બેંગલુરુ8 મિનિટ પેહલા
- કૉપી લિંક
ચીનના ઘણા વીડિયો સોશિયલ મીડિયા પર વાયરલ થઈ રહ્યા છે. દાવો કરવામાં આવી રહ્યો છે કે આ ભીડ HMPV વાયરસથી સંક્રમિત લોકોની છે.
ચીનમાં ફેલાયેલા કોરોના જેવા વાયરસ HMPVના અત્યાર સુધીમાં ભારતમાં 6 કેસ નોંધાયા છે. અમદાવાદમાં સોમવારે 2 મહિનાના બાળકમાં હ્યુમન મેટાન્યુમોવાયરસ (HMPV) પોઝિટિવ જોવા મળ્યો હતો. આ બાળક રાજસ્થાનનો છે અને અમદાવાદમાં સારવાર હેઠળ છે.
આ પહેલા સોમવારે સવારે કર્ણાટકમાં 3 મહિનાની છોકરી અને 8 મહિનાના છોકરામાં આ વાયરસ જોવા મળ્યો હતો. બંને બાળકોની બેંગલુરુની હોસ્પિટલમાં તપાસ કરવામાં આવી હતી. પશ્ચિમ બંગાળમાં પણ પાંચ મહિનાના બાળકમાં આ રોગના લક્ષણો જોવા મળ્યા છે. તેની ખાનગી હોસ્પિટલમાં સારવાર ચાલી રહી છે. બીજી તરફ તમિલનાડુના ચેન્નાઈમાં પણ બે બાળકો સંક્રમિત જોવા મળ્યા છે. તેમના વિશે હજુ વધુ માહિતી બહાર આવી નથી.
HMPV અંગે, આરોગ્ય પ્રધાન જેપી નડ્ડાએ કહ્યું…
નિષ્ણાતોએ કહ્યું છે કે HMPV નવો વાયરસ નથી. 2001માં તેની પ્રથમ ઓળખ થઈ હતી. આ પછી તે વિશ્વમાં ફેલાઈ ગયો. તે શ્વાસ દ્વારા ફેલાય છે, હવામાં ફેલાય છે. તે તમામ વય જૂથોના લોકોને અસર કરે છે. WHO પરિસ્થિતિ પર નજર રાખી રહ્યું છે અને ટૂંક સમયમાં અમારી સાથે રિપોર્ટ શેર કરશે.
ગુજરાતનું બાળક પહેલાથી જ બીમાર, કર્ણાટકમાં રૂટીન ટેસ્ટમાં વાયરસ મળી આવ્યો
અમદાવાદમાં 15 દિવસ પહેલા 2 મહિનાના બાળકની તબિયત લથડતા તેને હોસ્પિટલમાં દાખલ કરવામાં આવ્યો હતો. તે બાળકને શરદી અને તાવ હતો. શરૂઆતમાં તેને 5 દિવસ વેન્ટિલેટર પર પણ રાખવામાં આવ્યું હતું. ત્યારબાદ ટેસ્ટ કરાતા રિપોર્ટ પોઝિટિવ આવ્યો હતો.
કર્ણાટકમાં બંને કેસ અંગે કેન્દ્રીય સ્વાસ્થ્ય મંત્રાલયે કહ્યું કે બાળકો રૂટીન ચેકઅપ માટે હોસ્પિટલ પહોંચ્યા હતા. ટેસ્ટ કરાવ્યા બાદ તેનો રિપોર્ટ પોઝિટિવ આવ્યો હતો. જો કે, કર્ણાટકના આરોગ્ય વિભાગે સ્પષ્ટતા કરી હતી કે બાળકોના સેમ્પલનું ટેસ્ટિંગ સરકારી લેબમાં નહીં પરંતુ ખાનગી હોસ્પિટલમાં કરવામાં આવ્યું હતું.
કેન્દ્રીય સ્વાસ્થ્ય મંત્રાલયે કર્ણાટકમાં બે બાળકોમાં HMPV સંક્રમણની માહિતી આપી છે.
કોવિડ જેવા વાયરસના લક્ષણો, નાના બાળકો સૌથી વધુ અસર જ્યારે HMPV વાયરસથી ચેપ લાગે છે, ત્યારે દર્દીમાં શરદી અને કોવિડ-19 જેવા લક્ષણો દર્શાવે છે. તેની સૌથી વધુ અસર નાના બાળકો પર જોવા મળી રહી છે. આમાં 2 વર્ષથી ઓછી ઉંમરના બાળકો સૌથી વધુ અસરગ્રસ્ત છે.
