Related posts
ટેલ અવીવ10 મિનિટ પેહલા
- કૉપી લિંક
ઇઝરાયલ ડિફેન્સ ફોર્સિસ (IDF)ના ચીફ લેફ્ટનન્ટ જનરલ હેર્જી હાલેવીએ કહ્યું છે કે ગાઝામાં હમાસ વિરુદ્ધ યુદ્ધ ઘણાં મહિનાઓ સુધી ચાલશે. આ દરમિયાન અલ માયાદીનના અહેવાલ મુજબ ઇઝરાયલી સૈનિકો ગાઝામાં માર્યા ગયેલા પેલેસ્ટિનિયનોનાં મૃતદેહોની ચોરી કરી રહ્યા છે. સૈનિકો આ મૃતદેહોમાંથી કિડની, લીવર, હૃદય જેવા અંગો પણ ચોરી રહ્યા છે.
યુરો-મેડિટેરેનિયન હ્યુમન રાઈટ્સ મોનિટરને ટાંકીને અલ માયાદીનના રિપોર્ટમાં કહેવામાં આવ્યું છે કે- ઇઝરાયલની સેનાએ 80 પેલેસ્ટાઈનીઓનાં મૃતદેહની ચોરી કરી અને તેમને -40 ડિગ્રી સેલ્સિયસ તાપમાનમાં રાખ્યા જેથી તેમના અંગો કાઢી શકાય.
હ્યુમન રાઈટ્સ મોનિટરે દાવો કર્યો છે કે ઇઝરાયલમાં પેલેસ્ટિનિયનોનાં મૃતદેહો જપ્ત કરવા કાયદેસર છે. હ્યુમન રાઈટ્સ મોનિટરનું કહેવું છે કે 2021 સુધી ઇઝરાયલમાં એક કાયદો પસાર કરવામાં આવ્યો હતો જે ઇઝરાયલના સૈનિકોને પેલેસ્ટિનિયનોનાં મૃતદેહ જપ્ત કરવાનો અધિકાર આપે છે. જે બાદ ઇઝરાયલની મેડિકલ સ્કૂલોમાં આ મૃતદેહો અને અંગો પર પ્રયોગો કરવામાં આવે છે.
આ પહેલા પણ ઇઝરાયલની સેના પર પેલેસ્ટાઈનીઓનાં મૃતદેહોને બુલડોઝરથી કચડી નાખવાનો અને ગાઝાના કબ્રસ્તાનોને ટેન્ક વડે નષ્ટ કરવાનો આરોપ છે.
યુદ્ધની 4 તસવીરો…
ઇઝરાયલે મંગળવારે 80 પેલેસ્ટાઈનનાં મૃતદેહ ગાઝા મોકલ્યા હતા. બુધવારે સવારે તેમની દફનવિધિ કરવામાં આવી હતી. એવું કહેવામાં આવી રહ્યું છે કે શરીરના ઘણા અંગો ગાયબ છે. ઇઝરાયલી સેનાનું કહેવું છે કે તેમને શંકા છે કે આ મૃતદેહો બંધકોના છે.
ઈઝરાયેલના સતત હુમલા વચ્ચે પેલેસ્ટિનિયનો સુરક્ષિત સ્થળોએ પહોંચી રહ્યા છે.
તેલ અવીવમાં લોકો બંધકોની મુક્તિ માટે સતત વિરોધ કરી રહ્યા છે.
રાફામાં લોકો કાટમાળ નીચે દટાયેલા તેમના સામાનને શોધી રહ્યા છે.
7 ઓક્ટોબરથી શરૂ થયેલા યુદ્ધમાં અત્યાર સુધીમાં 21 હજારથી વધુ પેલેસ્ટિનિયન માર્યા ગયા છે. હમાસના હુમલામાં 1200 ઇઝરાયલી નાગરિકોનાં મોત થયા હતા.
હમાસ સાથેનું યુદ્ધ ઘણાં મહિનાઓ સુધી ચાલશે
IDF ચીફ લેફ્ટનન્ટ જનરલ હેર્જી હાલેવીના જણાવ્યા અનુસાર, IDF મધ્ય અને દક્ષિણ ગાઝામાં હમાસને ખતમ કરવાની ખૂબ નજીક છે અને હવે ઉત્તરી ગાઝામાં ઓપરેશન વધુ તીવ્ર કરવામાં આવ્યું છે.
મંગળવારે રાત્રે પ્રેસ કોન્ફરન્સમાં IDF ચીફે કહ્યું- હું ફરી સ્પષ્ટ કરવા માગુ છું કે આ યુદ્ધ ઘણા મહિનાઓ સુધી ચાલશે. હું હમણાં જ ગાઝાથી પાછો ફર્યો છું. ત્યાં હું અમારા સૈનિકોને મળ્યો. આપણા સૈનિકો જે રીતે યુદ્ધ લડી રહ્યા છે તેનાથી હું ખૂબ જ ખુશ છું. તેઓ તેમના માટે નિર્ધારિત લક્ષ્યોને હાંસલ કરી રહ્યા છે. IDF ઉત્તર ગાઝામાં હમાસને પણ ખતમ કરશે.
