4 મિનિટ પેહલા
- કૉપી લિંક
ઇઝરાયલની સેનાએ આજે સવારે લેબનનના રામિયામાં સંયુક્ત રાષ્ટ્રના બેઝ પર હુમલો કર્યો છે. ઇઝરાયલી સેનાની બે ટેન્ક બેઝનો મુખ્ય દરવાજો તોડીને કોમ્પ્લેક્સની અંદર પ્રવેશી હતી. આ ઘટના સવારે સાડા ચાર વાગ્યાની આસપાસ બની હતી.
જ્યારે ઇઝરાયલની ટેન્ક બેઝમાં પ્રવેશી ત્યારે બેઝ પર હાજર પીસકીપર્સ આશ્રયસ્થાનોમાં હાજર હતા. જ્યારે શાંતિ સૈનિકોએ વિરોધ કર્યો, ત્યારે ઇઝરાયલી સૈનિકો 45 મિનિટ પછી બેઝ છોડી ગયા. બેઝથી 100 મીટર દૂર ફાયરિંગ પણ થયું, જ્યાંથી ભારે ધુમાડો નીકળી રહ્યો હતો. આ ધુમાડો બેઝમાં પ્રવેશી રહ્યો હતો, જેના કારણે 15 શાંતિ રક્ષકોને આંખોમાં બળતરા અને શ્વાસની સમસ્યાનો સામનો કરવો પડ્યો હતો.
ઈઝરાયલ ઈરાનના સૈન્ય મથકો પર હુમલો કરી શકે છે
હિઝબુલ્લાહના ચીફ હસન નસરાલ્લાહના મોતનો બદલો લેવા ઈરાને 1 ઓક્ટોબરે ઈઝરાયલ પર 200 મિસાઈલો છોડી હતી. અમેરિકાને શંકા છે કે ઈઝરાયલ હવે બદલો લેવા ઈરાનના સૈન્ય મથકોને નિશાન બનાવી શકે છે. અમેરિકન મીડિયા હાઉસ NBC એ અમેરિકન અધિકારીઓને ટાંકીને આ માહિતી આપી છે.
રિપોર્ટ અનુસાર, અમેરિકા નથી માનતું કે ઈઝરાયલ જવાબી કાર્યવાહીમાં ઈરાનના પરમાણુ સ્થળોને નિશાન બનાવશે. જોકે, ઈરાનના એનર્જી ઈન્ફ્રાસ્ટ્રક્ચર પર પણ હુમલાની શક્યતાઓ ઊભી થઈ છે. તે જ સમયે ઈરાને અમેરિકા અને મધ્ય પૂર્વના કેટલાક દેશોને કહ્યું છે કે જો ઈઝરાયલ હુમલો કરશે તો તેઓ ચોક્કસ જવાબ આપશે. ઈરાન સાથેના તણાવ વચ્ચે નેતન્યાહુ આજે ફરી કેબિનેટની બેઠક કરશે. જેમાં 1 ઓક્ટોબરે ઈરાનના હુમલાનો જવાબ કેવી રીતે લેવો તેની ચર્ચા કરવામાં આવશે. આ પહેલા શુક્રવારે પણ બેઠક યોજાઈ હતી. જો કે તેમાં કોઈ નિર્ણય લઈ શકાયો ન હતો.
1 ઓક્ટોબરે ઈરાન તરફથી છોડવામાં આવેલી લગભગ તમામ મિસાઈલોને ઈઝરાયલના આયર્ન ડોમ દ્વારા તોડી પાડવામાં આવી હતી.