કોવિડ Rx એક્સચેન્જના ફાઉન્ડરે કહ્યું – HMPV એક સામાન્ય સંક્રમણ જેવો છે
અમેરિકાના ટેક્સાસ રાજ્યના ડાલસમાં CovidRxExchangeના ફાઉન્ડર અને ચીફ એક્ઝિક્યુટિવ ડૉ. શશાંક હેડાએ ભાસ્કરને જણાવ્યું કે મીડિયા આ વાયરસ વિશે અતિશયોક્તિભરી ચિંતા દર્શાવી રહ્યું છે. જ્યારે, આંકડા દર્શાવે છે કે હોસ્પિટલોમાં લોકોમાં અચાનક વધારો થવાનું કારણ માત્ર HMPV નથી, પરંતુ અન્ય ઘણા વાયરલ ચેપ છે.
HMPV જેવા વાયરસ સામાન્ય રીતે આ સિઝનમાં સામાન્ય રીતે ફેલાય છે. થોડા સમય પછી તેમના કેસ સ્વાભાવિક રીતે ઘટે છે. તેથી, વધુ લોકોને હોસ્પિટલમાં દાખલ કરવાનો અર્થ એ ન લેવો જોઈએ કે આરોગ્ય સેવાઓ નિષ્ફળ ગઈ છે. વર્તમાન પરિસ્થિતિનું નિરીક્ષણ કરવું અને ચેપગ્રસ્ત લોકોને જરૂરી મેડિકલ સહાય પૂરી પાડવી મહત્વપૂર્ણ છે. પરંતુ, આ વાયરસથી કોરોનાના ડેલ્ટા વેરિયન્ટ જેવી મહામારી થવાની શક્યતા ઓછી છે.
ડૉ. શશાંક હેડા, અમેરિકાના ટેક્સાસ રાજ્યના ડાલાસમાં CovidRxExchangeના ફાઉન્ડર અને ચીફ એક્ઝિક્યુટિવ છે.
વાયરસ સંબંધિત અપડેટ્સ…
- કર્ણાટકના મુખ્યમંત્રી સિદ્ધારમૈયાએ કહ્યું કે બે બાળકોમાં વાયરસની પુષ્ટિ થઈ છે. આ જોઈને મેં તરત જ કર્ણાટકના સ્વાસ્થ્ય મંત્રી દિનેશ ગુંડુ રાવ સાથે વાત કરી હતી. સરકાર આ વાયરસને ખતમ કરવા માટે તમામ શક્ય પ્રયાસો કરશે.
- કર્ણાટકના સ્વાસ્થ્ય મંત્રી દિનેશ ગુંડુ રાવે કહ્યું, આ કોઈ વાયરસ નથી. HMPV એ ફ્લૂનો વાયરસ છે. ગભરાવાની જરૂર નથી. અમે અમારી પેનલ સાથે બેઠક કરી રહ્યા છીએ. આ અંગે ભારત સરકાર અને ICMR સાથે ચર્ચા કરશે.
- પશ્ચિમ બંગાળમાં HMPVના એક કેસ મળવા વચ્ચે, સીએમ મમતા બેનર્જીએ કહ્યું કે રાજ્યમાં હજુ સુધી કોઈ કેસ મળ્યો નથી.
કેન્દ્ર સરકારે કહ્યું- HMPV આ સિઝનમાં એક સામાન્ય વાયરસ છે
ચીનમાં HMPVના વધતા જતા કેસ વચ્ચે ઈમરજન્સી જેવી સ્થિતિની ચર્ચા થઈ હતી. જો કે, ભારત સરકારે 4 જાન્યુઆરીએ જોઈન્ટ મોનિટરિંગ ગ્રુપની બેઠક યોજી હતી. આ પછી, સરકારે કહ્યું હતું કે ફ્લૂની સિઝનને ધ્યાનમાં રાખીને, ચીનમાં સ્થિતિ અસામાન્ય નથી અને સરકાર તેને અટકાવવા માટે તૈયાર છે.
