યુક્રેને કહ્યું- સીઝફાયર નહીં કરે તો રશિયા સામે કાર્યવાહી: પુતિનનો સંદેશ – અમેરિકા અમારી સાથે સીધી વાત કરે, તો યુદ્ધવિરામ શક્ય છે

રશિયાના રાષ્ટ્રપતિ કાર્યાલયે સ્પષ્ટ કહ્યું છે કે યુદ્ધવિરામ અમારી શરતો પર જ લાગુ કરવામાં આવશે.

અમેરિકાના પ્રસ્તાવિત 30 દિવસના યુદ્ધવિરામ પર રશિયાએ કડક વલણ અપનાવ્યું છે. બુધવારે રશિયન રાષ્ટ્રપતિ કાર્યાલય (ક્રેમલિન) દ્વારા જાહેર કરાયેલા એક નિવેદનમાં કહેવામાં આવ્યું હતું કે જ્યાં સુધી અમેરિકા રશિયા સાથે સીધી વાત નહીં કરે ત્યાં સુધી કોઈ નિર્ણય લેવામાં આવશે નહીં.

ક્રેમલિનના પ્રવક્તા દિમિત્રી પેસ્કોવે કહ્યું: “અમે યુક્રેન યુદ્ધ પર સાઉદી અરેબિયામાં યોજાયેલી બેઠકનું જીણવટતાથી વિશ્લેષણ કરી રહ્યા છીએ.” જો અમેરિકા સીધો અમારો સંપર્ક કરે તો જ રશિયા કોઈ ડીલ માટે સંમત થશે.

આ દરમિયાન, યુક્રેનના રાષ્ટ્રપતિ વોલોદિમીર ઝેલેન્સકીએ કહ્યું છે કે જો રશિયા યુદ્ધવિરામ માટે સંમત નહીં થાય, તો અમેરિકા રશિયા સામે કડક કાર્યવાહી કરે તેવી અપેક્ષા છે.

ઝેલેન્સકીએ કહ્યું- યુક્રેન 30 દિવસના યુદ્ધવિરામ માટે તૈયાર છે મંગળવારે (11 માર્ચ) સાઉદી અરેબિયામાં અમેરિકા અને યુક્રેન વચ્ચે એક બેઠક યોજાઈ હતી. આમાં, 30 દિવસના યુદ્ધવિરામ પર સંમતિ સધાઈ. યુક્રેનિયન રાષ્ટ્રપતિ વોલોદિમીર ઝેલેન્સકીએ આ વાતની પુષ્ટિ કરી અને કહ્યું…

આ પ્રસ્તાવ એક સકારાત્મક પગલું છે. યુક્રેન આ સ્વીકારવા માટે સંપૂર્ણપણે તૈયાર છે. હવે આ માટે રશિયાને મનાવવાની જવાબદારી અમેરિકાની છે. મોસ્કો સંમત થાય કે તરત જ યુદ્ધવિરામ અમલમાં આવશે. – વોલોદિમીર ઝેલેન્સ્કી, યુક્રેનિયન રાષ્ટ્રપતિ

આ પછી અમેરિકન રાષ્ટ્રપતિએ કહ્યું હતું કે હવે બોલ રશિયાના કોર્ટમાં છે. અમે ટૂંક સમયમાં પુતિન સાથે વાત કરીશું.

