Related posts
30 મિનિટ પેહલા
- કૉપી લિંક
ભારતીય મૂળની અવકાશયાત્રી સુનીતા વિલિયમ્સ છેલ્લા 52 દિવસથી ઇન્ટરનેશનલ સ્પેસ સ્ટેશન (ISS)માં ફસાયેલી છે. સ્પેસક્રાફ્ટમાં સમસ્યાને કારણે, તે ક્યારે પૃથ્વી પર પરત ફરશે તે હજી નક્કી કરવામાં આવ્યું નથી.
આ દરમિયાન, પેરિસ ઓલિમ્પિકની શરૂઆત પર ખેલાડીઓને અભિનંદન આપતો તેમનો એક અનોખો વીડિયો સામે આવ્યો છે. આમાં સુનીતા અન્ય અવકાશયાત્રીઓ સાથે ઓલિમ્પિકની મશાલ પકડેલી જોવા મળે છે. જોકે આ મશાલ ઇલેક્ટ્રિક છે.
વીડિયોમાં તમામ અવકાશયાત્રીઓ વિવિધ રમતોમાં ભાગ લેતા જોવા મળે છે. જ્યારે સુનિતા જિમ્નેસ્ટિક્સ કરી રહી છે, બાકીના અવકાશયાત્રીઓ વેઇટ-લિફ્ટિંગ, રેસિંગ, ડિસ્કસ થ્રો, શોટપુટ વગેરે જેવી ઘણી રમતોમાં તેમની પ્રતિભા બતાવતા જોવા મળે છે.
વીડિયોમાં સુનીતા વિલિયમ્સ ઓલિમ્પિક મશાલ જેવી ઈલેક્ટ્રીક મશાલ લઈને જોવા મળે છે.
‘ઓલિમ્પિક ખેલાડીઓની જેમ રમવાની મજા આવી’
અવકાશયાત્રીઓએ કહ્યું, “છેલ્લા કેટલાક દિવસોમાં અમને ઓલિમ્પિક ખેલાડીઓની જેમ રમવાની ખૂબ મજા આવી. જો કે, અમને ફાયદો એ હતો કે અહીં ગુરુત્વાકર્ષણ નથી. અમે કલ્પના કરી શકીએ છીએ કે ઓલિમ્પિક ખેલાડીઓ માટે તે કેટલું મુશ્કેલ હશે. અમે બધા સ્પર્ધકોને સફળતા માટે શુભેચ્છા પાઠવીએ છીએ.” અમેરિકન સ્પેસ એજન્સી નાસાએ તેનો સંપૂર્ણ વીડિયો શેર કર્યો છે.
સુનીતા વિલિયમ્સ 5 જૂને ત્રીજી વખત અવકાશમાં ગયાં
નાસાના અવકાશયાત્રી સુનિતા વિલિયમ્સે 5 જૂન, 2024ના રોજ ત્રીજી વખત અવકાશમાં ઉડાન ભરી હતી. લગભગ 25 કલાક પછી વિલિયમ્સ ઈન્ટરનેશનલ સ્પેસ સ્ટેશન એટલે કે ISS પર પહોંચ્યાં. મિશન હેઠળ, તેમણે રિસર્ચ અને એક્સપેરિમેન્ટ્સ કરવા માટે 8 દિવસ સુધી સ્પેસ સ્ટેશનમાં રહીને 13 જૂને પૃથ્વી પર પાછા ફરવાનું હતું, પરંતુ તેમના અવકાશયાનને તકનીકી સમસ્યાઓનો સામનો કરવો પડ્યો.
સુનીતાની સાથે તેમનો પાર્ટનર બૂચ વિલ્મોર પણ અવકાશમાં ફસાયેલો છે. નાસાના કોમર્શિયલ ક્રૂ પ્રોગ્રામના મેનેજર સ્ટીવ સ્ટિચે જણાવ્યું હતું કે ISS સુધી પહોંચવાના અંતિમ તબક્કા દરમિયાન 6 જૂને સ્ટારલાઇનરના 28 રિએક્શન કંટ્રોલ થ્રસ્ટર્સમાંથી પાંચ નિષ્ફળ ગયા હતા. જો કે, તેમાંથી ચાર પાછા ઓનલાઈન આવ્યા હતા.
આ ફૂટેજમાં એક અવકાશયાત્રી દોડતો જોવા મળી રહ્યો છે.
અવકાશયાત્રીઓએ સ્પેસ સ્ટેશનમાં વેઈટ લિફ્ટિંગ પણ કર્યું હતું.
થ્રસ્ટર હોટ-ફાયર ટેસ્ટ કર્યો
બોઇંગ અને NASA ગ્રાઉન્ડ ટીમના સભ્યોએ સપ્તાહના અંતે થ્રસ્ટર હોટ-ફાયર ટેસ્ટ હાથ ધર્યો હતો. ડોકીંગ દરમિયાન પ્રથમ વખત જોવામાં આવેલ અસામાન્ય રીતે ઓછા દબાણને કારણે ટેસ્ટ દરમિયાન એક થ્રસ્ટરને ફાયર કરવામાં આવ્યો ન હતો. તે પૃથ્વી પર પરત ફરતી વખતે ઑફલાઇન રહેશે.
જો મિશન સફળ રહેશે તો નાસા પાસે પહેલી વખત 2 અવકાશયાન હશે
જો આ મિશન સફળ થશે તો ઈતિહાસમાં પ્રથમ વખત અમેરિકા પાસે અવકાશયાત્રીઓને અવકાશમાં મોકલવા માટે બે અવકાશયાન હશે. હાલમાં અમેરિકા પાસે માત્ર ઈલોન મસ્કની કંપની સ્પેસએક્સનું ડ્રેગન અવકાશયાન છે. 2014માં નાસાએ સ્પેસએક્સ અને બોઈંગને સ્પેસક્રાફ્ટ બનાવવાનો કોન્ટ્રાક્ટ આપ્યો હતો. SpaceX તેને 4 વર્ષ પહેલા જ બનાવી ચૂક્યું છે.
