પેટ્રોલ કરતા ઇ-વ્હિકલનો ખર્ચ 80 ટકા ઓછો છતાં ઇ-વ્હિકલના વેચાણમાં વધારો થતો નથી
Updated: Jul 4th, 2024
વડોદરા : પેટ્રોલ અને ડિઝલના ભાવ ભડકે બળી રહ્યા છે તેની સામે ઇલેક્ટ્રિક વ્હિકલ મફતના ભાવે એટલે કે ખૂબ સસ્તું પડી રહ્યું છે તેમ છતાં હજુ પણ વાહન ખરીદીમાં લોકોની પ્રથમ પસંદગી પેટ્રોલના વાહનો જ છે. બીજા નંબર ઉપર ડિઝલના વાહનો આવે છે, જ્યારે ત્રીજા અને ચોથા નંબર ઉપર ઇલેક્ટ્રિક અને સીએનજી વાહનો છે.
વડોદરામાં આ વર્ષે જાન્યુઆરીથી જુન-૨૦૨૪ સુધી છ મહિનામાં કુલ ૫૬,૨૪૧ વાહનોનું વેચાણ થયું છે, જેમાં ૬૯ ટકા પેટ્રોલના વાહનો છે અને ૧૦.૧૨ ટકા ડિઝલના, જ્યારે ઇલેક્ટ્રિક ૬ ટકા અને ૪.૯૦ ટકા સીએનજી વાહનો છે. બાકીના ૧૦ ટકા અન્ય વાહનો છે, જેમાં ડિઝલ-હાયબ્રિડ, પેટ્રોલ-હાયબ્રિડ, પેટ્રોલ-સીએનજી, પેટ્રોલ-ઇથેનોલ અને સ્ટ્રોંગ હાયબ્રિડનો સમાવેશ થાય છે.
ડિઝલ વાહનોનો 10 ટકા, ઇ-વ્હિકલનો 6 થી 7 ટકા, સીએનજીનો 4 થી 5 ટકા અને હાયબ્રિડ વાહનોનો 10 ટકા હિસ્સો
ગત્ત વર્ષે આ જ સમયગાળામાં એટલે કે જાન્યુઆરીથી જુન – ૨૦૨૩ દરમિયાન છ મહિનામાં કુલ ૫૧,૬૫૩ વાહનો વેચાયા હતા, જેમાં ૭૦.૧૩ ટકા પેટ્રોલના, ૧૦ ટકા ડિઝલના, ૭.૫૮ ટકા ઇલેક્ટ્રિક અને ૪.૩૦ ટકા સીએનજી વાહનોનો અને ૮ ટકા અન્ય વાહનોનો સમાવેશ થાય છે.સીએનજી, પેટ્રોલ અને ડિઝલ વાહનોનો પ્રત્યેક કિ.મી. ખર્ચ રૃ. ૪ થી ૬ની વચ્ચે આવે છે,જ્યારે ઇ-વ્હિકલનો પ્રત્યેક કિ.મી. ખર્ચ એક થી બે રૃપિયા થાય છે. આમ, અન્ય ફ્યુલ કરતા ઇ-વ્હિકલ પ્રત્યેક કિ.મી.ના ખર્ચની દ્રષ્ટિએ ૮૦ ટકા સસ્તા પડતા હોવા છતાં છેલ્લા બે વર્ષના આ આંકડાઓથી સ્પષ્ટ થાય છે કે હજુ પણ લોકો ઇ-વ્હિકલની ખરીદી માટે ખચકાટ અનુભવી રહ્યા છે.
![હજુ પણ લોકોની પ્રથમ પસંદગી પેટ્રોલના વાહનો, કુલ વાહન વેચાણમાં 70 ટકા હિસ્સો 2 - image](https://static.gujaratsamachar.com/content_image/content_image_d16565ed-21fd-4cb2-bb07-ddd96b59dd05.jpeg)
ઇ-વ્હિકલ મોંઘા અને બેટરી રિચાર્જની ઝંઝટ
ઇ-વ્હિકલની ખરીદી વધતી નથી તેના બે મુખ્ય કારણો છે. એક તો ઇ-વ્હિકલ ખૂબ મોંઘા છે. સામાન્ય માણસને પરવડે તેવા નથી. પેટ્રોલ, ડિઝલ અને સીએનજી વાહનો કરતાં ઇ-વ્હિકલની કિંમત ૩૦ થી ૪૦ ટકા વધુ હોય છે. બીજું કારણ બેટરી છે. બેટરીને કલાકો સુધી રિચાર્જ કર્યા બાદ ફૂલ ચાર્જ થાય છે. વાહનમાં સૌથી વધુ કોસ્ટ બેટરીની હોય છે એટલે બેટરી બદલવાની થાય તો રિપ્લેસમેન્ટ ખર્ચ ખૂબ આવે છે. ઉપરાંત, સુરક્ષાની દ્રષ્ટિએ પણ લોકોમાં ચિંતા છે કેમ કે ઇ-વ્હિકલની બેટરીમાં આગ લાગવાના બનાવો વારંવાર બની રહ્યા છે.