મોદીએ બાઇડનને ચાંદીની ટ્રેનનું મોડલ ગિફ્ટ કર્યું: એક તરફ લખેલું છે ‘દિલ્હી ટુ ડેલવેર’, બીજી બાજુ ‘ભારતીય રેલવે’, જીલ બાઇડનને ભેટમાં કાશ્મીરી પશ્મીના શાલ આપી

અમેરિકાના પ્રવાસે ગયેલા PM મોદીએ શનિવારે રાષ્ટ્રપતિ જો બાઇડનને ચાંદીની ટ્રેનનું મોડલ ગિફ્ટ કર્યું હતું. આ ટ્રેનની એક તરફ ‘DELHI to DELAWARE’ લખેલું હતું, જ્યારે બીજી બાજુ ‘INDIAN RAILWAYS’ લખેલું હતું. આ મોડલ ટ્રેન 92.5% ચાંદીથી બનેલી છે.

તેને મહારાષ્ટ્રના કારીગરો દ્વારા બનાવવામાં આવ્યું છે. આ સિવાય મોદીએ બાઇડનની પત્ની અને અમેરિકાની ફર્સ્ટ લેડી જીલ બાઇડનને કાશ્મીરી પશ્મીના શાલ પણ અર્પણ કરી હતી. આ પહેલા PM મોદીએ શનિવારે રાત્રે રાષ્ટ્રપતિ બાઇડન સાથે તેમના હોમટાઉન ડેલવેરમાં મુલાકાત કરી હતી.

આ તસવીર ચાંદીની બનેલી ટ્રેનના મોડલની છે, જે મોદીએ બાઇડનને ભેટમાં આપી હતી. તેના પર ‘DELHI to DE;LAWARE’ લખેલું છે.

ટ્રેનની બીજી બાજુ ‘INDIAN RAILWAYS’ પણ લખેલું છે.

PM મોદીએ અમેરિકાની ફર્સ્ટ લેડી જીલ બાઇડનને પશ્મીના શાલ ભેટમાં આપી.

બાઇડને કહ્યું, ભારત-અમેરિકા ભાગીદારી સૌથી મજબૂત

મોદી પહોંચ્યા ત્યારે બાઇડને તેમને ગળે લગાવીને સ્વાગત કર્યું હતું. આ પછી બાઇડને મોદીને તેમનું ઘર પણ બતાવ્યું. ભારતીય PM સાથેની મુલાકાત બાદ અમેરિકી રાષ્ટ્રપતિએ સોશિયલ મીડિયા પર લખ્યું, “ભારત અને અમેરિકા વચ્ચેની ભાગીદારી ઈતિહાસમાં સૌથી મજબૂત છે.”

બાઇડને કહ્યું કે, હું જ્યારે પણ PM મોદીને મળું છું ત્યારે અમને બંને દેશો વચ્ચે ભાગીદારીના નવા ક્ષેત્રો મળે છે. આજનો દિવસ પણ એવો જ હતો. બાઇડને PM મોદીની યુક્રેન અને પોલેન્ડની મુલાકાતની પ્રશંસા કરી હતી.

આ સિવાય અમેરિકી રાષ્ટ્રપતિએ સંયુક્ત રાષ્ટ્રમાં ભારતના કાયમી સભ્યપદને પણ સમર્થન આપ્યું હતું. બંને નેતાઓ વચ્ચે ડ્રોન ડીલ પર પણ ચર્ચા થઈ હતી. બાઇડને ભારત સાથેની આ ડીલને આવકારી છે. ભારત યુએસ પાસેથી 31 MQ-9B SKY ગાર્ડિયન અને SEA ગાર્ડિયન ડ્રોન ખરીદવાની પ્રક્રિયામાં છે. આ ડ્રોનની કિંમત લગભગ 3 અબજ ડોલર છે.

આ તે ચંદનનું બોક્સ છે જે મોદીએ ગયા વર્ષે અમેરિકાની તેમની રાજ્ય મુલાકાત દરમિયાન બાઇડનને ભેટમાં આપ્યું હતું. તેમાં 10 ડબ્બીઓની સાથે ભગવાન ગણેશની મૂર્તિ અને એક દીવો રાખવામાં આવ્યો હતો.

મોદીએ બાઇડનને 10 ડેનમ, 7.5 કેરેટના હીરા આપ્યા હતા

આ પહેલા ગયા વર્ષે જૂનમાં અમેરિકાની સ્ટેટ મુલાકાતે ગયેલા PM મોદીએ બાઇડનને ભેટમાં ‘દસ દાનમ’ આપ્યા હતા. હકીકતમાં, ભારતમાં એક પરંપરા છે કે જેઓ એક હજાર પૂર્ણિમાના ચંદ્રો જુએ છે તેમને આ દાન આપવામાં આવે છે. કેલેન્ડરની ગણતરી મુજબ, જ્યારે વ્યક્તિ 80 વર્ષ અને 8 મહિનાનો હોય છે, ત્યારે તે એક હજાર પૂર્ણ ચંદ્ર જોઈ ચૂક્યો હોય છે. બાઇડને તેમના જીવનમાં આ તબક્કો પાર કર્યો છે.

દસ દાનમમાં ચાંદીના કોટેડ નારિયેળ, ચંદન, તલ, સોનાનો સિક્કો, ઘી, ચોખા જેવી 10 ભેટોનો સમાવેશ થાય છે. આ સિવાય મોદીએ જીલ બાઇડનને 7.5 કેરેટનો ઈકો-ફ્રેન્ડલી ગ્રીન ડાયમંડ ભેટમાં આપ્યો હતો.