3 મિનિટ પેહલા
- કૉપી લિંક
સાઉદી અરેબિયામાં કામ કરતા 27 વર્ષીય ભારતીય નાગરિક મોહમ્મદ શહેઝાદ ખાનનું અવસાન થયું છે. તેલંગાણાનો રહેવાસી શહેઝાદ સાઉદીના રણ રુબ-અલ ખલીમાં ફસાઈ ગયો હતો. તે વિશ્વની સૌથી ખતરનાક જગ્યાઓમાંથી એક હોવાનું કહેવાય છે.
મીડિયા રિપોર્ટ્સ અનુસાર, શહેઝાદ સુદાનના એક મિત્ર સાથે આ વિસ્તારમાંથી પસાર થઈ રહ્યો હતો. રસ્તામાં તેનું GPS સિગ્નલ ફેઈલ થઈ ગયું. થોડા સમય પછી તેમની કારનું તેલ અને ફોનની બેટરી પણ ખતમ થઈ ગઈ, જેના કારણે તે કોઈની મદદ માગી શક્યો નહીં.
શહેઝાદ અને તેનો મિત્ર લાંબા સમય સુધી પાણી કે ખોરાક વિના રણની આકરી ગરમીમાં ફસાયેલા રહ્યા. ભૂખ અને તરસને કારણે તેમની તબિયત લથડી અને બંનેનું મૃત્યુ થયું. શેહઝાદ અને તેના મિત્રના મૃતદેહ ચાર દિવસ પછી 22 ઓગસ્ટના રોજ રણમાં તેમની બાઇક પાસે મળી આવ્યા હતા. શહેઝાદ છેલ્લા ત્રણ વર્ષથી સાઉદી અરેબિયામાં એક ટેલિકોમ્યુનિકેશન કંપનીમાં કામ કરતો હતો.
રુબ અલ-ખલી એ અરબી રણનો સૌથી મોટો ભાગ છે. તે 650 કિલોમીટર સુધી વિસ્તરે છે.
રુબ-અલ-ખલી રણ એ વિશ્વના સૌથી સૂકા વિસ્તારોમાંનો એક
રુબ અલ ખલીને ખાલી રણ પણ કહેવામાં આવે છે. તે અરબી રણનો સૌથી મોટો ભાગ છે, જે રાજ્યના કુલ વિસ્તારના ચોથા ભાગનો હિસ્સો ધરાવે છે. રૂબ-અલ-ખલી 650 કિલોમીટર સુધી વિસ્તરે છે. તે સાઉદી અરેબિયાના દક્ષિણ ભાગ અને ઓમાન, યુએઈ અને યમન જેવા પડોશી દેશો સુધી વિસ્તરે છે.
રુબ અલ-ખલી એ વિશ્વના સૌથી સૂકા વિસ્તારોમાંનો એક છે. તેના મોટા ભાગની હજુ સુધી શોધ થઈ નથી. આ રણમાં રેતીની નીચે પેટ્રોલિયમનો વિશાળ ભંડાર છે. 1948 માં આ રણના ઉત્તર-પૂર્વ વિસ્તારમાં અલ-ઘાવરમાં વિશ્વનો સૌથી મોટો પરંપરાગત તેલ ભંડાર મળી આવ્યો હતો. સાઉદી અરેબિયાની રાજધાની રિયાધથી 260 કિમી દૂર અલ-ગવરમાં અબજો બેરલ તેલ મોજુદ છે.
