ઇઝરાયલના વડાપ્રધાન બેન્જામિન નેતન્યાહૂનું સંસદમાં ભાષણ: કહ્યું- અમે નાગરિકોનાં બલિદાનને વ્યર્થ નહીં જવા દઈએ; બંધકોના સંબંધીઓએ સૂત્રોચ્ચાર કર્યા

સંસદમાં ઇઝરાયલના વડાપ્રધાન બેન્જામિન નેતન્યાહુના ભાષણ દરમિયાન બંધકોના સંબંધીઓએ સૂત્રોચ્ચાર કર્યા હતા. વાસ્તવમાં નેતન્યાહૂ પોતાના ભાષણમાં કહી રહ્યા હતા કે હમાસ પર દબાણ લાવવા માટે ઇઝરાયલની સેનાને હજુ થોડો સમય જોઇએ છે. આ પછી જ બંધકોને મુક્ત કરી શકાશે. આ દરમિયાન બંધકોના સંબંધીઓએ સૂત્રોચ્ચાર શરૂ કર્યા હતા. તેમણે હમાસ દ્વારા બંધક બનાવાયેલા લોકોને તાત્કાલિક મુક્ત કરવાની માગ કરી હતી.

ઘોંઘાટ વચ્ચે નેતન્યાહુ થોડીવાર માટે શાંત થઈ ગયા. સુરક્ષાકર્મીઓએ લોકોને શાંત કરવાનો પ્રયાસ કર્યો હતો. આ પછી નેતન્યાહુએ કહ્યું- અમે અમારા નાગરિકોના બલિદાનને વ્યર્થ નહીં જવા દઈએ. જ્યાં સુધી આપણે હમાસ પર સંપૂર્ણ વિજય પ્રાપ્ત ન કરીએ ત્યાં સુધી યુદ્ધ સમાપ્ત થશે નહીં.