દુનિયામાં છૂટાછેડા પાછળ નસકોરાં પણ જવાબદાર: 40% કપલ અલગ-અલગ ઊંઘે છે, નસકોરાં બોલાવતા પાર્ટનરની આ રીતે કરો મદદ

શું તમે જાણો છો કે નસકોરાંનો નજીવો લાગતો અવાજ અમેરિકામાં છૂટાછેડાનું ત્રીજું સૌથી મોટું કારણ બની ગયું છે? પહેલું કારણ છે બેવફાઈ એટલે કે લગ્નેતર સંબંધો અને બીજું કારણ છે ફાઈનાન્સ એટલે કે પૈસાને લઈને એ જ શાશ્વત લડાઈ.

અમેરિકન એકેડેમી ઓફ સ્લીપ મેડિસિન દ્વારા કરવામાં આવેલા સર્વેમાં આ ચોંકાવનારા આંકડા સામે આવ્યા છે.

MSD મેન્યુઅલના એક રિપોર્ટ અનુસાર, વિશ્વભરમાં લગભગ 57% પુરુષો અને 40% સ્ત્રીઓ નસકોરાં કરે છે. ભારત વિશે વાત કરવામાં આવે તો, લગભગ 43% લોકો ક્યારેક-ક્યારેક નસકોરાં કરે છે અને 20% લોકો નિયમિત રીતે નસકોરાં બોલાવે છે.

આંકડા દર્શાવે છે કે વિશ્વભરમાં મોટી વસ્તી નસકોરાંની સમસ્યાથી પરેશાન છે. છૂટાછેડાનો દર ઊંચો હોય તેવા પશ્ચિમી દેશોમાં નસકોરાંને કારણે સંબંધો પણ તૂટી રહ્યા છે.

ભારતમાં છૂટાછેડાનું પ્રમાણ ઓછું છે, પરંતુ નસકોરાંને કારણે અહીં પણ સંબંધો પર વિપરીત અસર થઈ રહી છે. પરિણામે, છૂટાછેડાને બદલે એકબીજામાં મતભેદ થાય છે, પતિ-પત્ની અલગ-અલગ રૂમમાં સૂઈ રહ્યા છે અને દેખીતી રીતે જ તેની અસર સેક્સ લાઈફ ઉપર પણ થઈ રહી છે.

માત્ર 20% કપલમાં નસકોરાંને કારણે કોઈ સમસ્યા નથી
વિશ્વમાં લગભગ અડધા લોકો નસકોરાં બોલાવે છે. એક અનુમાન મુજબ, લગભગ 80% લોકો કાં તો પોતે નસકોરાં બોલાવે છે અથવા નસકોરાં મારતા પાર્ટનર સાથે સૂઈ જાય છે.

આનો અર્થ એ છે કે વિશ્વમાં ફક્ત 20% કપલ એવા છે કે જેમાં કોઈ પાર્ટનર નસકોરાં નથી બોલાવતો અને તેમનો સંબંધ નસકોરાંના જોખમોથી દૂર છે. બાકીના 80% યુગલો આ સમસ્યાથી પીડિત છે. આ જ કારણ છે કે દુનિયાભરના સંબંધો માટે નસકોરાંનો અવાજ એક મોટો પડકાર બનીને ઉભરી આવ્યો છે.

સ્લીપ ડિવોર્સમાં પાર્ટનર્સ છૂટાછેડા લીધા વગર અલગથી સૂવાનું શરૂ કરે છે.
સાયકોલોજી ટુડેનું સંશોધન સૂચવે છે કે 25 થી 40% પરિણીત કપલ નસકોરાં જેવા કારણોસર નિયમિત ધોરણે અલગથી સૂવાનું પસંદ કરે છે. જેના કારણે તેમનામાં ઈમોશનલ અને ફિઝિકલ લગાવ ઓછો થઇ જાય છે. પરિણામે સંબંધ તૂટવાની આરે પહોંચી જાય છે. આવા પાર્ટનરની સેક્સ લાઈફ પણ બગડે છે.

આ સ્થિતિને સ્લીપ ડિવોર્સ કહેવામાં આવે છે. જેમાં પાર્ટનર સંપૂર્ણપણે અલગ નથી. પરંતુ રિલેશનશિપમાં હોવા છતાં તેમની વચ્ચેનો લગાવ ઘણો ઓછો થઈ જાય છે.