દેશ શ્વસન સંબંધી રોગોના કેસોમાં કોઈપણ વધારાનો સામનો કરવા માટે સંપૂર્ણ રીતે તૈયાર છે. RSV અને HMPV ચીનમાં ફ્લૂના વધતા કેસોનું કારણ છે. આ સિઝનમાં આ સામાન્ય ઈન્ફલ્યુએન્ઝા વાયરસ છે. સરકાર સ્થિતિ પર ચાંપતી નજર રાખી રહી છે. તેમજ WHOને ચીનની સ્થિતિ વિશે સમયાંતરે અપડેટ આપવા માટે કહેવામાં આવ્યું છે.
સરકારે કહ્યું – ફ્લૂ જેવા રોગોને રોકવા માટે સિસ્ટમ તૈયાર છે સરકારે કહ્યું કે ભારતમાં ઈન્ફલ્યુએન્ઝા જેવી બીમારી (ILI) અને ઈન્ફલ્યુએન્ઝા માટે ગંભીર તીવ્ર શ્વાસોચ્છવાસની બીમારી (SARI) માટે ICMR અને IDSP દ્વારા મજબૂત સર્વેલન્સ સિસ્ટમ છે. બંને એજન્સીઓના ડેટા દર્શાવે છે કે ILI અને SARI કેસોમાં કોઈ અસામાન્ય વધારો થયો નથી.
જો કે, એવું પણ કહેવામાં આવ્યું હતું કે સાવચેતીના ભાગ રૂપે, ICMR HMPV ટેસ્ટ કરતી લેબની સંખ્યામાં વધારો કરશે. આખા વર્ષ દરમિયાન HMPV કેસ પર પણ નજર રાખશે.
HMPV વાયરસ વિશે જાણો…
પ્રશ્ન: HMPV વાયરસ શું છે? જવાબ: HMPV એ RNA વાયરસ છે, જે સામાન્ય રીતે શરદી જેવા લક્ષણોનું કારણ બને છે. આનાથી ઉધરસ અથવા ગળામાં તકલીફ થઈ શકે છે. નાકમાંથી સતત પાણી વહી શકે છે. ઠંડા હવામાનમાં તેનું જોખમ વધારે છે.
પ્રશ્ન: HMPV વાયરસ કેવી રીતે ફેલાય છે? જવાબ: HMPV વાયરસ ઉધરસ અને છીંક દ્વારા ફેલાય છે. આ વાયરસ ચેપગ્રસ્ત વ્યક્તિના સંપર્કમાં આવતા ફેલાય છે. તે ચેપગ્રસ્ત વ્યક્તિ સાથે હાથ મિલાવીને અથવા વાયરસથી સંક્રમિત કોઈપણ વસ્તુને સ્પર્શ કરવાથી પણ ફેલાય છે. ચેપ લાગ્યાના 3 થી 5 દિવસમાં તેના લક્ષણો દેખાવા લાગે છે.
પ્રશ્ન: HMPV રોગના લક્ષણો શું છે? જવાબ: તેના સૌથી સામાન્ય લક્ષણો ઉધરસ અને તાવ છે. શરૂઆતમાં તેના લક્ષણો સામાન્ય વાયરલ જેવા જ દેખાય છે, પરંતુ જો વાયરસની અસર ગંભીર હોય તો ન્યુમોનિયા અને બ્રોકાઇટિસનો ખતરો રહે છે. તેના લક્ષણો શું છે, ગ્રાફિકમાં જુઓ:
પ્રશ્ન: શું HMPV કોરોના વાયરસ જેવો છે? જવાબ: HMPV વાયરસ (Paramyxoviridae Family) અને કોરોના વાયરસ (Coronaviridae Family), બંને અલગ-અલગ પરિવારનો ભાગ છે. આ હોવા છતાં, તેમનામાં ઘણી બાબતો સમાન છે.
શ્વસન સંબંધી બીમારી: બંને વાયરસ મુખ્યત્વે શ્વસનતંત્રને અસર કરે છે.
ટ્રાન્સમિશન: બંને વાયરસ શ્વાસમાં લેવાથી અને સંક્રમિતના સંપર્કમાં આવતા ફેલાય છે.
લક્ષણો: બંને વાયરસના લક્ષણો સમાન છે. તેમાં તાવ, ઉધરસ, ગળામાં દુખાવો, ઘરઘરાટી અને શ્વાસ લેવામાં તકલીફનો સમાવેશ થાય છે.
