Related posts
ટોરેન્ટો4 મિનિટ પેહલા
- કૉપી લિંક
ભારતીય મૂળની અનિતા આનંદે કેનેડાના વડાપ્રધાન પદની રેસમાંથી પોતાનું નામ પાછું ખેંચી લીધું છે. તેમણે આ વર્ષે યોજાનારી ચૂંટણી પણ લડવાનો ઈનકાર કરી દીધો છે. અનીતાએ X પર એક પત્ર પોસ્ટ કરીને આ જાણકારી આપી છે.
અનિતાએ લખ્યું છે-
આજે હું જાહેરાત કરું છું કે હું કેનેડાની લિબરલ પાર્ટીના આગામી નેતા બનવાની રેસમાં સામેલ નથી અને ઓકવિલે માટે સંસદ સભ્ય તરીકે ફરીથી ચૂંટણી પણ લડીશ નહીં.
આ પહેલા ઘણા મીડિયા રિપોર્ટમાં દાવો કરવામાં આવી રહ્યો હતો કે વડાપ્રધાન જસ્ટિન ટ્રુડોના રાજીનામા બાદ અનિતા આગામી વડાપ્રધાન બની શકે છે. હમણાં માટે, નવા નેતા ચૂંટાય ત્યાં સુધી જસ્ટિન ટ્રુડો જ વડાપ્રધાન રહેશે.
અનીતા આનંદ ટ્રુડો સરકારમાં પરિવહન મંત્રી પદ સંભાળી રહ્યા છે.
કોણ છે અનિતા આનંદ?
- અનિતાના પિતા તમિલનાડુના હતા જ્યારે તેના માતા પંજાબના હતા. જો કે, અનિતાનો જન્મ અને ઉછેર કેનેડાના ગ્રામીણ વિસ્તાર નોવા સ્કોટીયામાં થયો હતો.
- તેમણે ક્વીન્સ યુનિવર્સિટીમાંથી પોલિટિકલ સાયન્સમાં આર્ટ્સમાં ગ્રેજ્યુએશન, ડેલહાઉસી યુનિવર્સિટીમાંથી કાયદામાં ગ્રેજ્યુએશન અને યુનિવર્સિટી ઑફ ટોરોન્ટોમાંથી કાયદામાં માસ્ટર્સ કર્યું છે.
- 57 વર્ષના અનિતા વ્યવસાયે વકીલ છે. તેણે કેનેડાની ઓકવિલે સીટ પરથી 2019માં તેની પ્રથમ સંસદીય ચૂંટણી જીતી હતી. તે જ વર્ષે તેમને જાહેર સેવાઓ અને કેબિનેટ મંત્રી બનાવવામાં આવ્યા હતા.
- અનીતા કેનેડાનું સંરક્ષણ મંત્રાલય સંભાળનાર બીજા મહિલા છે. અગાઉ 1990માં કિમ કેમ્પબેલે આ જવાબદારી સંભાળી હતી.
- અનિતા યુનિવર્સિટી ઓફ ટોરોન્ટોની એસોસિયેટ ડીન પણ રહી ચૂક્યા છે. તેમણે 1995માં જોન નોલ્ટન સાથે લગ્ન કર્યા, જેઓ કેનેડિયન વકીલ અને બિઝનેસ એક્ઝિક્યુટિવ છે. તેમને 4 બાળકો છે.
- અનિતા આનંદ લિંગ સમાનતાના પ્રખર સમર્થક રહ્યા છે. તેણી LGBTQIA+ અધિકારોનું સમર્થન કરે છે. તેમણે જાતીય ગેરવર્તણૂક સામે લડવા અને કેનેડિયન સંરક્ષણ દળોમાં સાંસ્કૃતિક પરિવર્તન લાવવાની પહેલ પણ કરી.
- પ્રોગ્રેસિવ કન્ઝર્વેટિવ પાર્ટીના કિમ કેમ્પબેલ 1993માં કેનેડાના પ્રથમ મહિલા વડાપ્રધાન બન્યા હતા, ત્યાર બાદ કેનેડામાં કોઈ મહિલા વડાપ્રધાન પદ સુધી પહોંચ્યા નથી.
અનિતા આનંદનો જન્મ કેનેડાના ગ્રામીણ વિસ્તારમાં થયો હતો. તે યુનિવર્સિટી ઓફ ટોરોન્ટોના એસોસિયેટ ડીન રહી ચૂક્યા છે.
ટ્રુડોની પાર્ટી પાસે બહુમતી નથી
કેનેડાની સંસદ હાઉસ ઓફ કોમન્સમાં લિબરલ પાર્ટીના 153 સાંસદો છે. હાઉસ ઓફ કોમન્સમાં 338 સીટો છે. આમાં બહુમતનો આંકડો 170 છે. ગયા વર્ષે, ટ્રુડો સરકારના સહયોગી ન્યૂ ડેમોક્રેટિક પાર્ટી (NDP) એ તેના 25 સાંસદોનું સમર્થન પાછું ખેંચી લીધું હતું. NDPએ ખાલિસ્તાન તરફી કેનેડિયન શીખ સાંસદ જગમીત સિંહની પાર્ટી છે.
ગઠબંધન તૂટવાને કારણે ટ્રુડો સરકાર લઘુમતીમાં આવી ગઈ હતી. જો કે, 1 ઓક્ટોબરે યોજાયેલી બહુમતી પરીક્ષણમાં ટ્રુડોની લિબરલ પાર્ટીને અન્ય પક્ષનું સમર્થન મળ્યું હતું. આ કારણે ટ્રુડોએ ફ્લોર ટેસ્ટ પાસ કર્યો હતો.
ન્યૂ ડેમોક્રેટિક પાર્ટી (NDP)ના નેતા જગમીત સિંહે PM ટ્રુડો વિરુદ્ધ ફરીથી અવિશ્વાસ પ્રસ્તાવ લાવવાનો નિર્ણય કર્યો છે. જો કે કેનેડિયન સંસદને 24 માર્ચ સુધી સ્થગિત કરવામાં આવી છે, લિબરલ પાર્ટી પાસે બહુમતી મેળવવા અને નવા નેતાની પસંદગી કરવા માટે 60 દિવસથી વધુનો સમય છે.
