36 મિનિટ પેહલા
- કૉપી લિંક
સંયુક્ત રાષ્ટ્ર (UN)માં પેલેસ્ટાઈનને સંપૂર્ણ સભ્યપદ આપવાના પ્રસ્તાવને અમેરિકાએ વીટો કરી દીધો છે. અલ્જીરિયાએ સંયુક્ત રાષ્ટ્ર સુરક્ષા પરિષદ (UNSC)માં આ પ્રસ્તાવ રજૂ કર્યો હતો, જેના પર ગુરુવારે મતદાન થયું હતું. જો કે અમેરિકાના વીટો બાદ પેલેસ્ટાઈન યુએનનું કાયમી સભ્ય બની શક્યું નથી.
UNSCમાં ઠરાવ પસાર કરવા માટે ઓછામાં ઓછા 9 સભ્યોના સમર્થનની જરૂર હતી. 15 સભ્યોની સુરક્ષા પરિષદમાં પેલેસ્ટાઈનની તરફેણમાં 12 મત પડ્યા હતા, જ્યારે બ્રિટન અને સ્વિટ્ઝર્લેન્ડ ગેરહાજર રહ્યા હતા. એવું માનવામાં આવતું હતું કે ગાઝામાં તબાહી પછી અમેરિકા ઠરાવને વીટો નહીં આપે, પરંતુ અમેરિકા પોતાના સ્ટેન્ડ પર અડગ રહ્યું અને વીટો પાવરનો ઉપયોગ કર્યો.
યુએનમાં સંપૂર્ણ સભ્યપદ મેળવવા માટે પેલેસ્ટાઈનનો આ બીજો પ્રયાસ હતો. અગાઉ 2011માં પણ પેલેસ્ટાઈનને સભ્યપદ આપવા પર યુએનએસસીમાં વોટિંગ થયું હતું, પરંતુ તે સમયે પણ અમેરિકાએ આ પ્રસ્તાવને વીટો કરી દીધો હતો.
યુએનએસસીમાં પેલેસ્ટાઈનના સભ્યપદ અંગેના ઠરાવ પર બ્રિટન અને સ્વિટ્ઝર્લેન્ડે મતદાન કર્યું ન હતું.
અમેરિકાએ વીટો પર સ્પષ્ટતા કરી
અમેરિકાએ પેલેસ્ટાઈનના કાયમી સભ્યપદના પ્રસ્તાવને વીટો આપવા અંગે સ્પષ્ટતા આપી છે. યુએનમાં અમેરિકાના પ્રતિનિધિ રોબર્ટ વૂડે કહ્યું છે કે અમેરિકા પણ દ્વિ-રાજ્ય ઉકેલ ઈચ્છે છે, પરંતુ યુએન સંપૂર્ણ સભ્યપદ આપવાનું સ્થાન નથી.
પેલેસ્ટાઈનને અલગ દેશનો દરજ્જો આપવાનો યોગ્ય રસ્તો ઈઝરાયલ અને પેલેસ્ટાઈન વચ્ચે સીધી વાટાઘાટો છે. અમેરિકા અને અન્ય સહયોગી દેશો આ વાતચીતમાં મદદ કરશે. અમે ઈચ્છીએ છીએ કે બંને પક્ષો વચ્ચે સીધી વાટાઘાટો દ્વારા ઉકેલ આવે.
પેલેસ્ટાઈન કહ્યું- હાર સ્વીકારશે નહીં
ઈઝરાયલે અમેરિકાના વીટો પાવરના ઉપયોગની પ્રશંસા કરી છે. ઇઝરાયલના વિદેશ મંત્રી ઇઝરાયલ કેટ્સે કહ્યું, “શરમજનક પ્રસ્તાવ ફગાવી દીધો; આતંકવાદને પુરસ્કાર મળવો જોઇએ નહીં.”
આ દરમિયાન પેલેસ્ટાઈન ઓથોરિટીના પ્રમુખ મહમૂદ અબ્બાસે અમેરિકાના વીટોની નિંદા કરી છે. અબ્બાસે તેને ખોટું અને અનૈતિક ગણાવ્યું છે. યુએનમાં પેલેસ્ટાઈનના રાજદૂત રિયાદ મન્સૂરે કહ્યું, “જો ઠરાવ પસાર નહીં થાય તો અમારું મનોબળ નબળું નહીં પડે. અમે હાર માનીશું નહીં અને પેલેસ્ટાઈનની સભ્યતા મેળવવાનો પ્રયાસ ચાલુ રાખીશું.”
પેલેસ્ટાઈનના રાજદૂત રિયાદ મન્સૂરે અમેરિકાના વીટોની નિંદા કરી હતી.
વીટો શું છે…
UNSCમાં પાંચ સ્થાયી સભ્યો છે. જેમાં અમેરિકા, રશિયા, બ્રિટન, ફ્રાન્સ અને ચીનનો સમાવેશ થાય છે. માત્ર તેમની પાસે વીટો પાવર છે. સુરક્ષા પરિષદ આ પાંચ દેશોની સંમતિ વિના કોઈપણ ઠરાવ પસાર કે અમલ કરી શકતી નથી. જો 5 સભ્યોમાંથી એક પણ દરખાસ્તને વીટો કરે તો તેને નામંજૂર કરવામાં આવે છે.
પેલેસ્ટાઈન યુએનનો બિન-સભ્ય દેશ છે
પેલેસ્ટાઇનને વિશ્વના 140 થી વધુ દેશો દ્વારા માન્યતા આપવામાં આવી છે, પરંતુ પેલેસ્ટાઇન હજુ પણ સંયુક્ત રાષ્ટ્રનું સંપૂર્ણ સભ્ય બન્યું નથી. જ્યારે ઇઝરાયલને 1947માં જ યુએનનું કાયમી સભ્યપદ મળ્યું હતું. હાલમાં પેલેસ્ટાઈન યુએનમાં બિન-સભ્ય દેશ છે.
2012માં પેલેસ્ટાઇનને યુએનનો બિન-સભ્ય દેશ બનાવવામાં આવ્યો હતો. આ એવા દેશો છે જે યુએનમાં પોતાના મંતવ્યો રજૂ કરી શકે છે, પરંતુ મતદાન કરી શકતા નથી. પેલેસ્ટાઈન ઉપરાંત વેટિકન સિટી પણ બિન-સભ્ય દેશ છે.
