‘ભારત તરફથી આવી રહેલા નિવેદનોથી નાખુશ’: બાંગ્લાદેશે કહ્યું- હસીનાના પ્રત્યાર્પણની માગ ઈન્ડિયાને શરમમાં મૂકશે, આશા છે કે તેઓ યોગ્ય નિર્ણય લેશે

બાંગ્લાદેશની વચગાળાની સરકારમાં વિદેશ મંત્રી મોહમ્મદ તોહિદ હુસૈને કહ્યું કે, તેમની સરકાર ભારત તરફથી આવી રહેલા નિવેદનોથી ખુશ નથી. શેખ હસીના દ્વારા જારી કરાયેલા નિવેદનો પણ યોગ્ય ન હતા. તેમણે આ બાબત ભારતના હાઈ કમિશનરને પણ જણાવી છે.

ન્યૂઝ એજન્સી રોઈટર્સને આપેલા ઈન્ટરવ્યુમાં હુસૈને કહ્યું કે, સરકાર ભારતમાંથી શેખ હસીનાના પ્રત્યાર્પણની માગ કરી શકે છે. હસીના વિરુદ્ધ ઘણા કેસ નોંધાયેલા છે. આવી સ્થિતિમાં જો ગૃહ મંત્રાલય તેને લાવવાનો નિર્ણય કરે છે, તો તે માગ કરશે. આનાથી ભારત માટે શરમજનક પરિસ્થિતિ પણ સર્જાઈ શકે છે અને મને લાગે છે કે ભારત સરકાર યોગ્ય પગલાં લેશે.

શેખ હસીના 5 ઓગસ્ટની સાંજે તેની બહેન સાથે ઢાકાથી ગાઝિયાબાદના હિંડન એરબેઝ પર પહોંચી હતી.

‘રોહિંગ્યાઓની સમસ્યા બાંગ્લાદેશની જવાબદારી નથી’
રોહિંગ્યા સમુદાયના મુદ્દા પર હુસૈને કહ્યું કે, આ સમસ્યાનો સામનો કરવા માટે બાંગ્લાદેશ જવાબદાર નથી. ભારત એક મોટો દેશ છે. જો તે તેમને આશ્રય આપવા માગતો હોય તો તે આપી શકે છે. અમે લાખો રોહિંગ્યાઓને આશ્રય આપ્યો છે, પરંતુ મૂળ ધ્યેય એ લોકોનું મ્યાનમાર પરત ફરવાનું છે.

અમે વધુ રોહિંગ્યાઓને બાંગ્લાદેશમાં પ્રવેશવાની મંજૂરી આપી શકીએ નહીં. રોહિંગ્યાઓનો મુદ્દો માનવીય સંકટ સાથે જોડાયેલો છે. આ માટે માત્ર બાંગ્લાદેશ જ નહીં, પરંતુ સમગ્ર વિશ્વ જવાબદાર છે. અમે મદદ કરવા માટે અમારી ભૂમિકા કરી છે.

હસીના સામે 80 કેસ, જેમાના 65 હત્યાના કેસ નોંધાયા
બાંગ્લાદેશમાં હિંસા બાદ પૂર્વ પીએમ શેખ હસીના 5 ઓગસ્ટના રોજ ભારત આવ્યા હતા. તેમણે પોતાના પદ પરથી રાજીનામું આપી દીધું હતું. આ પછી હસીના વિરુદ્ધ અત્યાર સુધીમાં 80થી વધુ કેસ નોંધાયા છે, જેમાંથી 65 કેસ હત્યા સાથે જોડાયેલા છે. 22 ઓગસ્ટે વચગાળાની સરકારે હસીના અને તેના પરિવારના સભ્યોના રાજદ્વારી પાસપોર્ટ પણ રદ કરી દીધા હતા.

બાંગ્લાદેશી મીડિયા હાઉસ ઢાકા ટ્રિબ્યુને ભારત સરકારના સૂત્રોને ટાંકીને જણાવ્યું હતું કે, ભારતની વિઝા નીતિ અનુસાર, જો કોઈ બાંગ્લાદેશી નાગરિક પાસે ભારતીય વિઝા નથી, તો તે ફક્ત 45 દિવસ માટે અહીં રહી શકે છે. શેખ હસીનાને ભારત આવ્યાને 27 દિવસ થઈ ગયા છે. આવી સ્થિતિમાં તે કાયદેસર રીતે ભારતમાં માત્ર 18 દિવસ વધુ રહી શકે છે.

બાંગ્લાદેશમાં 16 જુલાઈ 2024ના રોજ સરકાર વિરોધી દેખાવો શરૂ થયા હતા.

ભારત અને બાંગ્લાદેશ વચ્ચે પ્રત્યાર્પણ કરાર શું છે?
2013માં થયેલા પ્રત્યાર્પણ કરાર હેઠળ બંને દેશો એકબીજાના દેશોમાં આશ્રય લઈ રહેલા ભાગેડુઓને પરત લાવવાની માગ કરી શકે છે. જો કે, આમાં એક કેચ છે કે ભારત રાજનીતિ સાથે જોડાયેલી બાબતોમાં વ્યક્તિને પ્રત્યાર્પણ કરવાનો ઇનકાર કરી શકે છે.

જો કે, જો તે વ્યક્તિ સામે હત્યા અને અપહરણ જેવા ગંભીર કેસ નોંધવામાં આવે તો તેના પ્રત્યાર્પણને રોકી શકાય નહીં. કરારમાં 2016ના સુધારા મુજબ, પ્રત્યાર્પણની માગ કરનાર દેશને ગુનાનો પુરાવો આપવાની પણ જરૂર નથી. આ માટે કોર્ટ દ્વારા જારી કરાયેલ વોરંટ પૂરતું છે. તેનાથી હસીના માટે મુશ્કેલીઓ વધી જાય છે.

હિંસામાં 1000થી વધુ લોકોના મોત થયા હતા
બાંગ્લાદેશની વચગાળાની સરકારમાં સ્વાસ્થ્ય મંત્રાલયના વડા નૂરજહાં બેગમે 29 ઓગસ્ટે કહ્યું હતું કે, સરકાર વિરોધી પ્રદર્શનમાં 1 હજારથી વધુ લોકોના મોત થયા છે. જ્યારે 400થી વધુ લોકોએ આંખોની રોશની ગુમાવી હતી. ઘણાએ એક અથવા બંને આંખોની દૃષ્ટિ ગુમાવી દીધી છે. બાંગ્લાદેશમાં 16 જુલાઈ 2024ના રોજ સરકાર વિરોધી દેખાવો શરૂ થયા હતા. 1971 પછી શરૂ થયેલો દેશનો આ સૌથી મોટો સરકાર વિરોધી વિરોધ હતો.