શું ટ્રમ્પ હવે રશિયા-યુક્રેન યુદ્ધ અટકાવશે?: રાષ્ટ્રપતિની ચૂંટણી જીત્યા બાદ ટ્રમ્પે પુતિનને કર્યો ફોન, શાંતિ જાળવવા કરી અપીલ; ઝેલેન્સકી બાદ ટ્રમ્પે પુતિન સાથે કરી વાત

અમેરિકાના રાષ્ટ્રપતિની ચૂંટણી જીત્યા બાદ ડોનાલ્ડ ટ્રમ્પે પ્રથમ વખત રશિયાના રાષ્ટ્રપતિ વ્લાદિમીર પુતિન સાથે વાત કરી છે. રોયટર્સના અહેવાલ મુજબ, 7 નવેમ્બરે બંને નેતાઓ વચ્ચે ફોન પર વાતચીત થઈ હતી, જેની માહિતી હવે સામે આવી છે.

અમેરિકાની ચૂંટણી જીત્યા બાદ ડોનાલ્ડ ટ્રમ્પે રશિયન રાષ્ટ્રપતિ વ્લાદિમીર પુતિન સાથે વાત કરી હતી. સૂત્રોના જણાવ્યા અનુસાર બંને નેતાઓએ યુક્રેનની સ્થિતિ પર ચર્ચા કરી હતી. ડોનાલ્ડ ટ્રમ્પે પુતિનને યુદ્ધને આગળ ન વધારવા અપીલ કરી હતી.

આ બાબતથી વાકેફ લોકોએ જણાવ્યું કે બંને નેતાઓએ યુક્રેનમાં શાંતિ જાળવવા અંગે વાત કરી હતી. ટ્રમ્પે પુતિનને યુક્રેન યુદ્ધને વધુ આગળ ન વધારવાની સલાહ આપી અને તેમને યુરોપમાં અમેરિકાની સેનાની હાજરીની પણ યાદ અપાવી હતી.

ટ્રમ્પે ફ્લોરિડામાં પોતાના રિસોર્ટમાંથી વાતચીત કરી હતી. વાતચીતની શરૂઆતમાં પુતિને ટ્રમ્પને તેમની ચૂંટણી જીત પર અભિનંદન આપ્યા અને કહ્યું કે રશિયા અમેરિકા સાથે વાતચીત માટે તૈયાર છે. આ દરમિયાન બંને નેતાઓએ યુરોપમાં શાંતિ જાળવી રાખવા પર પણ ચર્ચા કરી હતી. જો કે, અમેરિકા કે રશિયાએ આ વાતચીતની પુષ્ટિ કરી નથી.

ટ્રમ્પે અગાઉ પણ યુક્રેન યુદ્ધને તાત્કાલિક બંધ કરવાનો દાવો કર્યો હતો. તેમ છતાં તેઓએ ક્યારેય સમજાવ્યું નથી કે તેઓ તેને કેવી રીતે યુદ્ધને અટકાવશે. રિપોર્ટ અનુસાર, ટ્રમ્પે સંકેત આપ્યો છે કે યુદ્ધને રોકવા માટે તેઓ રશિયા દ્વારા જીતેલા પ્રદેશને તેમની પાસે જ રહેવા દેવા માંગે છે.

ટ્રમ્પે મે 2023માં સૌપ્રથમ કહ્યું હતું કે યુદ્ધમાં રશિયનો અને યુક્રેનિયનો મરી રહ્યા છે. તેઓ આ યુદ્ધને 24 કલાકની અંદર બંધ કરાવી દેશે.

ટ્રમ્પે 70 દેશોના નેતાઓ સાથે વાત કરી છે, નેતન્યાહૂ સાથે 3 વખત વાત કરી છે ઈઝરાયલના વડાપ્રધાન બેન્જામિન નેતન્યાહુએ રવિવારે કહ્યું હતું કે તેઓ ચૂંટણી જીત્યા બાદ ટ્રમ્પ સાથે ત્રણ વખત વાત કરી ચૂક્યા છે. બંને વચ્ચેની વાતચીતનો હેતુ ઇઝરાયલ અને અમેરિકા વચ્ચેની ભાગીદારીને વધુ મજબૂત બનાવવાનો હતો. ટ્રમ્પ પણ ઈરાનને મોટુ જોખમ માને છે.

આ પહેલા ગુરુવારે NBC ન્યૂઝ સાથે વાત કરતા ટ્રમ્પે કહ્યું હતું કે ચૂંટણીમાં તેમની જીત બાદથી તેમણે 70 દેશોના નેતાઓ સાથે વાત કરી છે. આમાં યુક્રેનના રાષ્ટ્રપતિ વોલોદિમિર ઝેલેન્સકી પણ સામેલ છે. રિપોર્ટ અનુસાર, ટ્રમ્પ અને પુતિન વચ્ચેની વાતચીતની માહિતી યુક્રેનના અધિકારીઓને પણ આપવામાં આવી છે.

