માલે41 મિનિટ પેહલા
- કૉપી લિંક
મોહમ્મદ મુઈઝુએ પોતાના ચૂંટણી પ્રચારમાં ઈન્ડિયા આઉટનો નારો આપ્યો હતો. તેઓ નવેમ્બર 2023માં દેશના રાષ્ટ્રપતિ બન્યા હતા. (ફાઈલ)
માલદીવ્સના રાષ્ટ્રપતિ મોહમ્મદ મુઈઝ્ઝુએ જાહેરાત કરી છે કે તેઓ ભારત સાથેના હાઈડ્રોગ્રાફિક સર્વે કરારને રિન્યૂ નહીં કરે. તેમણે કહ્યું- માલદીવ્સ પોતે આ સર્વે શરૂ કરવા માટે જરૂરી મશીનો અને ટેક્નોલોજી એકત્રિત કરશે.
આ સિવાય રાષ્ટ્રપતિ મુઈઝ્ઝુએ પણ જાહેરાત કરી કે તેઓ દેશના એક્સક્લૂસિવ ઈકોનોમિક ઝોન (EEZ)નું 24*7 મોનિટરિંગ શરૂ કરશે, જેથી દેશને સુરક્ષિત કરી શકાય. માલદીવે ચીન સાથે સંરક્ષણ કરાર પર હસ્તાક્ષર કર્યાના બે દિવસ બાદ આ જાહેરાત કરી હતી. આ સિવાય રાષ્ટ્રપતિએ કહ્યું કે સમજૂતી હેઠળ માલદીવ્સને ચીન પાસેથી મફત સૈન્ય સામગ્રી (ઓછી જોખમી) અને સૈન્ય તાલીમ મળશે.
માલદીવ્સે સોમવારે ચીન સાથે સંરક્ષણ કરાર પર હસ્તાક્ષર કર્યા છે. આ હેઠળ ચીન મફત લશ્કરી મદદ આપશે.
રાષ્ટ્રપતિ મુઈઝ્ઝુએ કહ્યું- ભારતીય સૈનિકો સાદા કપડામાં પણ માલદીવમાં નહીં રહે
આ પહેલા સોમવારે માલદીવ્સે ચીન સાથે તેના પ્રથમ સંરક્ષણ કરાર પર હસ્તાક્ષર કર્યા હતા. કરાર બાદ રાષ્ટ્રપતિ મુઈઝ્ઝુએ દેશમાં હાજર ભારતીય નાગરિકોને લઈને નિવેદન આપ્યું હતું. તેમણે કહ્યું હતું કે 10 મે પછી માલદીવ્સમાં સાદા કપડામાં પણ ભારતીય સૈનિક નહીં હોય.
મુઈઝ્ઝુએ કહ્યું હતું – કેટલાક લોકો દેશમાં અફવા ફેલાવી રહ્યા છે કે ભારતીય સૈનિકો દેશ છોડીને નથી જઈ રહ્યા, તેઓ ટેક્નિકલ સ્ટાફના બહાને માત્ર પોતાનો યુનિફોર્મ બદલીને સાદા કપડામાં દેશ પરત ફરી રહ્યા છે. હું આ બાબતોને પૂરા વિશ્વાસ સાથે નકારું છું.
હાઇડ્રોગ્રાફિક સર્વે એગ્રીમેન્ટ શું છે?
ખરેખરમાં, ભારત અને માલદીવ્સ વચ્ચેના કરાર હેઠળ, ભારતીય સૈનિકો 10 મે સુધીમાં તેમના દેશ પરત ફરશે. આ સૈનિકોની જગ્યાએ ભારતનો ટેકનિકલ સ્ટાફ માલદીવ્સના રેસ્ક્યુ યુનિટનું સંચાલન કરશે. આ કરારનો પ્રથમ તબક્કો 10 માર્ચ સુધીમાં પૂર્ણ થશે. માલદીવ્સમાં લગભગ 88 ભારતીય સૈનિકો છે. તે બે હેલિકોપ્ટર અને એક એરક્રાફ્ટનું ઓપરેશન સંભાળે છે.
આ પહેલા 15 ડિસેમ્બરે માલદીવ્સે ભારત સાથે હાઈડ્રોગ્રાફિક સર્વે એગ્રીમેન્ટ ખતમ કરવાની જાહેરાત કરી હતી. કરાર 7 જૂન, 2024 ના રોજ સમાપ્ત થશે. માલદીવ ટાપુઓના પાણી પર રિસર્ચ કરવા માટે આ કરાર પર 2019માં હસ્તાક્ષર કરવામાં આવ્યા હતા.
આ કરાર હેઠળ ભારતને માલદીવ્સ ટાપુઓના પાણી, ખડકો,દરિયાકિનારો, દરિયાઈ પ્રવાહો અને ભરતીનો અભ્યાસ કરવાની મંજૂરી આપવામાં આવી હતી. 19 ફેબ્રુઆરી અને 26 ફેબ્રુઆરી 2023ની વચ્ચે, ભારતીય નૌકાદળે માલદીવ્સના રાષ્ટ્રીય સંરક્ષણ દળ સાથે ત્રીજો સંયુક્ત હાઇડ્રોગ્રાફિક સર્વે હાથ ધર્યો હતો. પહેલો સર્વે માર્ચ 2021માં અને બીજો સર્વે મે 2022માં કરવામાં આવ્યો હતો.
2 વર્ષ પહેલા માલદીવ્સમાં ‘ઇન્ડિયા આઉટ’ અભિયાન શરૂ થયું હતું
મોહમ્મદ મુઈઝ્ઝુએ 2023ની રાષ્ટ્રપતિની ચૂંટણીમાં મોહમ્મદ સોલિહ સામે પોતાનો દાવો રજૂ કર્યો હતો. તેમણે માલદીવ્સમાં ભારતીય સેનાની કથિત હાજરી સામે ‘ઈન્ડિયા આઉટ’ ના નારા લગાવ્યા હતા અને તેના સંદર્ભે અનેક વિરોધ પ્રદર્શનો પણ કર્યા હતા. આ ઓપરેશન એ માન્યતા પર આધારિત હતું કે ભારતીય સૈનિકોની હાજરી માલદીવ્સની સાર્વભૌમત્વ માટે ખતરો છે.
પ્રોગ્રેસિવ પાર્ટી ઑફ માલદીવ્સ (PPM)ના નેતા મોહમ્મદ મુઈઝ્ઝૂએ ઑક્ટોબરમાં યોજાયેલી માલદીવની રાષ્ટ્રપતિની ચૂંટણીમાં જીત મેળવી હતી. PPM ગઠબંધનને ચીન સાથેના તેના ગાઢ સંબંધો માટે જાણીતું છે. જીત પછી, નવેમ્બર 2023માં શપથ ગ્રહણ સમારોહ પહેલા, મુઇઝ્ઝુએ ખાતરી આપી હતી કે માલદીવમાં ભારતીય સૈનિકોની જગ્યાએ ચીની સૈનિકો તહેનાત કરવામાં આવશે નહીં.
