બેઇજિંગ54 મિનિટ પેહલા
- કૉપી લિંક
ચીનના જિયાંગસી પ્રાંતમાં બુધવારે એક શોપિંગ કોમ્પ્લેક્સમાં આગ લાગી હતી. અત્યાર સુધી સ્થાનિક સરકારે 25 લોકોના મોતની પુષ્ટિ કરી છે. સરકાર દ્વારા જારી કરવામાં આવેલા નિવેદન અનુસાર, આ ઘટના જિયાંગસી પ્રાંતના યુશુઈ માર્કેટમાં બની હતી. ઘટના સમયે અહીં ઘણા લોકો હાજર હતા. જેમાં મહિલાઓ અને બાળકો પણ સામેલ હતા.
આ શોપિંગ કોમ્પ્લેક્સ એક ભોંયરામાં છે. આગ લાગવાનું કારણ જાણવા મળ્યું નથી, પરંતુ સ્થાનિક મીડિયાના અહેવાલો અનુસાર આગ જંક ફૂડના સ્ટોલમાંથી લાગી હતી. 102 લોકોને ત્યાંથી બહાર કાઢવામાં આવ્યા હતા. આગને કાબુમાં લેવામાં આવી છે.
આ તસવીર શાંઘાઈ ડેલી દ્વારા જાહેર કરવામાં આવી છે. એવું કહેવાય છે કે શોપિંગ કોમ્પ્લેક્સના ભોંયરામાં જંક ફૂડના સ્ટોલથી આગ શરૂ થઈ હતી.
જિનપિંગે તપાસના આદેશ આપ્યા
‘સિન્હુઆ’ ન્યૂઝ એજન્સી અનુસાર- જિયાંગસી પ્રાંતમાં 25 લોકોના મોત બાદ રાષ્ટ્રપતિ શી જિનપિંગે તપાસના આદેશ આપ્યા છે. તેમણે અધિકારીઓને પૂછ્યું કે આવી ઘટનાઓ વારંવાર કેમ બની રહી છે અને તેને રોકવા માટે કેવા પ્રકારની વ્યવસ્થા કરવામાં આવી છે.
ચીનના સરકારી અખબાર ‘ગ્લોબલ ટાઈમ્સ’ના જણાવ્યા અનુસાર આગ ઓલવવા માટે 120 ફાયર ફાઈટર્સની ટીમ મોકલવામાં આવી હતી. આ સિવાય પોલીસ અને સ્થાનિક સરકારી અધિકારીઓ પણ ઘટનાસ્થળે હાજર હતા. પોલીસે કહ્યું છે કે ગુરુવારે પણ સર્ચ ઓપરેશન ચાલુ રહેશે કારણ કે હજુ પણ કેટલાક લોકો ફસાયા હોવાની શક્યતા છે. બિલ્ડિંગમાં અમુક બાંધકામનું કામ ચાલી રહ્યું હતું. જેથી અનેક કામદારો પણ આગની ઝપેટમાં આવી ગયા હતા. આ બિલ્ડિંગમાં એક હોટલ અને જીમ પણ છે.
