નવી દિલ્હીમાં ઈઝરાયલ એમ્બેસી નજીક વિસ્ફોટ: ઘટનાસ્થળેથી પત્ર મળ્યો હોવાનો દાવો, એમ્બેસીના પ્રવક્તાએ કહ્યું- સાંજે ધડાકો સંભળાયો હતો

રાષ્ટ્રીય રાજધાની દિલ્હીના ચાણક્યપુરીમાં ઇઝરાયલી દૂતાવાસની નજીક મંગળવારે સાંજે એક વિસ્ફોટના અહેવાલ છે. આ માહિતી દિલ્હી ફાયર સર્વિસને મળી હતી. આ પછી ફાયર સર્વિસ અને પોલીસની ટીમ ઘટનાસ્થળે પહોંચી તપાસ હાથ ધરી હતી.

સ્પેશિયલ સેલના સૂત્રોએ ‘ભાસ્કર’ને જણાવ્યું કે એમ્બેસીની પાછળના ખાલી પ્લોટ પર વિસ્ફોટનો અવાજ સંભળાયો હતો. ત્રણ-ચાર લોકોએ પણ સાંભળ્યું. જેના કારણે વિસ્ફોટ થયો તેની તપાસ કરવામાં આવી રહી છે. સ્પેશિયલ સેલ અને ફાયર વિભાગની ટીમ હાલ સ્થળ પરથી રવાના થઈ ગઈ છે. ન્યૂઝ એજન્સી ‘પીટીઆઈ’એ દિલ્હી પોલીસના સૂત્રોને ટાંકીને જણાવ્યું કે ઘટનાસ્થળેથી ઈઝરાયલના રાજદૂતને સંબોધિત એક પત્ર મળ્યો છે. તેમાં શું લખ્યું છે તેની માહિતી આપવામાં આવી નથી.

‘ભાસ્કર’ દ્વારા સૂત્રોને ટાંકીને પ્રાપ્ત માહિતી અનુસાર, પોલીસને એમ્બેસીથી થોડે દૂર એક ખાલી પ્લોટ પર એક પત્ર મળ્યો છે, જ્યાં વિસ્ફોટનો અવાજ સંભળાયો હતો. આ પત્ર ઈઝરાયલના રાજદૂતના નામે લખવામાં આવ્યો છે. તેમાં એક ધ્વજ લપેટાયેલો છે. આ પત્ર પોલીસના કબજામાં છે.

પોલીસે કહ્યું- કોઈ વિસ્ફોટકો મળ્યા નથી
ન્યૂઝ એજન્સી પીટીઆઈ અનુસાર, દિલ્હી પોલીસે કહ્યું છે કે આ વિસ્તારમાં કોઈ વિસ્ફોટકો મળ્યા નથી. દિલ્હી પોલીસને મંગળવારે સાંજે ફોન પર માહિતી મળી હતી કે ઇઝરાયલ એમ્બેસી પાસે વિસ્ફોટ થયો છે. દિલ્હી ફાયર સર્વિસ અનુસાર, આ કોલ સાંજે 5.47 વાગ્યે આવ્યો હતો. આ કોલ પોલીસ કંટ્રોલ રૂમમાં ટ્રાન્સફર કરવામાં આવ્યો હતો. બાદમાં પોલીસ અને ફાયર વિભાગના અધિકારીઓ ઘટના સ્થળે પહોંચ્યા હતા.

એમ્બેસીએ શું કહ્યું
ઇઝરાયલી દૂતાવાસના પ્રવક્તા ગાય નીરે ન્યૂઝ એજન્સી રોઇટર્સને જણાવ્યું હતું કે મંગળવારે સાંજે લગભગ 5.20 વાગ્યે દૂતાવાસની નજીક ‘વિસ્ફોટ’ થયો હતો. અમારો સ્ટાફ સંપૂર્ણપણે સુરક્ષિત છે. હું આ સમયે ફરજ પર હતો. અમે એક મોટો અવાજ સાંભળ્યો. જ્યારે હું બહાર આવ્યો ત્યારે મેં જોયું કે એક ઝાડના ઉપરના ભાગેથી ધુમાડો નીકળતો હતો. પોલીસે મારું નિવેદન નોંધ્યું છે.

પ્રવક્તા ગાય નીરે બાદમાં મીડિયાને કહ્યું- હા, એક ઘટના બની છે. અત્યારે ચોક્કસપણે કહી ન શકું કે આ (અવાજ) કેવી રીતે આવ્યો. પોલીસ અને અમારી સુરક્ષા ટીમ તપાસ કરી રહી છે. ઈઝરાયલના વિદેશ મંત્રાલયે કહ્યું- સ્ટાફને કોઈ નુકસાન થયું નથી. બંને દેશોની એજન્સીઓ તપાસ કરી રહી છે.

એક પ્રત્યક્ષદર્શીએ પણ વિસ્ફોટનો અવાજ સાંભળ્યો હોવાનો દાવો કર્યો છે.

દિલ્હી પોલીસના સ્પેશિયલ સેલે પણ એમ્બેસીની આસપાસ તપાસ કરી છે.

આ પહેલી ઘટના નથી
7 ઓક્ટોબરે ગાઝાના આતંકવાદી સંગઠન હમાસે ઈઝરાયલમાં ઘૂસીને 1200 લોકોની હત્યા કરી હતી. આ પછી ઈઝરાયલે ગાઝા પર હુમલો કર્યો. આ યુદ્ધ હજુ પણ ચાલુ છે. અહેવાલો અનુસાર, યુદ્ધમાં અત્યાર સુધીમાં લગભગ 16 હજાર પેલેસ્ટિનિયન માર્યા ગયા છે.

2021માં આ જ દૂતાવાસની બહાર ઓછી તીવ્રતાનો વિસ્ફોટ થયો હતો. જેમાં ત્રણ કારને નુકસાન થયું હતું. NIA હજુ પણ તેની તપાસ કરી રહી છે. ત્યારબાદ વિસ્ફોટ બાદ ઈઝરાયલે ઈરાન પર ષડયંત્રનો આરોપ લગાવ્યો હતો. સ્થળ પરથી એક પત્ર મળી આવ્યો હતો. કહેવાય છે કે આ ઈરાની કમાન્ડર કાસિમ સુલેમાનીની હત્યાનો બદલો છે.