વિવેક રામાસ્વામી અમેરિકાના રાષ્ટ્રપતિની ચૂંટણી નહીં લડે: કહ્યું- મારા માટે રાષ્ટ્રપતિ બનવાનો કોઈ રસ્તો નથી; આયોવામાં રિપબ્લિકન પાર્ટી તરફથી પ્રચંડ બહુમતી સાથે ટ્રમ્પે નોમિનેશન જીત્યું

આ તસવીર ભારતીય મૂળના વિવેક રામાસ્વામીની છે, જેઓ રિપબ્લિકન પાર્ટી તરફથી રાષ્ટ્રપતિ પદના ઉમેદવાર બનવાની રેસમાં ઉભા હતા. (ફાઈલ)

ભારતીય મૂળના વિવેક રામાસ્વામીએ અમેરિકાના રાષ્ટ્રપતિની ચૂંટણી માટે તેમની ઉમેદવારી રદ કરી છે. તેઓ હવે ચૂંટણીમાં ઊભા રહેશે નહીં. ન્યૂયોર્ક ટાઈમ્સ અનુસાર, રામાસ્વામીએ પોતે મંગળવારે આ માહિતી આપી હતી.

મંગળવારે સવારે (ભારતીય સમય) તેઓ અમેરિકન રાજ્ય આયોવામાં રિપબ્લિકન પાર્ટી તરફથી ઉમેદવારી માટેની ચૂંટણી હારી ગયા. જેમાં ડોનાલ્ડ ટ્રમ્પે પ્રચંડ બહુમતી સાથે જીત મેળવી હતી. સીએનએન અનુસાર, વિવેક આ રેસમાં ચોથા ક્રમે રહ્યા હતા.

વિવેક રામાસ્વામીએ રાષ્ટ્રપતિ પદના ઉમેદવાર બનવાની રેસમાંથી બહાર આવતાં કહ્યું કે મારા માટે રાષ્ટ્રપતિ બનવાનો કોઈ રસ્તો નથી, તેથી હું મારો પ્રચાર સમાપ્ત કરી રહ્યો છું. ન્યૂયોર્ક ટાઈમ્સ અનુસાર, વિવેક રામાસ્વામી આવતીકાલે અમેરિકાના ન્યૂ હેમ્પશાયરમાં ટ્રમ્પ સાથે રેલી કરશે.

આયોવાની ચૂંટણીમાં ફ્લોરિડાના ગવર્નર રોન ડી-સેન્ટિસ બીજા સ્થાને અને ભારતીય મૂળની નિક્કી હેલી ત્રીજા સ્થાને રહ્યા. આ સાથે ટ્રમ્પ રિપબ્લિકન પાર્ટી તરફથી ઉમેદવાર બનશે તે લગભગ નિશ્ચિત છે.

સમાચાર અપડેટ કરી રહ્યા છે…