શું નસકોરાં માટે પાર્ટનર જવાબદાર છે?
યુનિવર્સિટી ઓફ કેલિફોર્નિયાના ન્યુરોસાયન્સ એન્ડ સાયકોલોજીના પ્રોફેસર મેથ્યુ વોકર કહે છે કે શ્વાસ લીધા પછી સારી અને ગાઢ ઊંઘ એ સ્વસ્થ જીવનનો પાયો છે. નસકોરાં લેવાથી સંબંધો પર નેગેટિવ અસર પડે છે, પરંતુ લોકો ઘણીવાર ભૂલી જાય છે કે જે પાર્ટનર નસકોરાં લે છે તે ખરેખર તેના માટે જવાબદાર નથી. આ સ્વાસ્થ્યની સ્થિતિ છે, જેને ગંભીરતાથી લેવાની જરૂર છે. આવા કપલને ઉપચારની નહીં, તબીબી સહાયની જરૂર હોય છે.

જો તમારો પાર્ટનર ઊંઘ દરમિયાન નસકોરાં કરે છે તો આ ઉપાયો અપનાવો

નસકોરાંને આરોગ્યની સ્થિતિ તરીકે માનો, તબીબી મદદ લો
જો નસકોરાં​​​​​​​ને સ્વાસ્થ્ય સમસ્યા તરીકે જોવામાં આવે, જે તે છે, તો તે સરળતાથી ઠીક થઈ શકે છે. આ માટે અનેક પ્રકારની દવાઓ અને હેક્સ ઉપલબ્ધ છે. આ માટે ડાબી પડખે સૂવું, વજન ઘટાડવું અને ગળાને ભેજવાળા રાખવાની સલાહ આપવામાં આવે છે.

પરંતુ સંબંધને નસકોરાંની સમસ્યાથી બચાવવા શું કરવું જોઈએ? ડો. રેયાન સ્યુસનું સંશોધન દર્શાવે છે કે નસકોરાં પહેલાં શરીર અને પછી મનને અસર કરે છે.

નસકોરાંની તબીબી અસરો પરસ્પર સંવાદ અને સમજણ દ્વારા ઘટાડી શકાતી નથી, પરંતુ આમ કરવાથી નસકોરાંની નકારાત્મક અસરો ચોક્કસ અંશે ઘટાડી શકાય છે.

પ્રોફેસર મેથ્યુ વોકર કહે છે કે નસકોરાંને કારણે સંબંધો પર જે નેગેટિવ અસર પડે છે તે હકીકતમાં નસકોરાંને કારણે થતી નથી. તેનું મૂળ કારણ રિજેક્શન છે. મતલબ કે જે પાર્ટનર નસકોરાંની સમસ્યાથી પીડિત છે તે તેને સ્વીકારશે નહીં. ડૉક્ટર પાસે જવાનો કે તબીબી મદદ લેવાનો ઇનકાર કરશે. બીજા પાર્ટનરની ફરિયાદને સમજવા અને સ્વીકારવાને બદલે, તે તેને વ્યક્તિગત નિષ્ફળતા અથવા હુમલા તરીકે જોશે. મોટા ભાગના કિસ્સાઓમાં એવું જોવા મળે છે કે વાસ્તવિક સમસ્યા નસકોરાંની જ નથી. ભાગીદારો વાસ્તવમાં એકબીજાને તેમના મંતવ્યો જણાવવામાં સક્ષમ નથી.

તો આ માટે કરવાની વાત એ છે કે પાર્ટનરના નસકોરાં માટે એકબીજાને દોષી ઠેરવવા નહીં. તેને વ્યક્તિગત સમસ્યા તરીકે જોવાને બદલે, તેને સંબંધ માટે સામાન્ય પડકાર તરીકે જુઓ.

જો એક પાર્ટનર નસકોરાં લે છે, તો બીજાએ તેના વિશે સહાનુભૂતિપૂર્વક વિચારવું જોઈએ. જો એક ભાગીદાર નસકોરાં વિશે ફરિયાદ કરે છે, તો બીજાએ તેને વ્યક્તિગત હુમલો ન ગણવો જોઈએ, પરંતુ તેને વાસ્તવિક ચિંતા તરીકે જોવું જોઈએ. કારણ કે સમસ્યા માત્ર નસકોરાં​​​​​​​ના અવાજની નથી. સમસ્યા એ પણ છે કે જે વ્યક્તિ નસકોરાં મારતી હોય તેનું સ્વાસ્થ્ય અને ઊંઘની ગુણવત્તા પણ સારી નથી હોતી.

જો બંને પક્ષો તેને સંવેદનશીલતા અને ગંભીરતાથી લે તો તે માત્ર એક સ્વાસ્થ્ય સમસ્યા બની રહેશે, જેને માત્ર સમજદારીથી જ નહીં પરંતુ સરળતાથી દૂર પણ કરી શકાય છે.