અમેરિકન સાંસદોએ ઇન્ટરનેશનલ ક્રિમિનલ કોર્ટને ચેતવણી આપી: કહ્યું- જો નેતન્યાહુ અને ઈઝરાયલના અધિકારીઓ વિરુદ્ધ ધરપકડ વોરંટ જારી કરવામાં આવશે તો પરિણામ ભોગવવા પડશે

યુએસ કોંગ્રેસના સાંસદોએ ઇન્ટરનેશનલ ક્રિમિનલ કોર્ટ (ICC)ને ચેતવણી આપી છે. મીડિયા રિપોર્ટ્સ અનુસાર, સાંસદોએ કહ્યું છે કે જો ICC ઈઝરાયલના વડાપ્રધાન બેન્જામિન નેતન્યાહૂ સહિત ટોચના ઈઝરાયલ અધિકારીઓ વિરુદ્ધ ધરપકડ વોરંટ જારી કરશે તો તેમને પરિણામ ભોગવવા પડશે. અમેરિકાને આશંકા છે કે જો નેતન્યાહુ અને તેમના અધિકારીઓ વિરુદ્ધ ધરપકડ વોરંટ જારી કરવામાં આવશે તો તેની અસર ઈઝરાયલ અને હમાસ વચ્ચે ચાલી રહેલી વાતચીત પર પડશે.

અમેરિકન મીડિયા આઉટલેટ એક્સિઓસના રિપોર્ટ અનુસાર, અમેરિકામાં ICC વિરુદ્ધ વોરંટ તૈયાર કરવામાં આવી રહ્યું છે. આ પહેલા અમેરિકી સંસદના સ્પીકર માઈક જોન્સને ICCના આ પગલાની નિંદા કરી હતી. તેમણે તેને અત્યંત શરમજનક ગણાવ્યું હતું. તે જ સમયે, યુએસ વિદેશ મંત્રાલયે પણ કહ્યું છે કે આ ICCના અધિકારક્ષેત્રમાં નથી.

નેતન્યાહુ પહેલા ICCએ પણ યુક્રેન પર યુદ્ધના આરોપમાં રશિયન રાષ્ટ્રપતિ વ્લાદિમીર પુતિન વિરુદ્ધ ધરપકડ વોરંટ જારી કર્યું હતું. જોકે કોઈ દેશ તેમની ધરપકડ કરવામાં સફળ રહ્યો નથી.

ઈઝરાયલના વડાપ્રધાન બેન્જામિન નેતન્યાહુ રાજદ્વારી માધ્યમો દ્વારા ધરપકડ ટાળવાનો પ્રયાસ કરી રહ્યા છે.

ઇઝરાયલ વોરંટને મુલતવી રાખવાનો પ્રયાસ કરી રહ્યું છે
ટાઈમ્સ ઓફ ઈઝરાયલ અનુસાર, ગાઝામાં થયેલા હુમલાને લઈને આઈસીસી ઈઝરાયલના વડાપ્રધાન નેતન્યાહુ સહિત અનેક ઈઝરાયલ અધિકારીઓ સામે ધરપકડ વોરંટ જારી કરી શકે છે. આ કારણોસર ઈઝરાયલ ધરપકડ વોરંટને મુલતવી રાખવાનો પ્રયાસ કરી રહ્યું છે. ઈઝરાયલના વડાપ્રધાન બેન્જામિન નેતન્યાહુએ અમેરિકી રાષ્ટ્રપતિ સમક્ષ ધરપકડ વોરંટનો મુદ્દો ઉઠાવ્યો છે.

તેમણે સોશિયલ મીડિયા પર આ અંગે પોતાનો વિરોધ પણ વ્યક્ત કર્યો હતો. નેતન્યાહુએ કહ્યું હતું કે ઈઝરાયલ પોતાના સ્વરક્ષણના અધિકાર સાથે ક્યારેય સમાધાન કરશે નહીં. મધ્ય પૂર્વના એકમાત્ર લોકતાંત્રિક યહૂદી દેશ સામેનો આ આરોપ અત્યંત અપમાનજનક છે. અમે આની સામે ઝૂકીશું નહીં. ઈઝરાયલ આતંકવાદીઓ સામે તેની લડાઈ ચાલુ રાખશે.

આઈસીસીના વોરંટ પર ઈઝરાયલની કેબિનેટની બેઠક પણ થઈ છે. આ બેઠકમાં ધરપકડ વોરંટને સ્થગિત કરવા માટે આઈસીસી અને અન્ય રાજદ્વારી અધિકારીઓનો સંપર્ક કરવા પર સહમતિ થઈ હતી આ સિવાય પીએમ નેતન્યાહૂએ બ્રિટન અને જર્મનીના વિદેશ મંત્રીઓ પાસેથી પણ આ મામલે મદદ માગી હતી.