ટ્રમ્પના કોમ્યુનિકેશન ડાયરેક્ટર સ્ટીવન ચ્યુંગે ઈમેલમાં કહ્યું કે પૂર્વ રાષ્ટ્રપતિએ ઐતિહાસિક જીત મેળવી છે. વિશ્વભરના નેતાઓ જાણે છે કે ટ્રમ્પ ફરીથી અમેરિકાને વધુ ઊંચાઈ પર લઈ જશે. આ કારણે તેમણે ટ્રમ્પ સાથે વધુ મજબૂત સંબંધ બનાવવા માટે વાતચીત શરૂ કરી છે.

ટ્રમ્પ વિશ્વભરના નેતાઓ સાથે ખાનગી વાત કરી રહ્યા છે

રિપોર્ટ અનુસાર ટ્રમ્પ વિશ્વભરના નેતાઓ સાથે અંગત વાતચીત કરી રહ્યા છે. તેઓ સ્ટેટ ડિપાર્ટમેન્ટ કે યુએસ સરકારની મદદથી કોઈની સાથે વાત કરી રહ્યા નથી.

ખરેખર, ટ્રમ્પે હજુ સુધી જનરલ સર્વિસ એડમિનિસ્ટ્રેશન સાથે કરાર પર હસ્તાક્ષર કર્યા નથી. રાષ્ટ્રપતિ બન્યા પછી આ જરૂરી પ્રક્રિયા છે. ખરેખરમાં, ટ્રમ્પના ઘણા કોલ્સ તેમના પ્રથમ કાર્યકાળ દરમિયાન લીક થયા હતા. ત્યારથી ટ્રમ્પે સરકારી અધિકારીઓ પર બહુ ઓછો વિશ્વાસ કર્યો છે.

પુતિને ટ્રમ્પને તેમની જીતના બે દિવસ બાદ અભિનંદન પાઠવ્યા હતા

પુતિને ટ્રમ્પને તેમની જીતના બે દિવસ બાદ 5 નવેમ્બરે અભિનંદન પાઠવ્યા હતા. રશિયન રાષ્ટ્રપતિએ ટ્રમ્પને ‘હિંમતવાન વ્યક્તિ’ ગણાવ્યા હતા અને કહ્યું હતું કે તેમના પ્રથમ કાર્યકાળ દરમિયાન તેમને ‘દરેક બાજુથી હેરાન’ કરવામાં આવ્યા હતા. પુતિને ટ્રમ્પ પર થયેલા હુમલાનો પણ ઉલ્લેખ કર્યો હતો. તેમણે કહ્યું- ગોળી વાગ્યા બાદ ટ્રમ્પે પોતાના પર કાબૂ રાખ્યો હતો. આ ખૂબ જ હિંમતભર્યો અભિગમ હતો.

ટ્રમ્પ અને ઝેલેન્સકી વચ્ચેની વાતચીતમાં મસ્ક પણ સામેલ હતા

​​​​​​​ટ્રમ્પે 6 નવેમ્બરે ઝેલેન્સકી સાથે પણ વાત કરી હતી. આ વાતચીત 25 મિનિટ સુધી ચાલી હતી. આ દરમિયાન ટ્રમ્પે ઝેલેન્સકીને આશ્વાસન આપ્યું કે તેઓ રશિયા સાથે ચાલી રહેલા યુદ્ધમાં તેમની મદદ કરશે. ટ્રમ્પે ઝેલેન્સકીને કહ્યું કે તેઓ ડિપ્લોમેસીને બીજી તક આપવા માંગે છે. હું વચન આપું છું કે તમે મારાથી નિરાશ થશો નહીં.

આ વાતચીત બાદ ટ્રમ્પે મસ્કને ફોન સોંપ્યો હતો. મસ્કે ઝેલેન્સ્કી સાથે વાત કરી. ઝેલેન્સકીએ યુક્રેનને ઈન્ટરનેટ આપવા બદલ મસ્કનો આભાર માન્યો હતો. મસ્કએ કહ્યું કે તે તેના સ્ટારલિંક સેટેલાઇટ દ્વારા યુક્રેનને મદદ કરવાનું ચાલુ રાખશે.

2022માં યુદ્ધ શરૂ થયા બાદ રશિયાએ યુક્રેનમાં કોમ્યુનિકેશન નેટવર્કનો નાશ કર્યો હતો. ત્યારથી, મસ્કની સ્ટારલિંક સિસ્ટમ યુક્રેનમાં ઇન્ટરનેટ પ્રદાન કરી રહી છે.

અમેરિકા-રશિયા સંબંધિત આ સમાચાર પણ વાંચો…

ટ્રમ્પે કહ્યું હતું- 24 કલાકમાં યુક્રેનમાં યુદ્ધ બંધ કરી દઈશ: રશિયાએ કહ્યું- આ શક્ય નથી, પશ્ચિમી દેશો ઈચ્છે છે કે અમે લડતા રહીએ

સંયુક્ત રાષ્ટ્ર (યુએન)માં રશિયાના રાજદૂત વાસિલી નેબેન્ઝિયાએ કહ્યું કે ટ્રમ્પ યુક્રેન યુદ્ધને 24 કલાકમાં બંધ કરાવી શકે નહીં. આ પહેલા ડોનાલ્ડ ટ્રમ્પે પ્રેસિડેન્શિયલ ડિબેટમાં કહ્યું હતું કે જો તેઓ રાષ્ટ્રપતિ બનશે તો તેઓ યુક્રેન યુદ્ધને બંધ કરાવી ​​​​​​​દેશે.