કાબુલ/ઈસ્લામાબાદ31 મિનિટ પેહલા
- કૉપી લિંક
અફઘાનિસ્તાનની તાલિબાન સરકારે આરોપ લગાવ્યો છે કે પાકિસ્તાની સેનાએ 17 અને 18 માર્ચની મધ્યરાત્રિએ તેમના બે વિસ્તારોમાં હવાઈ હુમલા કર્યા હતા. જેમાં આઠ લોકોનાં મોત થયા હતા.
બીજી તરફ પાકિસ્તાન તરફથી જાહેર કરવામાં આવેલા નિવેદનમાં અફઘાનિસ્તાન શબ્દનો પણ ઉપયોગ કરવામાં આવ્યો નથી. આ નિવેદનમાં કહેવામાં આવ્યું છે કે- ઇન્ટેલિજન્સ ઇનપુટના આધારે કાર્યવાહી કરવામાં આવી હતી. આ ઓપરેશન વજીરિસ્તાનના કેટલાક વિસ્તારોમાં કરવામાં આવ્યું હતું. જેમાં એક આતંકી કમાન્ડર સહિત 8 લોકો માર્યા ગયા હતા.
બપોરે 3 વાગ્યે હુમલો
પાકિસ્તાની અખબાર ‘ધ ડોન’ના અહેવાલમાં આ ઘટના અંગે અફઘાન સરકારના પ્રવક્તા ઝબીઉલ્લાહ મુજાહિદને ટાંકવામાં આવ્યો છે. મુજાહિદે કહ્યું – રવિવાર અને સોમવારની વચ્ચેની રાત્રે લગભગ 3 વાગ્યે, અમારા ખોસ્ત અને પક્તિકા પ્રાંતમાં પાકિસ્તાની એરફોર્સના ફાઇટર જેટ દ્વારા બોમ્બમારો કરવામાં આવ્યો. આ રહેણાંક વિસ્તારો હતા. 8 લોકોનાં મોત. પાકિસ્તાને સામાન્ય અફઘાન લોકોને નિશાન બનાવ્યા છે. માર્યા ગયેલાઓમાં મહિલાઓ અને બાળકોનો પણ સમાવેશ થાય છે.
અફઘાન સરકારના પ્રવક્તા ઝબીઉલ્લા મુજાહિદે અફઘાનિસ્તાનની ખામા વેબસાઇટને જણાવ્યું કે પાકિસ્તાનની આ કાર્યવાહીના ગંભીર પરિણામો આવશે. (ફાઈલ)
ઝરદારીએ બદલો લેવાની ધમકી આપી હતી
- શનિવારે પાકિસ્તાનના નોર્થ વઝીરિસ્તાનમાં આતંકી હુમલો થયો હતો. જેમાં સેનાના બે અધિકારીઓ શહીદ થયા હતા. જ્યારે તેમને અંતિમ સંસ્કાર કરવામાં આવ્યા ત્યારે રાષ્ટ્રપતિ આસિફ અલી ઝરદારી હાજર હતા. તેમણે કહ્યું હતું- શહીદોના લોહીનો બદલો લેવામાં આવશે. જો આપણા દેશ પર સરહદ પારથી હુમલો થશે તો અમે યોગ્ય જવાબ આપીશું.
- શનિવારના હુમલાની જવાબદારી હાફિઝ ગુલ બહાદુર ગ્રુપે લીધી હતી. આ પછી પાકિસ્તાની સેનાએ કહ્યું હતું કે આ જૂથ અફઘાનિસ્તાનમાં આશ્રય લે છે અને સરહદ પાર કરીને પાકિસ્તાનમાં હુમલા કરે છે. આ પછી આતંકીઓ ફરી અફઘાનિસ્તાનના ખોસ્ત વિસ્તારમાં છુપાઈ ગયા.
- જો લોકેશનની વાત કરીએ તો અફઘાનિસ્તાનનો પક્તિકા પ્રાંત પાકિસ્તાનના દક્ષિણ વઝીરિસ્તાનને અડીને આવેલો છે. જ્યારે, ખોસ્ત પ્રાંત ઉત્તર વઝીરિસ્તાનનો સરહદી વિસ્તાર છે.
પાકિસ્તાન અને અફઘાનિસ્તાનની સરહદ ચોકી. અફઘાનિસ્તાનના ખોસ્ત પ્રાંતની સરહદ અહીંથી શરૂ થાય છે.
પાકિસ્તાને અફઘાનિસ્તાન પર આક્ષેપ કરવાનું બંધ કરવું જોઈએ
- તાલિબાન સરકારના પ્રવક્તા મુજાહિદે સોશિયલ મીડિયા પર કહ્યું- પાકિસ્તાન કહી રહ્યું છે કે તેમણે આતંકી અબ્દુલ્લા શાહને નિશાન બનાવવા માટે હુમલો કર્યો. શાહ પાકિસ્તાનમાં રહે છે. અમે આ હુમલાઓની નિંદા કરીએ છીએ અને પાકિસ્તાનને કહેવા માંગીએ છીએ કે આ અફઘાનિસ્તાનની સ્વતંત્રતા પર હુમલો છે. પાકિસ્તાન હવે આપણા પર આક્ષેપ કરવાનું બંધ કરે તો સારું રહેશે. તેઓ તેમની નિષ્ફળતા માટે અફઘાનિસ્તાનને જવાબદાર ઠેરવવા માગે છે.
- તાજેતરમાં, પાકિસ્તાનના વિદેશ મંત્રાલયના કેટલાક અધિકારીઓ કાબુલ ગયા હતા અને ત્યાં તાલિબાન નેતૃત્વ સાથે વાત કરી હતી. બીજી તરફ, કેટલાક અહેવાલોમાં કહેવામાં આવ્યું છે કે અફઘાનિસ્તાન અને પાકિસ્તાન સરહદ પર સમયાંતરે ગોળીબાર થઈ રહ્યો છે. ત્યાંના અધિકારીઓએ આ વાતની પુષ્ટિ કરી છે.
- ખુર્રમ એજન્સીના જિલ્લા પોલીસ અધિકારી મઝહર જહાંએ કહ્યું- અમારા એક અધિકારી સોમવારે શહીદ થયા હતા. બે જવાનો ઘાયલ થયા છે.
