1 કલાક પેહલા
- કૉપી લિંક
પાકિસ્તાન અધિકૃત કાશ્મીર (PoK)માં 4 દિવસથી મોંઘવારી અને વીજળીના ભાવ સામે વિરોધ પ્રદર્શન ચાલી રહ્યું છે. વડા પ્રધાન શેહબાઝ શરીફે સોમવારે PoK માટે 23 અબજ પાકિસ્તાની રૂપિયા (718 કરોડ ભારતીય રૂપિયા)ના પેકેજની જાહેરાત કરી હતી. આમ છતાં વિરોધીઓ પાછળ હટવા તૈયાર નથી.
પાકિસ્તાની મીડિયા ડોન ન્યૂઝ અનુસાર, રાહત પેકેજની જાહેરાતના થોડા સમય પછી, પાકિસ્તાની અર્ધ લશ્કરી રેન્જર્સે ટીયર ગેસના શેલ છોડ્યા અને વિરોધીઓ પર ગોળીબાર કર્યો. આ દરમિયાન 3 લોકોનાં મોત થયા હતા, જ્યારે 6 લોકો ઘાયલ થયા હતા.
વાસ્તવમાં પીએમ શરીફની જાહેરાત બાદ અર્ધલશ્કરી રેન્જર્સને PoK છોડવાનો આદેશ આપવામાં આવ્યો હતો. આ પછી રેન્જર્સના 19 વાહનોનો કાફલો મુઝફ્ફરાબાદ થઈને નીકળી રહ્યો હતો, ત્યારે શોરન દા નાકા ગામમાં તેમના પર પથ્થરોથી હુમલો કરવામાં આવ્યો. આ દરમિયાન અર્ધલશ્કરી દળોના ત્રણ વાહનોને પણ આગ ચાંપી દેવામાં આવી હતી. હુમલાના જવાબમાં રેન્જર્સે ગોળીબાર કર્યો હતો.
તસવીર પીઓકેના મુઝફ્ફરાબાદ શહેરની છે, જ્યાં પાકિસ્તાની અર્ધલશ્કરી રેન્જર્સ તૈનાત જોવા મળ્યા હતા.
‘પીઓકેના લોકોની માગણીઓ કાયદેસર છે’
અગાઉ, શાહબાઝની જાહેરાત પછી પીઓકેના વડા પ્રધાન અનવારુલ હકે કહ્યું હતું કે લોકો અહીં સસ્તા ભાવે બ્રેડની માગ કરી રહ્યા છે. આ એક મૂળભૂત માગ છે જેને નકારી શકાય તેમ નથી. વીજળી અને લોટના ભાવનો આ મુદ્દો ઘણા સમયથી પેન્ડિંગ હતો, જેને કેન્દ્ર સરકાર જ ઉકેલી શકે છે. શાહબાઝ સરકાર દ્વારા કરવામાં આવેલી જાહેરાતને પાકિસ્તાનના આગામી બજેટમાં સામેલ કરવામાં આવશે.
રાહત પેકેજ હેઠળ, PoKમાં લોટની કિંમત 77 રૂપિયા/કિલોથી ઘટાડીને 50 રૂપિયા/કિલો કરવામાં આવી છે. વીજળીના ભાવમાં પણ ઘટાડો કરવામાં આવ્યો છે. ડોન ન્યૂઝ અનુસાર, PoKમાં 100 યુનિટ સુધીની વીજળીની કિંમત 3 રૂપિયા હશે, 300 યુનિટ સુધીની કિંમત 5 રૂપિયા/યુનિટ હશે અને જો 300 યુનિટથી વધુ વીજળી ખર્ચવામાં આવે તો 6 રૂપિયા પ્રતિ યુનિટ હશે.
આંદોલનકારીઓએ કહ્યું- સરકારની જાહેરાત પર કાયદેસરની તપાસ કરાવશે
બીજી તરફ, PoKમાં વિરોધનું નેતૃત્વ કરી રહેલી જમ્મુ કાશ્મીર અવામી એક્શન કમિટી (JAAC)એ કહ્યું છે કે તે સરકારના નોટિફિકેશનની કાયદેસર રીતે તપાસ કરાવશે, ત્યારબાદ જ વિરોધ પાછું ખેંચવા અંગે નિર્ણય લેવામાં આવશે. JAACએ કહ્યું કે PoK સરકાર અત્યાર સુધી આ મામલે બેજવાબદાર વલણ અપનાવી રહી છે. આ કારણોસર તેઓ હવે આ રાહત પેકેજ પર વિશ્વાસ કરવા સક્ષમ નથી.
પ્રદર્શનોને જોતા પીઓકેના રાજકીય કાર્યકર્તા અમજદ અયુબ મિર્ઝાએ ભારત સરકારને પાકિસ્તાની રાજદૂતને બોલાવવાની અપીલ કરી છે. મિર્ઝાએ કહ્યું કે પાકિસ્તાનમાં રેન્જર્સે પ્રદર્શનકારીઓ પર ગોળીબાર કર્યો છે. ત્યાં લોકો રોજબરોજની ચીજવસ્તુઓના ભાવમાં રાહતની માગ કરી રહ્યા છે. આવી સ્થિતિમાં, વિશ્વભરના સમુદાયોએ સાથે આવવું જોઈએ અને પીઓકેને સમર્થન આપવું જોઈએ.
