કેનેડામાં ખાલિસ્તાન સમર્થક પાર્ટીએ ટ્રુડોથી છેડો ફાડ્યો: અઢી વર્ષથી ગઠબંધન હતું, ચૂંટણીના એક વર્ષ પહેલા જ સરકાર પડી શકે છે

જો કેનેડાના પીએમ જસ્ટિન ટ્રુડો સંસદમાં બહુમત સાબિત કરી શકશે નહીં તો તેમની સરકાર પડી જશે.

કેનેડામાં જસ્ટિન ટ્રુડોની લિબરલ પાર્ટી અને ન્યૂ ડેમોક્રેટિક પાર્ટી (NDP) વચ્ચેનું ગઠબંધન તૂટી ગયું છે. CBC ન્યૂઝ મુજબ, આ લઘુમતીવાળી ટ્રુડો સરકાર પર સંકટના વાદળો ઘેરાવા લાગ્યા છે. હવે તેમણે સત્તામાં રહેવા માટે અન્ય પક્ષોનું સમર્થન મેળવવું પડશે.

NDPના ખાલિસ્તાન સમર્થક નેતા જગમીત સિંહે એક વીડિયો જાહેર કરીને કહ્યું કે તેઓ 2022માં બંને પક્ષો વચ્ચે થયેલા સમજુતીને રદ કરી રહ્યા છે. તેમણે કહ્યું કે લિબરલ પાર્ટી ઉદ્યોગપતિઓ સામે ઝૂકી ગઈ છે. તેઓ પરિવર્તન લાવવા સક્ષમ નથી.

NDPએ 2022માં ટ્રુડો સરકારને સમર્થન આપવાની જાહેરાત કરી હતી. NDP અને લિબરલ પાર્ટી વચ્ચેના કરારને ‘સપ્લાય એન્ડ કોન્ફિડન્સ’ કહેવામાં આવ્યું હતું. કરાર હેઠળ, NDP એ બિલ પસાર થવા દરમિયાન લિબરલ પાર્ટીને ટેકો આપ્યો હતો. બદલામાં, ટ્રુડો સરકારે NDP સંબંધિત પોલિસીઓ લાગુ કરી હતી.

જગમીત સિંહે સોશિયલ મીડિયા પર એક વીડિયો જાહેર કરીને કહ્યું કે તેઓ આ મહિને સરકાર વિરુદ્ધ અવિશ્વાસ પ્રસ્તાવ લાવશે.

ટ્રુડો સરકાર સંસદમાં લઘુમતીમાં છે
જગમીત સિંહે કહ્યું કે પીએમ ટ્રુડોએ લોકોને નિરાશ કર્યા છે. તેઓ હવે બીજી તકને લાયક નથી. તેઓ તેમની સાથે કરેલી સમજુતીને ‘કચરાના ટોપલા’માં ફેંકી દેવાના છે.

ટ્રુડોની પાર્ટીની સંસદમાં 130 બેઠકો છે. પાર્ટીને સત્તામાં રહેવા માટે વધુ 9 બેઠકોની જરૂર છે. અત્યાર સુધી 24 બેઠકો સાથે NDP તેને સમર્થન આપતી હતી. બહુમતી માટે, ટ્રુડોની પાર્ટીને હવે ક્યૂબેક પાર્ટી (32 બેઠકો)ના સમર્થનની જરૂર પડશે.

વિપક્ષી કન્ઝર્વેટિવ પાર્ટી પાસે 119 બેઠકો છે. સર્વે અનુસાર જો ચૂંટણી થાય તો કન્ઝર્વેટિવ પાર્ટીને બહુમતી મળી શકે છે. તેથી, ટ્રુડો સરકારને ચૂંટણી ટાળવાની મજબુરી છે.

કેનેડાના પીએમ જસ્ટિન ટ્રુડોની સરકાર લઘુમતીમાં છે પરંતુ જગમીત સિંહની NDP તેમને સમર્થન આપી રહી હતી.

આ મહિને શરૂ થશે સંસદનું સત્ર, બહુમત સાબિત કરવાનો પડકાર
અહેવાલો અનુસાર, ટ્રુડો સરકાર પોતાની બહુમતી સાબિત કરવા અથવા નવી ચૂંટણીઓ કરાવવાના જોખમમાં નથી, પરંતુ સરકાર પડવાનું જોખમ છે. લિબરલ પાર્ટીએ બજેટ પસાર કરવા અને ચૂંટણી ટાળવા માટે હાઉસ ઓફ કોમન્સમાં અન્ય વિરોધ પક્ષો પાસેથી સમર્થન મેળવવું પડશે.

