું. હત્યા બાદ ત્યાંથી ફરાર થઇ ગયેલા બાબર પઠાણ સહિત કુલ ૧૦ આરોપીઓ સામે રાવપુરા પોલીસ સ્ટેશનમાં ગુનો નોંધી પોલીસે બાદમાં બાબર પઠાણ સહિત કુલ ૯ આરોપીઓની ધરપકડ કરીને રિમાન્ડ પર લેવામાં આવ્યા છે.
