મુંબઈ/બેંગ્લોર5 મિનિટ પેહલા
- કૉપી લિંક
NIAએ ISIS સાથે જોડાયેલા નેટવર્કની શોધી કાઢ્યું છે, જે ભારતમાં ISISની વિચારધારા ફેલાવવાનો પ્રયાસ કરી રહ્યા હતા.
નેશનલ ઈન્ટેલિજન્સ એજન્સી (NIA)એ શનિવારે સવારે દેશના બે રાજ્યો મહારાષ્ટ્ર અને કર્ણાટકમાં કુલ 44 સ્થળો પર દરોડા પાડ્યા હતા. દરોડા બાદ એજન્સીએ પુણેમાંથી 13 લોકોની ધરપકડ કરી છે. કહેવામાં આવી રહ્યું છે કે આ લોકો આતંકી સંગઠન ISIS સાથે જોડાયેલા છે.
એજન્સીએ મહારાષ્ટ્રમાં 43 અને કર્ણાટકમાં એક જગ્યાએ સર્ચ ઓપરેશન હાથ ધર્યું હતું. એજન્સીએ થાણે ગ્રામીણમાં સૌથી વધુ 31, પુણેમાં બે, થાણે શહેરમાં 9, ભાયંદરમાં એક અને કર્ણાટકમાં એક જગ્યાએ દરોડા પાડ્યા હતા.
તપાસ એજન્સીના સૂત્રોના જણાવ્યા અનુસાર, NIAએ ISIS સાથે જોડાયેલા એક નેટવર્કને શોધી કાઢ્યું છે, જે ભારતમાં ISISની વિચારધારા ફેલાવવાનો પ્રયાસ કરી રહ્યું હતું. જેમાં વિદેશમાં બેઠેલા ISIS હેન્ડલર્સની મદદ લેવામાં આવી રહી હતી.
તેમનો ઉદ્દેશ્ય ભારતમાં આતંકવાદી ગતિવિધિઓને અંજામ આપવાનો હતો. આ લોકો ભારતમાં ISIS વિચારધારાથી પ્રભાવિત યુવાનોને પોતાના સંગઠનમાં સામેલ કરતા હતા. તેમને IED બનાવવાની ટ્રેનિંગ આપવામાં આવી હતી.
ISIS મોડ્યુલ કેસમાં 7 આરોપીઓ પૂણેથી ઝડપાયા હતા
NIAએ અગાઉ પણ ISIS મોડ્યુલ કેસમાં પુણેમાં કાર્યવાહી કરી હતી. અહીંથી સાત લોકોની ધરપકડ કરવામાં આવી હતી. 6 નવેમ્બરે આ 7 આરોપીઓ સામે ચાર્જશીટ દાખલ કરવામાં આવી હતી. 12 નવેમ્બરના રોજ બહાર આવ્યું હતું કે સાતેય આરોપીઓ ઉચ્ચ શિક્ષિત હતા.
આ લોકો જાણીતી કંપનીઓમાં કામ કરતા હતા અને ઇમ્પ્રુવાઇઝ્ડ એક્સપ્લોઝિવ ડિવાઇસ (IED) બનાવવા માટે કોડવર્ડમાં વાત કરતા હતા. NIAએ કોર્ટમાં 4 હજાર પેજની ચાર્જશીટ દાખલ કરી છે.
આ ઉપરાંત આરોપીઓએ IED બનાવવા માટે વોશિંગ મશીન ટાઈમર, થર્મોમીટર, સ્પીકર વાયર, 12 વોટનો બલ્બ, 9 વોટની બેટરી, ફિલ્ટર પેપર, મેચસ્ટિક્સ અને બેકિંગ સોડા જેવી સરળતાથી ઉપલબ્ધ વસ્તુઓનો પણ ઉપયોગ કરતા હતા.
આરોપીઓએ મહારાષ્ટ્ર, ગોવા, કેરળ અને કર્ણાટકમાં આતંકવાદી હુમલાને અંજામ આપ્યો હતો. તેણે ફોટોગ્રાફી અને વીડિયોગ્રાફી માટે ડ્રોનનો પણ ઉપયોગ કર્યો હતો, જેને એજન્સીએ જપ્ત કરી લીધો છે.