પીઓકેમાં પ્રદર્શનને લગતી તસવીરો…
વિરોધનું નેતૃત્વ કરી રહેલા JAAC એ સોમવારે કહ્યું હતું કે તે સરકારની જાહેરાતની કાનૂની તપાસ કર્યા પછી જ વિરોધને બંધ કરશે.
પીઓકેના મીરપુર, પૂંચ અને મુઝફ્ફરાબાદ જેવા વિસ્તારોમાં મોંઘવારી અને વીજળીના ભાવ સામે વિરોધ પ્રદર્શન થઈ રહ્યા છે.
પીઓકેમાં વિરોધ કેવી રીતે હિંસક બન્યો
- ચાર દિવસ પહેલા પાકમાં રોજબરોજની ચીજવસ્તુઓના વધતા ભાવને લઈને વિરોધ પ્રદર્શનો શરૂ થયા હતા. લોકો શાંતિપૂર્વક વિરોધ કરી રહ્યા હતા. પરંતુ સ્થળ પર હાજર પોલીસે નિઃશસ્ત્ર પ્રદર્શનકારીઓ પર લાઠીચાર્જ કર્યો હતો. જેના કારણે મહિલાઓ અને શાળાના બાળકો ઘાયલ થયા હતા. પાકિસ્તાન પોલીસનો વીડિયો પણ વાઇરલ થયો હતો.
- પોલીસની હિંસા બાદ લોકોએ વધુ દેખાવો કરવાની જાહેરાત કરી હતી. તેઓ શેરીઓમાં ઉતર્યા. પોલીસે ફરીથી તેમના પર લાઠીચાર્જ શરૂ કરતાં પ્રદર્શનકારીઓ ગુસ્સે થઈ ગયા. તેઓએ પોલીસ પર હુમલો કરીને જવાબી કાર્યવાહી કરી હતી. આ હુમલામાં એક પોલીસકર્મીનું મોત થયું હતું, જ્યારે 100થી વધુ લોકો ઘાયલ થયા હતા.
પીઓકેમાં વિરોધ પ્રદર્શન કરી રહેલા લોકોની માગ…
- પીઓકેના લોકોને ઉત્પાદનના ખર્ચે વીજળી મળવી જોઈએ. પાકિસ્તાન સરકાર પીઓકેમાંથી પ્રતિ યુનિટ રૂ. 2ના ભાવે વીજળી લે છે અને અહીંના લોકોને ઊંચા દરે પાછી આપે છે.
- પાકિસ્તાન સરકારે લોટ પરની સબસિડી ખતમ કરી દીધી છે, જ્યારે યુએનના નિર્દેશ છે કે PoKના લોકોને લોટ સહિત 30 વસ્તુઓ પર સબસિડી મળવી જોઈએ.
- PoK નોકરશાહી અને 53 મંત્રીઓને આપવામાં આવતી લક્ઝરી સુવિધાઓ નાબૂદ કરવી જોઈએ. તેમને આપવામાં આવતી લક્ઝરી કાર, મોંઘા મકાનો અને TA-DA નાબૂદ કરવામાં આવે.
- ઘણા અધિકારીઓ પાસે એટલી મોંઘી કાર છે કે ઘણા દેશોના પીએમ તેનો ઉપયોગ કરતા નથી. તેમના આસિસ્ટન્ટ પાસે 10-15 લાખ રૂપિયાની કાર છે.
પાકિસ્તાનમાં લોટની કિંમત 800 રૂપિયા પ્રતિ કિલો
પાકિસ્તાનમાં રાજકીય અસ્થિરતા વચ્ચે દેશની આર્થિક સ્થિતિ ખરાબ થઈ ગઈ છે. અહીં મોંઘવારી દરમાં સતત વધારો નોંધવામાં આવ્યો છે. પાકિસ્તાનના લોકો ભૂખમરો અને બેરોજગારીથી પરેશાન છે. પાકિસ્તાનની જીડીપી 2024માં માત્ર 2.1%ના દરે વધવાની સંભાવના છે.
આ કારણોસર, લોકોએ ગયા મહિને પણ પીઓકેમાં વધતી મોંઘવારી સામે વિરોધ કર્યો હતો. આ દરમિયાન લોકો રસ્તા પર ઉતરી આવ્યા હતા અને મોંઘવારી વિરુદ્ધ સૂત્રોચ્ચાર કર્યા હતા. બીજી બાજુ પીઓકેમાં ખરાબ સ્થિતિને લઈને હ્યુમન રાઈટ્સ કમિશન ઓફ પાકિસ્તાન (એચઆરસીપી) એ સ્વીકાર્યું છે કે ત્યાં માનવ અધિકારોનું સતત ઉલ્લંઘન થઈ રહ્યું છે.