રિપોર્ટ અનુસાર આ મહિનાના અંતમાં સંસદનું સત્ર શરૂ થશે. જો કોઈપણ પક્ષ સરકાર સામે અવિશ્વાસ પ્રસ્તાવ લાવે છે, તો ટ્રુડો સરકારે તેની બહુમતી સાબિત કરવી પડશે. જો ટ્રુડો સરકાર તેની બહુમતી સાબિત કરા શકશે નહીં તો દેશમાં ઓક્ટોબર 2025 પહેલા ચૂંટણી યોજવામાં આવી શકે છે.

જગમીત સિંહે કહ્યું કે તેઓ આ મહિનાના એન્ડમાં અવિશ્વાસ પ્રસ્તાવ લાવી રહ્યા છે. તેમણે કહ્યું કે તેમની પાર્ટી આગામી ચૂંટણી માટે તૈયાર છે.

જગમીત સિંહ પર ખાલિસ્તાની વિચારધારાને સમર્થન કરવાનો આરોપ છે. આ તસવીર સોશિયલ મીડિયા પર વાયરલ થઈ છે.

જગમીત સિંહને ભારતે વિઝા આપ્યા નથી
જગમીત સિંહ 2017થી NDPના ચીફ છે. કેનેડાની પાર્ટીની કમાન સંભાળનાર તેઓ પ્રથમ નેતા છે. તેનો જન્મ 1979માં કેનેડાના ઓન્ટારિયોમાં થયો હતો. તેમના માતા-પિતા વધુ સારા જીવનની શોધમાં પંજાબથી કેનેડા આવ્યા હતા. અહેવાલો અનુસાર, જગમીત 2011માં સંસદ સભ્ય બન્યા હતા.

ભારતે 2013માં જગમીત સિંહને વિઝા આપવાનો ઇનકાર કર્યો હતો. તેના પર ભારત વિરોધી પ્રવૃત્તિઓમાં સામેલ હોવાનો અને કટ્ટરપંથીઓ સાથે સંબંધ હોવાનો આરોપ હતો.

વિઝા રદ થયા પછી, જગમીત સિંહે આરોપ લગાવ્યો કે 1984થી શીખ વિરોધી રમખાણોના પીડિતો માટે અવાજ ઉઠાવવા બદલ સરકાર તેમનાથી નારાજ છે. તેમણે દાવો કર્યો હતો કે તેને પંજાબમાં ‘શીખ ઓફ ધ યર’થી સન્માનિત કરવા માટે બોલાવવામાં આવ્યા હતા.

કેનેડિયન વેબસાઈટ ગ્લોબ એન્ડ મેઈલ અનુસાર, જગમીત સિંહે જૂન 2015માં સાન ફ્રાન્સિસ્કોમાં ખાલિસ્તાનના સમર્થનમાં એક રેલીમાં ભાગ લીધો હતો. તેમને ભિંડરાવાલાના પોસ્ટર સાથે સ્ટેજ પર બોલતા સાંભળવામાં આવ્યા હતા. આ દરમિયાન જગમીતે ભારત સરકાર પર શીખોના નરસંહારનો આરોપ લગાવ્યો હતો.

આ સમાચાર પણ વાંચો…

કેનેડાની સંસદમાં આતંકવાદી નિજ્જર માટે મૌન રાખવામાં આવ્યું: શ્રદ્ધાંજલિ આપવામાં આવી હતી​​​​​​​

મંગળવારે (18 જૂન) કેનેડાની સંસદમાં ખાલિસ્તાની આતંકવાદી હરદીપ સિંહ નિજ્જરને તેની હત્યાના એક વર્ષ પૂર્ણ થવા પર શ્રદ્ધાંજલિ આપવામાં આવી હતી. આ માટે સંસદમાં એક મિનિટનું મૌન પાળવામાં આવ્યું હતું. કેનેડાના હાઉસ ઓફ કોમન્સમાં, પ્રથમ સ્પીકર, ગ્રેગ ફર્ગ્યુસે શોક સંદેશ વાંચ્યો અને ત્યારબાદ તમામ સાંસદોને નિજ્જર માટે મૌન પાળવાનું કહેવામાં આવ્યું હતું.