કોથરુડ પોલીસ સ્ટેશનમાં તહેનાત કોન્સ્ટેબલ પ્રદીપ ચવ્હાણ (ડાબે) અને અમોલ નાજન (જમણે). આ બેના કારણે ISIS મોડ્યુલને પકડી શકાય છે.
શું છે પુણે ISIS મોડ્યુલ કેસ?
આ વર્ષે 18 જુલાઈના રોજ, પૂણે પોલીસે શાહનવાઝ અને મધ્યપ્રદેશના બે લોકો – મોહમ્મદ ઈમરાન ખાન અને મોહમ્મદ સાકીની પુણેમાં ટુ-વ્હીલરની ચોરીના સંબંધમાં ધરપકડ કરી હતી. જ્યારે પોલીસ તેને પૂછપરછ માટે તેના ઠેકાણા પર લઈ જઈ રહી હતી ત્યારે શાહનવાઝ પોલીસની કારમાંથી કૂદીને નાસી છૂટ્યો હતો.
મોહમ્મદ ઈમરાન ખાન અને મોહમ્મદ સાકીની પૂછપરછ દરમિયાન પોલીસને ખબર પડી કે બંને સુફા આતંકવાદી ગેંગમાં સામેલ છે. એપ્રિલ 2022માં રાજસ્થાનમાં એક કારમાંથી વિસ્ફોટક મળી આવવાના કેસમાં ત્યાંની પોલીસ તેને શોધી રહી છે.
ત્યારબાદ પોલીસે આ કેસને પુણે ISIS મોડ્યુલ કેસ નામ આપ્યું. આ કેસમાં પોલીસે વધુ ત્રણ આતંકીઓને મોસ્ટ વોન્ટેડ લિસ્ટમાં રાખ્યા હતા. તેમના નામ પૂણેના તલ્હા લિયાકત ખાન અને રિઝવાન અબ્દુલ હાજી અલી અને દિલ્હીના અબ્દુલ્લા ફૈયાઝ શેખ છે.
શાહનવાઝ પુણે પોલીસની કસ્ટડીમાંથી ભાગી ગયો હતો અને હાલમાં દિલ્હીમાં રહેતો હતો. તેના પર 3 લાખ રૂપિયાનું ઈનામ હતું.
આ કેસનો માસ્ટર માઇન્ડ અને ફાઇનાન્સર IT એન્જિનિયર છે
NIAનું કહેવું છે કે ઈમરાન, યુનુસ અને શાહનવાઝ પુણેની એક આઈટી ફર્મમાં કામ કરતા એન્જિનિયર ઝુલ્ફીકાર અલી બોરદવાલા સાથે સંબંધ ધરાવે છે. ISIS સાથે જોડાયેલા એક કેસમાં જુલ્ફીકારની 3 જુલાઈએ ધરપકડ કરવામાં આવી હતી. તે મુંબઈની આર્થર રોડ જેલમાં કેદ છે.
NIAના એક અધિકારીએ ભાસ્કરને જણાવ્યું કે ઝુલ્ફીકાર આ કેસનો માસ્ટરમાઇન્ડ અને ફાઇનાન્સર છે. તેણે ઈમરાન, યુનુસ અને શાહનવાઝને ટ્રેનિંગ આપી અને પૈસા મોકલ્યા. ઈમરાનને પૈસા પહોંચાડનાર કદીર દસ્તગીર પઠાણની પણ પોલીસે ધરપકડ કરી છે.
ડો. અદનાન ગરીબ યુવાનોને ISISમાં સામેલ કરાવી રહ્યો હતો
ચારેયની પૂછપરછ દરમિયાન NIAને ડૉ.અદનાનનું નામ મળ્યું. જ્યારે NIAએ તેના ફ્લેટ પર દરોડા પાડ્યા ત્યારે ISIS સાથે જોડાયેલા દસ્તાવેજો મળી આવ્યા હતા. NIAએ અદનાનના તમામ ઈલેક્ટ્રોનિક ગેજેટ્સ જપ્ત કર્યા છે. સેન્ટ્રલ ઇન્વેસ્ટિગેશન એજન્સી સાથે સંકળાયેલા એક અધિકારીએ કહ્યું કે અદનાન પાસે જે દસ્તાવેજો મળ્યા છે તેનાથી ખબર પડી છે કે તેના ISIS સાથે સંબંધો છે. તેમાં ગરીબ યુવાનોને આતંકવાદી સંગઠનો સાથે જોડવાની વિગતો પણ છે.
