ગાઝામાં સીઝફાયર માટે આજે ફરી મતદાન: હમાસના વીડિયોમાં બંધકોએ કહ્યું- અમે ઇઝરાયલના હુમલામાં મરવા નથી માંગતા, અમને આઝાદ કરાવો

આ તસવીર હમાસની કેદમાં ઈઝરાયલના ત્રણ બંધકોની છે, જેનો વીડિયો જાહેર કરવામાં આવ્યો છે.

​​​​​યુદ્ધમાં સીઝફાયરની માંગ વચ્ચે આજે ફરી એકવાર UN સુરક્ષા પરિષદમાં સીઝફાયર માટે મતદાન થશે. ટાઈમ્સ ઓફ ઇઝરાયલના જણાવ્યા અનુસાર, તે પહેલા સોમવારના રોજ થવાનું હતું, પરંતુ સભ્ય દેશોને ડર હતો કે અમેરિકા ફરીથી વીટો લાદશે.

આ દરમિયાન, ઘણા દેશોના રાજદ્વારીઓ અમેરિકાને સીઝફાયરની તરફેણમાં મતદાન કરવા અથવા મતદાનથી દૂર રહેવા માટે સમજાવવાનો પ્રયાસ કરી રહ્યા છે. આરબ દેશોએ UNSCમાં આ પ્રસ્તાવ રજૂ કર્યો છે.

બીજી તરફ હમાસે સોમવારે 3 ઇઝરાયલી બંધકોનો વીડિયો જાહેર કર્યો હતો. ત્રણેય બંધકોની ઉંમર 80 વર્ષની આસપાસ છે. વીડિયોમાં તેણે કહ્યું- અમને અહીંથી આઝાદ કરાવવામાં આવે, પછી ભલેને તેની કિંમત કેટલી પણ ચૂકવવી પડે. અમે અહીં ઘરડા થવા માંગતા નથી. તેમજ અમે ઇઝરાયલની સેનાના હુમલામાં મરવા માંગતા નથી. અમારે અહીં ખૂબ જ મુશ્કેલ પરિસ્થિતિઓ વચ્ચે રહેવું પડી રહ્યું છે.

આ તસવીર 84 વર્ષીય અમીરામ કૂપર, 79 વર્ષીય ચૈમ પેરી અને 80 વર્ષીય યોરામ મેટ્ઝગરની છે, જેઓ હમાસની કેદમાં છે.

અમેરિકાએ કહ્યું- ઇઝરાયલે યુદ્ધના આગળના ફેઝમાં વધવું જોઈએ
ઇઝરાયલ પહોંચેલા અમેરિકાના રક્ષા મંત્રી લોઈડ ઓસ્ટીને બેઠકમાં ઇઝરાયલના નેતાઓને યુદ્ધને આગળના તબક્કામાં લઈ જવા માટે કહ્યું. ઓસ્ટીને કહ્યું કે તે ઇઝરાયલને યુદ્ધની સમયરેખા કે શરતો જણાવવા આવ્યો નથી.

આ પહેલા ઓસ્ટિન સોમવારે ઇઝરાયલ પહોંચ્યા હતા. તેઓ ઇઝરાયલના સંરક્ષણ પ્રધાન યોવ ગાલાંટને મળ્યા હતા. બાદમાં સંયુક્ત પ્રેસ કોન્ફરન્સમાં કહ્યું- અમેરિકા હંમેશા ઇઝરાયલની સાથે છે. ઓસ્ટીને થોડા દિવસો પહેલા કહ્યું હતું કે અમેરિકા માટે ઇઝરાયલને સમર્થન આપવું મહત્વપૂર્ણ છે, કારણ કે ઇઝરાયલ એક સાથે મધ્ય પૂર્વ અને યુરોપમાં અમેરિકાનું સહયોગી રહ્યું છે.

લાલ સમુદ્રમાં હુતિઓ સાથે કામ કરવા માટે સ્પેશિયલ ફોર્સની રચના કરી
લાલ સમુદ્રમાં હુતિ બળવાખોરોથી જહાજોને બચાવવા માટે અમેરિકા તેના સાથી દેશો સાથે મળીને એક સ્પેશિયલ ફોર્સ બનાવી રહ્યું છે. તેને ઓપરેશન પ્રોસ્પેરિટી ગાર્ડિયન નામ આપવામાં આવ્યું છે. તેમાં બ્રિટન, બહેરીન, કેનેડા, ફ્રાન્સ, ઈટાલી અને સ્પેન સહિત 10 દેશો જોડાયા છે. આમાંના કેટલાક દેશો સમુદ્રમાં પેટ્રોલિંગનું કામ કરશે, જ્યારે બાકીના હુતિઓ વિરુદ્ધ ગુપ્ત માહિતી મેળવશે.