હાલેવીએ આગળ કહ્યું- અમે હમાસના ઘણા આતંકવાદીઓ અને કમાન્ડરોને મારી નાખ્યા છે. કેટલાક એવા છે જેમણે આત્મસમર્પણ કર્યું છે. આ સિવાય સેંકડો લોકોની અટકાયત પણ કરવામાં આવી છે. અમારા વિશેષ એકમોએ ગાઝામાં ભૂગર્ભ ઈન્ફ્રાસ્ટ્રક્ચર અને શસ્ત્રોનો નાશ કર્યો છે.
હાલેવીએ કહ્યું- તે ગાઢ શહેરી વિસ્તારોમાં મુશ્કેલી આવી રહી છે, જ્યાં આતંકવાદીઓ સામાન્ય લોકો જેવા દેખાય છે. તેથી હું એમ ન કહી શકું કે અમે હમાસના તમામ આતંકવાદીઓને મારી નાખ્યા છે. તેથી જ આપણે હજી પણ ત્યાં યુદ્ધ લડવાનું છે. આ માટે ઘણી પદ્ધતિઓનો ઉપયોગ કરવામાં આવે છે. હું એક વાતની ખાતરી આપી શકું છું કે હવે હમાસ ક્યારેય ઇઝરાયલ પર 7 ઓક્ટોબરની જેમ હુમલો કરી શકશે નહીં.
ઇઝરાયલના હુમલા બાદ ઉત્તર ગાઝામાંથી પણ લોકોએ હિજરત શરૂ કરી દીધી છે.
નેતન્યાહુના સલાહકાર અમેરિકા જવા રવાના થયા
ઇઝરાયલના વડાપ્રધાન બેન્જામિન નેતન્યાહુના સૌથી નજીકના સલાહકાર રોન ડેર્મિર મંગળવારે અમેરિકા જવા રવાના થયા છે. એવું માનવામાં આવે છે કે તેઓ કોઈ ખાસ કારણસર અમેરિકા ગયા છે. ‘ન્યૂયોર્ક ટાઇમ્સ’ અનુસાર, રોન આ અઠવાડિયે અમેરિકામાં રાષ્ટ્રપતિ જો બાઇડનના વહીવટીતંત્રના ટોચના અધિકારીઓને મળશે.
એક રિપોર્ટ અનુસાર, રોન હમાસ વિરુદ્ધ યુદ્ધમાં અમેરિકા અને ઇઝરાયલ વચ્ચેના તમામ મતભેદો પર ચર્ચા કરીને ઉકેલ શોધવાનો પ્રયાસ કરશે. યુદ્ધ સમાપ્ત થયા પછી ગાઝા પર કોણ શાસન કરશે તે પણ એક મુદ્દો છે. અમેરિકા ઇઝરાયલ પર હુમલા ઘટાડવા માટે સતત દબાણ કરી રહ્યું છે. આ સિવાય નાગરિકોને નુકસાન ન થાય તેની કાળજી લેવી જોઈએ.
સમસ્યા એ છે કે IDF અને નેતન્યાહુ સતત કહી રહ્યા છે કે ગાઝામાં યુદ્ધ ત્યારે જ અટકશે જ્યારે હમાસાને ખતમ કરવામાં આવશે. ઇઝરાયલે એમ પણ કહ્યું છે કે તે યુદ્ધ બાદ ગાઝાને પોતાના નિયંત્રણમાં રાખશે. આ મામલે અમેરિકામાં ભારે વિરોધ થઈ રહ્યો છે.
ઇઝરાયલે સ્પષ્ટ કર્યું છે કે તે હવે યુએન કર્મચારીઓ માટે ઓટોમેટિક વિઝા સિસ્ટમ બંધ કરી રહ્યું છે. હવે વિઝા પ્રાયોરિટીના આધારે જ આપવામાં આવશે.
UNને ઓછા વિઝા મળશે
યુદ્ધની વચ્ચે પહેલીવાર ઇઝરાયલે સ્પષ્ટ કહ્યું કે તે હવે યુએન કર્મચારીઓ માટે ઓટોમેટિક વિઝા સિસ્ટમ બંધ કરવા જઈ રહ્યું છે. માનવામાં આવે છે કે આ પછી ઇઝરાયલ અને યુએન વચ્ચે નવો તણાવ ઉભો થઈ શકે છે.
ઇઝરાયલે કહ્યું છે કે તે હવે યુએનના કર્મચારીઓને ‘કેસ બાય કેસ’ એટલે કે પ્રાથમિકતાના આધારે વિઝા આપશે. બંને વચ્ચેના તણાવનું સાચું કારણ યુએન તરફથી યુદ્ધવિરામની સતત માંગ છે. ઇઝરાયલે જવાબમાં કહ્યું હતું – 7 ઓક્ટોબરે જ્યારે 1200 ઇઝરાયલી નાગરિકો માર્યા ગયા ત્યારે યુએન ક્યાં હતું? આનો પણ જવાબ હોવો જોઈએ.
