શિયાળામાં સાંધાના દુખાવાથી કેવી રીતે છુટકારો મેળવવો: પૂરતું પાણી પીઓ, હૂંફાળા પાણીમાં મીઠું નાખી સ્નાન કરો

ઠંડીમાં, ઘણી વાર દુખાવો થાય છે, સાંધાઓ જકડાઈ જાય છે અને હલનચલનમાં સમસ્યાઓ આવે છે. સંધિવા, સાંધાની નબળાઈ અથવા કોઈ જૂની ઈજાથી પીડિત લોકોમાં આ સમસ્યા વધુ જોવા મળે છે, પરંતુ યોગ્ય કાળજી લઈને અને જીવનશૈલીમાં થોડો ફેરફાર કરીને તમે આ પીડાને ઘણી હદ સુધી ઘટાડી શકો છો.

ઘૂંટણ, કોણી અને હાથ જેવા સાંધાને ગરમ રાખવા માટે તેને સારી રીતે ઢાંકીને રાખો. તે સાંધાને ગરમ રાખે છે અને તેનાથી તેમનામાં લોહીનો પ્રવાહ સુધરે છે. આ સિવાય સ્ટ્રેચિંગ, યોગ અને વૉકિંગ જેવી શારીરિક પ્રવૃત્તિઓ સાંધાઓની ગતિમાં સુધારો કરે છે.

જો કે, વધુ પડતી કસરત ટાળો. તેનાથી પીડા વધી શકે છે. આ સિવાય આ ઉપાયો દુખાવાથી રાહત અપાવવામાં પણ મદદરૂપ થઈ શકે છે.

પાણીમાં મીઠું નાખીને સ્નાન કરવાથી બળતરા ઓછી થાય છે

હૂંફાળા પાણીમાં મીઠું ભેળવીને નહાવાથી સાંધાના દુખાવામાં ઘણી રાહત મળે છે. તેમાં મેગ્નેશિયમ હોય છે, જે ઈન્ફ્લેમેશન ઘટાડે છે. સ્નાયુઓને આરામ આપે છે. આ માટે નહાવાના 15-20 મિનિટ પહેલા નવશેકા પાણીમાં 2 કપ રોક મીઠું મિક્સ કરો. આ પછી સ્નાન કરો.

દરરોજ 10-15 મિનિટ માટે સૂર્યપ્રકાશ લો, મશરૂમ ખાઓ

વિટામિન D હાડકાંને મજબૂત બનાવવામાં અને સાંધાના દુખાવામાં રાહત અપાવવામાં મહત્ત્વની ભૂમિકા ભજવે છે. ઠંડા હવામાનમાં સૂર્યપ્રકાશના અભાવને કારણે વિટામિન Dનું સ્તર ઘટી શકે છે. આવી સ્થિતિમાં, દરરોજ 10 થી 15 મિનિટ સૂર્યપ્રકાશ લો.

આ સિવાય મશરૂમ વિટામિન Dનો પણ સારો સ્ત્રોત છે. તેને તમારા આહારમાં સામેલ કરો. ડૉક્ટરની સલાહ મુજબ તમે સપ્લીમેન્ટ્સ પણ લઈ શકો છો. આ સિવાય હળદર, આદુ અને લસણ જેવા પરંપરાગત ખોરાક પણ સાંધાના દુખાવામાં ઘણી રાહત આપે છે. તેમાં એવા ગુણધર્મો છે જે ઈન્ફ્લેમેશન ઘટાડે છે.

તાણ પર નિયંત્રણ રાખો, ડિહાઇડ્રેશન ન થવા દો

લાંબા સમય સુધી તણાવ પણ પીડા વધારી શકે છે. વધુ પડતા તાણવથી કોર્ટિસોલ હોર્મોન રિલીઝ થાય છે, જે ઈન્ફ્લેમેશન વધારે છે. આવી સ્થિતિમાં ધ્યાન, ઊંડા શ્વાસ જેવી પ્રવૃત્તિઓ દ્વારા તણાવને નિયંત્રિત કરો. આ સિવાય જરૂર પૂરતું પાણી પીઓ. પાણીની અછતથી પણ સાંધામાં દુખાવો વધે છે.

રેણુ રાખેજા જાણીતા ન્યુટ્રિશનિસ્ટ અને હેલ્થ કોચ છે.