રશિયન રાષ્ટ્રપતિ પુતિનનું કામચલાઉ યુદ્ધવિરામ પર કડક વલણ, 5 કારણો

1. નિષ્ણાતોના મતે, રશિયા હાલમાં વધુ મજબૂત છે અને તેનું માનવું છે કે જો યુદ્ધવિરામ થશે, તો યુક્રેન ફરીથી સંગઠિત થશે.
2. પુતિનની વ્યૂહરચના એવી છે કે યુદ્ધવિરામ રશિયાની શરતો પર હશે.
3. યુદ્ધવિરામ પહેલા, રશિયા તેના પર લાદવામાં આવેલા પ્રતિબંધોમાં છૂટછાટ ઇચ્છે છે. આમાં તેલ અને ગેસ પ્રતિબંધોનો સમાવેશ થાય છે.
4. રશિયા ક્રિમીઆ મુદ્દાને હંમેશા માટે સમાપ્ત કરવા માંગે છે. તેમની માંગ છે કે યુદ્ધવિરામ પહેલા દુનિયાએ ક્રિમીઆને રશિયાના ભાગ તરીકે સ્વીકારવું જોઈએ.
5. રશિયા ઇચ્છે છે કે યુક્રેનનો 20% વિસ્તાર (ડોનેસ્ક-લુહાન્સ્ક) હંમેશા તેના નિયંત્રણમાં રહે.

યુએસ-યુક્રેન વાટાઘાટોમાં મહત્વપૂર્ણ નિર્ણયો

• યુદ્ધવિરામ હવાઈ અને દરિયાઈ ક્ષેત્રો સિવાય સમગ્ર યુદ્ધક્ષેત્ર પર લાગુ થશે.
• વચન મુજબ, અમેરિકા રશિયાને યુદ્ધવિરામ માટે સંમત થવા માટે સમજાવવાનો પ્રયાસ કરશે.
• યુક્રેનને અમેરિકા તરફથી લશ્કરી સહાય અને ગુપ્ત માહિતી શેર કરવાની સુવિધાઓ મળશે.
• દુર્લભ ખનિજોના સોદાને શક્ય તેટલી વહેલી તકે પૂર્ણ કરવા માટે અમેરિકા અને યુક્રેન વચ્ચે એક કરાર થયો હતો.

ઝેલેન્સકીને ટ્રમ્પ સાથે ચર્ચા કરવાનો અફસોસ

4 માર્ચે, યુક્રેનના રાષ્ટ્રપતિ વોલોદિમીર ઝેલેન્સકીએ કહ્યું કે ગયા અઠવાડિયે ટ્રમ્પ સાથેની તેમની મુલાકાત યોગ્ય રીતે થઈ ન હતી. ઝેલેન્સકીએ તેને ખેદજનક ગણાવ્યું અને કહ્યું કે યુક્રેન ખનિજ સોદા માટે તૈયાર છે.

ઝેલેન્સકીનું આ નિવેદન એવા સમયે આવ્યું છે જ્યારે ટ્રમ્પે યુક્રેનને લશ્કરી સહાય બંધ કરવાની જાહેરાત કરી હતી. આમાં, અમેરિકાથી યુક્રેન સુધી જે સહાય હજુ સુધી પહોંચી ન હતી તે પણ બંધ કરી દેવામાં આવી.

ઝેલેન્સકી 28 ફેબ્રુઆરીએ ટ્રમ્પને મળવા માટે વ્હાઇટ હાઉસ પહોંચ્યા હતા.

ટ્રમ્પે ઝેલેન્સકી પર નારાજગી વ્યક્ત કરી

વ્હાઇટ હાઉસના એક અધિકારીના જણાવ્યા અનુસાર, જ્યાં સુધી રાષ્ટ્રપતિ ટ્રમ્પને ખાતરી ન થાય કે યુક્રેનિયન રાષ્ટ્રપતિ ખરેખર શાંતિ ઇચ્છે છે ત્યાં સુધી રોકાયેલી સહાય ફરી શરુ કરવામાં આવશે નહીં.

યુક્રેનને લશ્કરી સહાય બંધ કરવાના થોડા કલાકો પહેલા ટ્રમ્પે સોશિયલ મીડિયા પર પોસ્ટ કરી હતી. તેમણે કહ્યું હતું…

જ્યાં સુધી ઝેલેન્સકીને અમેરિકાનો ટેકો છે ત્યાં સુધી તેઓ શાંતિ ઇચ્છતા નથી. ઝેલેન્સકી દ્વારા આપવામાં આવેલું આ સૌથી ખરાબ નિવેદન છે. અમેરિકા આ ​​સહન નહીં કરે.