બેઇજિંગ10 મિનિટ પેહલા
- કૉપી લિંક
ચીને વર્ષ 2024 માટે તેના સંરક્ષણ બજેટમાં 7.2 ટકાનો વધારો કર્યો છે. તે હવે વધારીને 19.61 લાખ કરોડ રૂપિયા કરવામાં આવ્યું છે. જ્યારે ભારતનું સંરક્ષણ બજેટ 6.21 લાખ કરોડ રૂપિયા છે. એટલે કે ચીનનું સંરક્ષણ બજેટ ભારતના કરતાં લગભગ ત્રણ ગણું વધારે છે. ચીને સંરક્ષણ બજેટમાં એવા સમયે વધારો કર્યો છે જ્યારે તેની અર્થવ્યવસ્થા ખૂબ જ ખરાબ તબક્કામાંથી પસાર થઈ રહી છે.
2024 માટે ચીનનો સંરક્ષણ ખર્ચ પાંચ વર્ષમાં સૌથી વધુ છે. ચીને આ વર્ષ માટે આર્થિક વૃદ્ધિનો લક્ષ્યાંક 5% રાખ્યો છે. મંગળવારે સંસદમાં બજેટ સંબંધિત રિપોર્ટ શેર કરતી વખતે ચીને પણ તાઈવાન મામલે કડક વલણ અપનાવ્યું હતું. તેણે તાઈવાન માટે શાંતિપૂર્ણ એકીકરણ (તાઈવાનને ચીનમાં સામેલ કરવું) શબ્દ દૂર કર્યો છે.
ચીનના રાષ્ટ્રપતિ શી જિનપિંગના કાર્યકાળ દરમિયાન સંરક્ષણ ખર્ચમાં મોટો વધારો થયો છે. વર્ષ 2013માં તે 8.45 લાખ કરોડ રૂપિયા હતો જે હવે વધીને 19.61 લાખ કરોડ રૂપિયા પર પહોંચી ગયો છે. આ સાથે, આ સતત 30મું વર્ષ છે જ્યારે ચીને તેના સંરક્ષણ બજેટમાં વધારો કર્યો છે. જો કે ચીનની સેનાનું બજેટ હજુ પણ અમેરિકાના બજેટ કરતા 54 લાખ કરોડ રૂપિયા ઓછું છે.
આ તસવીર ચીનની નેશનલ પીપલ્સ કોંગ્રેસ (સંસદ)ની છે. અહીં મંગળવારે વડાપ્રધાન લી કિયાંગે સંરક્ષણ બજેટ સંબંધિત અહેવાલ રજૂ કર્યો હતો.
જિનપિંગે વર્ષ 2027 સુધીમાં ચીનની સેનાને વર્લ્ડ ક્લાસ બનાવવાનું લક્ષ્ય રાખ્યું છે
રિસર્ચ અહેવાલોમાં દાવો કરવામાં આવી રહ્યો છે કે આ વખતના સંરક્ષણ બજેટનો સૌથી મોટો હિસ્સો નવા સાધનો પર ખર્ચવામાં આવશે. જિનપિંગે વર્ષ 2035 સુધીમાં પોતાની સેનાને સંપૂર્ણપણે આધુનિક બનાવવાનું લક્ષ્ય રાખ્યું છે. ચીનની સેનાને 2027 સુધીમાં વિશ્વ કક્ષાની સેના બનાવવાનું લક્ષ્ય પણ નક્કી કરવામાં આવ્યું છે.
અગાઉ વર્ષ 2023માં તાઈવાન અને દક્ષિણ ચીન સાગરને લઈને અમેરિકા સાથે વધી રહેલા વિવાદ વચ્ચે ચીને તેના સંરક્ષણ બજેટમાં 4.2%નો વધારો કર્યો હતો. આ પછી ચીન સંરક્ષણ બજેટ પર ખર્ચ કરનાર દુનિયાનો બીજો સૌથી મોટો દેશ બની ગયો છે.
ચીને કહ્યું હતું- ભારત આપણા હથિયારો સાથે મુકાબલો કરી શકશે નહીં
અમેરિકા અને ચીન પછી ભારત સૈન્ય પર ખર્ચ કરનાર વિશ્વનો ત્રીજો સૌથી મોટો દેશ છે. સ્ટોકહોમ ઈન્ટરનેશનલ પીસ રિસર્ચ ઓર્ગેનાઈઝેશન (SIPRI)ના રિપોર્ટ અનુસાર, ભારતે 2022માં પોતાની સેના પર 76.6 બિલિયન ડોલર એટલે કે 6 લાખ કરોડ રૂપિયાનો ખર્ચ કર્યો છે. જે 2020 કરતા 0.9% અને 2012 કરતા 33% વધુ છે. 2023માં ભારતના સંરક્ષણ બજેટમાં રૂ. 69 કરોડનો વધારો કરવામાં આવ્યો હતો.
અગાઉ જૂન 2023માં ચીની સેનાના રાજદ્વારીઓએ કહ્યું હતું કે ભારત ચીનને પડકારી શકે નહીં. ભારતે તેની સેનાનું આધુનિકીકરણ કર્યું નથી એટલે કે તેને સમય પ્રમાણે વધુ સારી બનાવી નથી. અધિકારીઓએ કહ્યું- ચીનના સંરક્ષણ ઉદ્યોગ અને મેન્યુફેક્ચરિંગની તુલનામાં ભારત હજુ પણ ઘણું પાછળ છે. તેમને આપણા જેટલા સારા બનવામાં દાયકાઓ લાગી જશે.
ચીની અધિકારીઓનો સવાલ- શું ભારતે પોતે કોઈ હથિયાર બનાવ્યું છે?
ચીનની સેનાની એકેડેમી ઓફ મિલિટરી સાયન્સના વરિષ્ઠ કર્નલ ઝાઓ શિયાઓઝુઓએ કહ્યું હતું – જો તમે ભારતીય સેનાની સૈન્ય સિસ્ટમ પર નજર નાખો તો ભાગ્યે જ કોઈ ટેન્ક, એરક્રાફ્ટ અથવા યુદ્ધ જહાજ ભારતે પોતે બનાવેલું છે.
તેમજ, અન્ય એક અધિકારી, વરિષ્ઠ કર્નલ ઝાંગ ચીએ કહ્યું હતું કે – ભારતે સુપર પાવર બનવા માટે તેની સેનાને આધુનિક બનાવવામાં કોઈ કસર છોડી નથી, પરંતુ તેમ છતાં તે ચીન-ભારત સંબંધોને અસર કરશે નહીં.
