અમેરિકા યુક્રેન પર મિસાઈલ પ્રતિબંધ હટાવી શકે: પુતિને કહ્યું- આ નાટોની રશિયા વિરુદ્ધ યુદ્ધની ઘોષણા, અમે તેનો જવાબ આપીશું

યુક્રેનને રશિયામાં લાંબા અંતરની એટેક મિસાઈલનો ઉપયોગ કરવાની પરવાનગી મળી શકે છે. CNN અનુસાર, અમેરિકા અને બ્રિટન આ અંગે વિચાર કરી રહ્યા છે. અત્યાર સુધી તેના પર પ્રતિબંધ હતો, પરંતુ યુક્રેન પરનો આ પ્રતિબંધ હવે દૂર થઈ શકે છે.

રિપોર્ટ અનુસાર, રશિયાના રાષ્ટ્રપતિ વ્લાદિમીર પુતિને કહ્યું છે કે, આવા હથિયારોના ઉપયોગની મંજૂરી આપવાનો અર્થ એ થશે કે નાટો રશિયા વિરુદ્ધ યુદ્ધમાં ઉતરી ગયું છે. તેણે કહ્યું કે જો આવું થશે તો તે ચોક્કસપણે તેનો જવાબ આપશે.

પુતિને કહ્યું કે, જો યુક્રેનને લાંબા અંતરના હથિયારોનો ઉપયોગ કરવાની પરવાનગી મળશે તો તે સમજી જશે કે નાટો યુદ્ધમાં ઉતરી ગયું છે.

પુતિને કહ્યું- અમેરિકા પરવાનગી આપે તો ઘણું બદલાઈ જશે પુતિને એક સરકારી ટીવી ચેનલ પર કહ્યું કે, આનાથી ઘણો બદલાવ આવશે. આ હથિયારોનો ઉપયોગ સેટેલાઇટ વિના શક્ય નથી. યુક્રેન પાસે આવી ટેક્નોલોજી નથી. આ માત્ર યુરોપિયન યુનિયન સેટેલાઇટ અથવા અમેરિકન સેટેલાઇટની મદદથી જ કરી શકાય છે.

પુતિને વધુમાં કહ્યું કે, આ મિસાઈલ સિસ્ટમનો ઉપયોગ કરવા માટે માત્ર નાટોના સૈન્ય કર્મચારીઓને જ તાલીમ આપવામાં આવે છે. યુક્રેનિયન સૈનિકો આ કરી શકતા નથી. તેથી સવાલ એ નથી કે યુક્રેનિયનોને આ શસ્ત્રો સાથે રશિયા પર હુમલો કરવાની મંજૂરી આપવી કે નહીં. નાટો સામેલ છે કે નહીં તે નક્કી કરવાનું તેમના પર છે.

US સ્ટેટ સેક્રેટરી એન્ટની બ્લિંકને 11 સપ્ટેમ્બરે બ્રિટિશ વિદેશ મંત્રી ડેવિડ લેમી સાથે યુક્રેનની મુલાકાત લીધી હતી.

વ્હાઇટ હાઉસમાં આજે પ્રતિબંધ હટાવવા અંગે ચર્ચા, બ્લિંકને સંકેતો આપ્યા હતા રિપોર્ટ અનુસાર બ્રિટિશ વડાપ્રધાન કીર સ્ટારમર અને રાષ્ટ્રપતિ જો બાઇડન વચ્ચે શુક્રવારે વ્હાઇટ હાઉસમાં બેઠક યોજાવા જઇ રહી છે. આ દરમિયાન યુક્રેનને રશિયા સામે લાંબા અંતરની મિસાઈલોનો ઉપયોગ કરવાની મંજૂરી આપવી જોઈએ કે કેમ તે અંગે ચર્ચા થવાની છે.

આ પહેલા ગુરુવારે અમેરિકાના વિદેશ મંત્રી એન્ટની બ્લિંકને કહ્યું હતું કે, રશિયાની અંદરના સૈન્ય ઠેકાણાઓ પર લાંબા અંતરના શસ્ત્રોનો ઉપયોગ કરવા બદલ અમેરિકા યુક્રેન પર લગાવવામાં આવેલા પ્રતિબંધો હટાવવા જઈ રહ્યું છે.

બ્લિંકને કહ્યું કે, અમને પુરાવા મળ્યા છે કે રશિયા ઈરાન પાસેથી બેલેસ્ટિક મિસાઈલો મેળવી રહ્યું છે. મતલબ કે રશિયાનો હુમલો વધુ તીવ્ર બનશે. તેનો જવાબ આપવા માટે યુક્રેનને લાંબા અંતરની મિસાઈલોનો ઉપયોગ કરવો પડશે. તેણે કહ્યું હતું કે, તે આ માટે બ્રિટિશ પીએમ કીર સ્ટારમર અને રાષ્ટ્રપતિ બાઇડન સાથે વાત કરશે.

યુક્રેન ઘણા સમયથી અમેરિકા પાસે પરવાનગી માગી રહ્યું છે રિપોર્ટ અનુસાર યુક્રેન લાંબા અંતરના હુમલાના હથિયારોનો ઉપયોગ કરવા માટે અમેરિકા અને બ્રિટન પાસેથી લાંબા સમયથી પરવાનગી માગી રહ્યું છે. યુક્રેનને લાંબા અંતરની મિસાઈલો આપવામાં આવી છે, પરંતુ તે તેનો ઉપયોગ પોતાની મર્યાદામાં દુશ્મનો સામે કરી શકે છે.

યુક્રેન રશિયામાં ઘૂસીને ગયા મહિને હુમલો કર્યો હતો. આવી સ્થિતિમાં, ઝેલેન્સ્કી ઇચ્છે છે કે આ પ્રતિબંધો દૂર કરવામાં આવે જેથી તે રશિયાની અંદર લાંબા અંતરના હથિયારોનો ઉપયોગ કરી શકે.

રિપોર્ટ અનુસાર, અમેરિકાએ પહેલીવાર ઓક્ટોબર 2023માં યુક્રેનને લોંગ રેન્જ આર્મી ટેક્ટિકલ મિસાઈલ સિસ્ટમ (ATACMS) મિસાઈલો આપી હતી. તે લગભગ 300 કિમી સુધીના લક્ષ્યોને ચોક્કસ રીતે હિટ કરી શકે છે.

CNN સાથેના તાજેતરના ઇન્ટરવ્યુમાં યુક્રેનના સંરક્ષણ મંત્રી રૂસ્તમ ઉમારોવે જણાવ્યું હતું કે, યુક્રેનિયન શહેરો પર હુમલો કરવા માટે રશિયા જે લક્ષ્યોનો ઉપયોગ કરે છે તે આ મિસાઇલોની શ્રેણીમાં છે.

આ પહેલા ફ્રાન્સે યુક્રેનને લાંબા અંતરની સ્ટોર્મ શેડો મિસાઈલ પણ આપી હતી. તે 250 કિલોમીટર દૂર સુધીના ટાર્ગેટને હિટ કરી શકે છે, પરંતુ તેની શરત પણ હતી કે તેનો ઉપયોગ તેની મર્યાદામાં જ થવો જોઈએ.