હસીનાએ કહ્યું- બાંગ્લાદેશીઓના જીવ બચાવવા રાજીનામું આપ્યું: કહ્યું- જો મેં અમેરિકાને સેન્ટ માર્ટિન આઈલેન્ડ આપ્યો હોત તો સત્તા ન જાત, હું બાંગ્લાદેશ પરત ફરીશ

બાંગ્લાદેશના વડાપ્રધાન પદેથી રાજીનામું આપ્યાના છ દિવસ બાદ શેખ હસીનાએ કહ્યું છે કે અમેરિકાને સેન્ટ માર્ટિન આઈલેન્ડ ન આપવાને કારણે તેમની સરકાર પડી ગઈ છે.

ઈકોનોમિક ટાઈમ્સ અનુસાર, હસીનાએ તેના નજીકના સહયોગીઓને કહ્યું, “હું કટ્ટરવાદી હિંસાને કારણે મૃત્યુઆંક વધવા દેવા માગતી ન હતી. તેઓ વિદ્યાર્થીઓના મૃતદેહો દ્વારા સત્તા મેળવવા માગતા હતા. પરંતુ મેં પદ છોડીને આવું ન થવા દીધું.

હસીનાએ કહ્યું, “હું સેન્ટ માર્ટિન આઇલેન્ડ અને બંગાળની ખાડીને અમેરિકન નિયંત્રણમાં આપીને મારી ખુરસી બચાવી શકી હોત. હું દેશવાસીઓને કટ્ટરવાદીઓથી ગેરમાર્ગે ન આવવાની અપીલ કરું છું. અલ્લાહની કૃપાથી હું ટૂંક સમયમાં બાંગ્લાદેશ પરત ફરીશ.”

વિદ્યાર્થીઓના આંદોલન વિશે વાત કરતા હસીનાએ કહ્યું, “મેં તેમને ક્યારેય રઝાકર નથી કહ્યા. દેશમાં અસ્થિરતા લાવવા માટે મારા શબ્દોનો ખોટો અર્થ કાઢવામાં આવ્યો છે. બાંગ્લાદેશના લોકોની નિર્દોષતાનો લાભ લઈને આ ષડયંત્ર રચવામાં આવ્યું છે.” રાજીનામા બાદ આ પહેલીવાર છે જ્યારે હસીનાએ આ મામલે કોઈ નિવેદન આપ્યું છે.

આ ફૂટેજ 5 ઓગસ્ટના છે, જ્યારે શેખ હસીનાએ હિંસા વચ્ચે બાંગ્લાદેશ છોડી દીધું હતું.

હસીનાએ કહ્યું હતું- અમેરિકા બાંગ્લાદેશ પાસેથી સેન્ટ માર્ટિન આઇલેન્ડની માગ કરી રહ્યું છે
અગાઉ જૂન 2021માં બંગાળી અખબારોમાં દાવો કરવામાં આવ્યો હતો કે અમેરિકા બાંગ્લાદેશ પાસેથી સેન્ટ માર્ટિન ટાપુની માગ કરી રહ્યું છે. તે અહીં મિલિટ્રી બેઝ બનાવવા માગે છે. આ પછી બાંગ્લાદેશ વર્કર્સ પાર્ટીના અધ્યક્ષ રાશિદ ખાન મેનને પણ સંસદમાં કહ્યું કે અમેરિકા સેન્ટ માર્ટિન દ્વીપને હસ્તગત કરવા માગે છે અને તેમના પર ક્વાડનો સભ્ય બનવા માટે દબાણ કરી રહ્યું છે.

બાંગ્લાદેશની રાજનીતિમાં આટલો બધો ખળભળાટ મચાવનાર સેન્ટ માર્ટિન આઇલેન્ડ માત્ર 3 ચોરસ કિમીનો ટાપુ છે. મ્યાનમારથી તેનું અંતર માત્ર 5 માઈલ છે. જૂન 2023માં પીએમ હસીનાએ કહ્યું હતું કે જો વિપક્ષી બીએનપી પાર્ટી સત્તામાં આવશે તો તેઓ સેન્ટ માર્ટિનને વેચી દેશે.

બાંગ્લાદેશના 52 જિલ્લામાં હિંદુઓ પર 205 હુમલા
બાંગ્લાદેશમાં હિંસા વચ્ચે હિન્દુ સમુદાય પર હુમલા વધી રહ્યા છે. અત્યાર સુધીમાં 52 જિલ્લામાં હિંદુઓ પર હુમલાના 205 કેસ નોંધાયા છે. શનિવારે બાંગ્લાદેશની વચગાળાની સરકારના વડા મુહમ્મદ યુનુસે તેની નિંદા કરી હતી.

તેમણે કહ્યું, “લઘુમતીઓ પર હુમલા એ જઘન્ય અપરાધ છે. બાંગ્લાદેશમાં રહેતા હિન્દુ, ખ્રિસ્તી અને બૌદ્ધ સમુદાયના લોકોની સુરક્ષા કરવી દેશના યુવાનોની ફરજ છે.”

મોહમ્મદ યુનુસે 8 ઓગસ્ટે વચગાળાની સરકારના વડા તરીકે શપથ લીધા હતા.

યુનુસે કહ્યું- બાંગ્લાદેશ યુવાનોના હાથમાં છે
યુનુસે કહ્યું કે બાંગ્લાદેશ હવે યુવાનોના હાથમાં છે. બાંગ્લાદેશી મીડિયા ડેઈલી સ્ટાર અનુસાર, શનિવારે હજારો હિન્દુ પ્રદર્શનકારીઓએ ઢાકા અને ચિત્તાગોંગમાં રસ્તાઓ બ્લોક કરી દીધા હતા. તેઓએ તેમના ઘરો, દુકાનો અને મંદિરો પર હુમલાનો વિરોધ કર્યો.

આ દરમિયાન પ્રદર્શનકારીઓએ ‘હિંદુઓની સુરક્ષા કરો’, ‘અમને ન્યાય જોઈએ છે’ અને ‘દેશ તમામ નાગરિકોનો છે’ જેવા નારા પણ લગાવ્યા હતા. તેમણે પૂછ્યું કે હિંદુ ઘરો અને મંદિરો કેમ લૂંટાઈ રહ્યા છે? મીડિયા રિપોર્ટ્સ અનુસાર, શેખ હસીનાના રાજીનામા બાદ તેમની પાર્ટી અવામી લીગના બે હિન્દુ નેતાઓની હત્યા કરવામાં આવી છે.