હિઝબુલ્લાહ આતંકીઓએ આત્મસમર્પણ કર્યું ઇઝરાયલી સેનાએ દક્ષિણ લેબેનનમાં ભૂગર્ભ બંકરમાંથી હિઝબુલ્લાહના એક ફાઇટરને પકડવાનો દાવો કર્યો છે. IDF અનુસાર, તેની પાસે હથિયારો પણ હતા. તેને પૂછપરછ માટે ઈઝરાયલ લઈ જવામાં આવ્યો છે. હિઝબુલ્લાહ ફાઇટરના શરણાગતિનો એક વીડિયો પણ જાહેર કરવામાં આવ્યો છે, જેમાં તે માત્ર અન્ડરવેરમાં જ જોવા મળી રહ્યો છે.
ઇઝરાયલના હુમલામાં 13 લેબનીઝ લોકો માર્યા ગયા ઇઝરાયલે શનિવારે લેબનનના બે શહેરો પર હુમલો કર્યો હતો. આમાંથી એક ‘બરજા’ બેરૂતથી 32 કિલોમીટર દૂર છે, જ્યાં મોટાભાગે સુન્ની વસ્તી રહે છે. ઈઝરાયલના હુમલામાં અહીં ચાર લોકો માર્યા ગયા હતા. હિઝબુલ્લાહ શિયાઓનું સંગઠન છે, તેથી ઇઝરાયલ અત્યાર સુધી લેબનન યુદ્ધ દરમિયાન શિયા વિસ્તારોને નિશાન બનાવતું હતું.
અમેરિકન મીડિયા હાઉસ સીએનએન અનુસાર, આ પહેલીવાર છે જ્યારે સુન્ની નગરમાં હુમલો થયો છે. તે જ સમયે, ઉત્તરી લેબેનનના માયસરામાં ઇઝરાયલના હુમલામાં 9 લોકોનાં મોત થયા છે. બીજી તરફ, ઈઝરાયલે દાવો કર્યો છે કે હિઝબુલ્લાહે શનિવારે તેમના પર 300 પ્રોજેક્ટાઈલ્સ (નાની મિસાઈલ) છોડી હતી.
ઇઝરાયલના હુમલા બાદ લેબેનોનના સુન્ની નગર બરજામાં લેબનીઝ સૈનિકો તૈનાત કરવામાં આવ્યા
ઇઝરાયલે શનિવારે મોડી રાત્રે બેરૂતમાં શોપિંગ મોલ અને દુકાનોને નિશાન બનાવી હતી.
ભારત ઇઝરાયલ વિરુદ્ધ સંયુક્ત રાષ્ટ્રના નિવેદન માટે સંમત છે યુએન અને 40 દેશોની અપીલ છતાં, લેબનનમાં તૈનાત શાંતિ રક્ષા દળો પર ઇઝરાયલના હુમલા ચાલુ છે. છેલ્લા 2 દિવસમાં 5 જવાનો ઘાયલ થયા છે. આ દરમિયાન ભારતે યુએનમાં કહ્યું છે કે અમે પીસકીપીંગ મિશનમાં સૈનિકો દ્વારા યોગદાન આપતો મહત્ત્વપૂર્ણ દેશ છીએ.
શાંતિ રક્ષકોની સુરક્ષા અત્યંત મહત્ત્વની છે અને યુએનએસસીના ઠરાવો હેઠળ તેની ખાતરી થવી જોઈએ. ભારતે કહ્યું-
અમે 34 દેશોના સંયુક્ત નિવેદનને સમર્થન આપીએ છીએ જેમણે શાંતિ માટે લેબનનમાં સૈનિકો તૈનાત કર્યા છે, સૈનિકોની સુરક્ષાની માગ કરી છે.
અમેરિકી રક્ષા મંત્રી લોયડ ઓસ્ટીને પણ શનિવારે આ મુદ્દે ઈઝરાયલના રક્ષા મંત્રી યોવ ગાલાંટ સાથે વાત કરી અને જલ્દી ઉકેલ લાવવાની માગ કરી.
UNIFIL સૈનિકો ઇઝરાયલ-લેબનન સરહદ પર તૈનાત છે તે વિસ્તારને બ્લુ લાઇન કહેવામાં આવે છે.