ફોટો 20 નવેમ્બરનો છે, જ્યારે હુતિ બળવાખોરોએ લાલ સમુદ્રમાં જહાજને હાઇજેક કર્યું હતું.

નેતન્યાહુના મંત્રીએ રાજીનામું આપવાની ધમકી આપી હતી
ઇઝરાયલ પર યુદ્ધવિરામ માટે દબાણ વધી રહ્યું છે. આ સાથે વડાપ્રધાન બેન્જામિન નેતન્યાહુની યુદ્ધ કેબિનેટમાં પણ મતભેદો ઉદભવવા લાગ્યા છે. રાષ્ટ્રીય સુરક્ષા મંત્રી એતમાર ગીવિરે નેતન્યાહુને રાજીનામાની ધમકી આપી છે.

કટ્ટરપંથી યહૂદી નેતા ગિવિરે કહ્યું- ન તો હમાસ વિરુદ્ધ યુદ્ધ બંધ થવું જોઈએ અને ન તો આપણી સેનાની કાર્યવાહી નબળી પડવી જોઈએ. જો આવું થશે તો હું સરકારમાં ​​​​​​​રહીશ નહીં. બીજી તરફ પોલેન્ડના વોર્સો શહેરમાં બંધકોને છોડાવવાના મુદ્દે અમેરિકન ગુપ્તચર સંસ્થા CIA અને ઇઝરાયલની જાસૂસી સંસ્થા મોસાદના વડાઓ વચ્ચે વાતચીત શરૂ થઈ છે. કતાર પણ આમાં સામેલ છે.

પોતાની સરકારની ટીકા
હમાસ સાથેના યુદ્ધના મામલામાં જીવીરે પોતાની જ સરકારને ભીંસમાં મૂકી. કહ્યું- હમાસ સામે કોઈ સમજૂતી ન થવી જોઈએ. જો સેના પૂરી તાકાતથી યુદ્ધ નહીં લડે તો હું આ ગઠબંધન સરકાર છોડી દઈશ. બે મહિના કરતાં વધુ સમય વીતી ગયો છે અને યુદ્ધ ચાલુ છે. અમારી સરકારે ગાઝાને મદદ કરવા માટે કેટલાક નિર્ણયો લીધા છે. હું તેમને યોગ્ય માનતો નથી.

ગિવિરે વધુમાં કહ્યું- ગાઝામાં ઈંધણના 200 ટેન્કર મોકલી શકાતા નથી. ત્યાં પૈસા ન મોકલવા જોઈએ. હમાસ બંધકોની મુક્તિ માટે કડક શરતો મૂકી રહ્યું છે. નેતન્યાહુએ મારા બતાવેલા માર્ગ પર ચાલવું જોઈએ. હમાસને કોઈ તક ન આપવી જોઈએ. તેઓ હજુ પણ આપણા દેશ પર રોકેટ છોડે છે. મેં ગયા મહિને પણ યુદ્ધવિરામનો વિરોધ કર્યો હતો. સરકાર હોય કે ન હોય, આપણે હમાસ સામે ઝૂકવું જોઈએ નહીં.

પોલેન્ડમાં CIA અને મોસાદની બેઠક ​​​​​​​
બીજી તરફ પોલેન્ડના વોર્સો શહેરમાં બંધકોને છોડાવવાના મુદ્દે અમેરિકન ગુપ્તચર સંસ્થા CIA અને ઇઝરાયલની જાસૂસી સંસ્થા મોસાદના વડાઓ વચ્ચે વાતચીત શરૂ થઈ ગઈ છે. કતાર પણ આમાં સામેલ છે. ‘ન્યૂયોર્ક ટાઈમ્સ’ના જણાવ્યા અનુસાર – અગાઉના યુદ્ધવિરામની જેમ કેદીઓના બદલામાં બંધકોને છોડાવવા માટે વાતચીત ચાલી રહી છે. છેલ્લા યુદ્ધવિરામમાં 105 બંધકોને મુક્ત કરવામાં આવ્યા હતા.

CIAના ડિરેક્ટર વિલિયમ બર્ન્સ પોલેન્ડમાં મોસાદ અને ઇઝરાયલના ટોચના અન્યઅધિકારીઓને મળ્યા છે. આ દરમિયાન કતારના અધિકારીઓ પણ હાજર હતા.

​​​​​