સંવેદનશીલ જૂથ: બાળકો, વૃદ્ધો અને નબળી રોગપ્રતિકારક શક્તિ ધરાવતા લોકો બંને વાયરસથી સૌથી વધુ જોખમમાં છે.
નિવારણ: હાથ સાફ રાખવા, માસ્ક પહેરવું અને સોશિયલ ડિસ્ટન્સ એ બંને વાયરસથી બચવા માટેના મહત્વપૂર્ણ પગલાં છે.
સવાલ: શું આ વાયરસ કોરોનાની જેમ આખી દુનિયામાં ફેલાઈ શકે છે? જવાબઃ આ કોઈ નવો વાયરસ નથી. ગયા વર્ષે પણ ચીનમાં તેના ફેલાવાના સમાચાર હતા. વર્ષ 2023માં નેધરલેન્ડ, બ્રિટન, ફિનલેન્ડ, ઓસ્ટ્રેલિયા, કેનેડા અને અમેરિકા જેવા દેશોમાં પણ આ વાયરસ જોવા મળ્યો હતો. નેશનલ લાઇબ્રેરી ઓફ મેડિસિન અનુસાર, તે 2001માં નેધરલેન્ડ્સમાં પ્રથમવાર મળી આવ્યો હતો. જો કે, તે ઓછામાં ઓછા 50 વર્ષ જૂનો વાયરસ માનવામાં આવે છે.
આ વાયરસનો એવો કોઈ પ્રકાર હજુ સુધી જોવા મળ્યો નથી, જે કોરોનાની જેમ વિસ્ફોટક રીતે ફેલાય છે.
પ્રશ્ન: શું આ રોગની કોઈ સારવાર કે વેક્સિન છે?
જવાબ: HMPV વાયરસ માટે હજી સુધી કોઈ એન્ટિવાયરલ દવા બનાવવામાં આવી નથી. જો કે, મોટાભાગના લોકો પર તેની ખૂબ જ સામાન્ય અસર છે. તેથી, તેના લક્ષણો ફક્ત ઘરે રહીને જ કન્ટ્રોલ કરી શકાય છે. ગંભીર લક્ષણો ધરાવતા લોકોને ઓક્સિજન થેરાપી, IV ટીપાં અને કોર્ટીકોસ્ટેરોઈડ્સ (સ્ટીરોઈડ્સનું એક સ્વરૂપ) આપવામાં આવી શકે છે.
આ વાયરસનો સામે લડવા માટે હજુ સુધી કોઈ વેક્સિન વિકસાવવામાં આવી નથી. ખરેખરમાં, HMPV વાયરસના કારણે, હજુ સુધી એવી સ્થિતિ ઊભી થઈ નથી કે તેના માટે કોઈ વેક્સિન બનાવવાની જરૂર હોય.
પ્રશ્ન: શું WHOએ HMPV અંગે કોઈ અપડેટ જારી કર્યું છે?
જવાબ: ના, વિશ્વ આરોગ્ય સંસ્થાએ ચીનમાં ફેલાતા HMPV વાયરસને લઈને હજુ સુધી કોઈ અપડેટ જાહેર કર્યુ નથી. જો કે, ચીનના પડોશી દેશોએ WHO પાસે આ અંગે યોગ્ય અપડેટ જાહેર કરવાની માંગ કરી છે.
પ્રશ્ન: ભારતના આરોગ્ય અધિકારીઓએ HMPV વિશે શું કહ્યું છે?
જવાબ: દેશના આરોગ્ય સેવાઓના મહાનિર્દેશક ડૉ. અતુલ ગોયલે કહ્યું છે કે ભારતમાં આ અંગે કોઈ ગંભીર પરિસ્થિતિની શક્યતા નથી. અહીં મેટાન્યુમોવાયરસ એ સામાન્ય શ્વસન વાયરસ છે. જેના કારણે શરદી અને ફ્લૂ જેવા લક્ષણો જોવા મળે છે.
જો કે, વૃદ્ધોમાં અને એક વર્ષથી ઓછી ઉંમરના બાળકોમાં તેના લક્ષણો થોડા ગંભીર હોઈ શકે છે. આ હોવા છતાં, તે ગંભીર રોગ નથી. અમારી હોસ્પિટલો પરિસ્થિતિનો સામનો કરવા માટે સંપૂર્ણ રીતે તૈયાર છે.
