નવી દિલ્હી4 કલાક પેહલા
- કૉપી લિંક
ભારતની કેન્દ્રીય તપાસ એજન્સી એન્ફોર્સમેન્ટ ડિરેક્ટોરેટ (ED)ને શંકા છે કે કેનેડા મારફતે અમેરિકામાં ભારતીયોની માનવ તસ્કરી કરવામાં આવી રહી છે. EDને આ કેસમાં કેનેડાની 260 કોલેજોની પણ શંકાસ્પદ ભૂમિકા મળી છે. EDએ બુધવારે કહ્યું કે, આ ગુનો આંતરરાષ્ટ્રીય સિન્ડિકેટ દ્વારા કરવામાં આવી રહ્યો છે.
હકીકતમાં, 3 વર્ષ પહેલા 2022માં એક ગુજરાતી પરિવારનું કેનેડા થઈને ગેરકાયદેસર રીતે અમેરિકામાં પ્રવેશ કરતી વખતે મૃત્યુ થયું હતું. તેમને સરહદ પાર લઈ ગયેલા દાણચોરોએ તેમને માઈનસ 37 ડિગ્રી સેલ્સિયસના બરફના તોફાન વચ્ચે છોડી દીધા હતા.
આ મામલે અમદાવાદ પોલીસે FIR નોંધી હતી. આ FIRમાં ભાવેશ અશોકભાઈ પટેલ અને અન્ય કેટલાક લોકો પ્રિવેન્ટિવ મની લોન્ડરિંગ એક્ટ (PMLA) હેઠળ આરોપી હતા. EDની અમદાવાદ પ્રાદેશિક કચેરીએ આ સંદર્ભે 10 અને 19 ડિસેમ્બરે મુંબઈ, નાગપુર, ગાંધીનગર અને વડોદરામાં 8 સ્થળોએ સર્ચ ઓપરેશન હાથ ધર્યું હતું.
EDની તપાસમાં સામે આવ્યું છે કે આ દાણચોરો પહેલા કેનેડાની કોલેજોમાં એડમિશન માટે અરજી કરે છે. આ પછી જ્યારે કોઈ વ્યક્તિ કેનેડા પહોંચે છે ત્યારે તેઓ તેને ગેરકાયદેસર રીતે સરહદ પાર કરાવીને અમેરિકા મોકલી દે છે.
જગદીશ બળદેવભાઈ પટેલ (ઉં.વ.35), પત્ની વૈશાલીબેન (ઉં.વ.33), પુત્રી વિહંગા (ગોપી) (ઉં.વ.12) અને ત્રણ વર્ષના પુત્ર ધાર્મિકનું 2022માં કેનેડા બોર્ડર ક્રોસ કરતી વખતે મૃત્યુ થયું હતું.
પ્રતિ વ્યક્તિ 55થી 60 લાખ રૂપિયા વસૂલે છે તસ્કરો એજન્સીએ કહ્યું કે, આ આરોપીઓ આ બધા કામ માટે પ્રતિ વ્યક્તિ 55થી 60 લાખ રૂપિયા ચાર્જ કરે છે. સર્ચ દરમિયાન એ પણ સામે આવ્યું કે મુંબઈ અને નાગપુરના બે એજન્ટો દર વર્ષે લગભગ 35,000 લોકોને ગેરકાયદેસર રીતે વિદેશ મોકલે છે.
એકલા ગુજરાતમાં 1700 એજન્ટો અને સમગ્ર ભારતમાં 3,500 જેટલા એજન્ટો આ રેકેટમાં સામેલ હતા. તેમની સામે કાર્યવાહી બાદ હજુ પણ 800થી વધુ એજન્ટો આ કામમાં લાગેલા છે. કેનેડાની 260 જેટલી કોલેજો પણ આ રેકેટમાં ભાગ લે છે.
અમેરિકા જવા માટે ડંકી રસ્તો અપનાવે છે લોકો દર વર્ષે હજારો ભારતીયો અમેરિકા, કેનેડા, ઓસ્ટ્રેલિયા, યુકે જવા માટે ગેરકાયદેસર માર્ગ અપનાવે છે. લોકપ્રિય પરિભાષામાં તેને ડંકી રૂટ કહેવામાં આવે છે. ભારતથી અમેરિકાનું અંતર લગભગ 13,500 કિમી છે. હવાઈ માર્ગે અહીં પહોંચવામાં 17 થી 20 કલાકનો સમય લાગે છે. જો કે, ડંકી માર્ગ દ્વારા અંતર 15 હજાર કિમી સુધી પહોંચે છે અને આ મુસાફરીમાં મહિનાઓ લાગે છે.