આ સિવાય 4 આરોપીઓ પાસેથી જ્યુઈશ કોમ્યુનિટી સેન્ટરની તસવીરો મળી આવી છે. આનાથી સ્પષ્ટ થઈ ગયું કે માત્ર ભારત જ નહીં પરંતુ ઇઝરાયલના લોકો પણ આઈએસઆઈએસના નિશાના પર છે. આ પછી મુંબઈ પોલીસે કોલાબામાં ચાબડ હાઉસની સુરક્ષા વધારી દીધી છે. 26 નવેમ્બર 2008ના રોજ મુંબઈ પર થયેલા આતંકવાદી હુમલા દરમિયાન ચાબડ હાઉસ પર પણ હુમલો કરવામાં આવ્યો હતો.
અદનાન સહિત પાંચ આરોપીઓની પૂછપરછ કર્યા બાદ NIA અકીફ અતીક નાચન સુધી પહોંચી. તે IED ટેસ્ટ કરવામાં નિષ્ણાત છે. તેણે જ ઈમરાન અને મોહમ્મદ યુનુસને છુપાવ્યા હતા. મુંબઈના બોરીવલી, થાણે અને ભિવંડીમાં દરોડા પાડીને અકીફની ધરપકડ કરવામાં આવી હતી.
કોંડવાના ફ્લેટમાં IED બનાવવાની ટ્રેનિંગ લીધી
કોર્ટમાં આપવામાં આવેલી રિમાન્ડ અરજીમાં NIAએ જણાવ્યું હતું કે આરોપીઓએ ISISની આતંકવાદી પ્રવૃતિઓને આગળ વધારવાનું કાવતરું ઘડ્યું હતું. તેઓ દેશમાં ISISનું મહારાષ્ટ્ર મોડ્યુલ તૈયાર કરી રહ્યા હતા. NIAના એક અધિકારીએ જણાવ્યું હતું કે IED બનાવવામાં ઉપયોગમાં લેવાતી સામગ્રી અકીફ અતીક નાચને ખરીદી હતી. તે ઘણા દિવસો સુધી ઈમરાન અને યુનુસના કોંડવા ફ્લેટમાં રહેતો હતો અને તેમને તાલીમ આપતો હતો. તેણે 2022માં બોમ્બ બનાવવાની ટ્રેનિંગ આપી હતી. જેમાં ડેમો IED પણ બનાવીને બતાવવામાં આવ્યો હતો.
અધિકારીએ કહ્યું કે ધરપકડ કરાયેલા આરોપીઓ સિવાય કેટલાક અન્ય લોકોએ પણ આ ટ્રેનિંગમાં ભાગ લીધો હતો. તેમની શોધખોળ ચાલુ છે. આ તમામ ISISના નિર્દેશો પર કામ કરતા હતા.
નાચનના ઘરેથી મળી આવેલા દસ્તાવેજોમાં તાલીમના પુરાવા મળ્યા છે
NIAના અધિકારીએ જણાવ્યું કે અકીફ અતીક નાચનનું ઘર થાણેના પડગામાં છે. ઘરમાંથી કેટલાક મોબાઈલ ફોન, કેટલીક હાર્ડ ડિસ્ક અને હસ્તલિખિત દસ્તાવેજો મળી આવ્યા હતા. તમામની તપાસ કરવામાં આવી રહી છે. તેમાં IED તાલીમના કેટલાક દસ્તાવેજો પણ સામેલ છે.
આ આરોપીઓની ધરપકડથી સ્પષ્ટ થાય છે કે ISIS ભારતમાં પોતાની હાજરી વધારવાનો પ્રયાસ કરી રહ્યું છે. તમામ આરોપીઓ કોંડવા વિસ્તારના છે. 5 લાખની વસ્તી ધરાવતું કોંડવા 2008 પહેલા પ્રતિબંધિત આતંકવાદી સંગઠન સિમી અને ઈન્ડિયન મુજાહિદ્દીનનો ગઢ હતો. અહીં 300થી વધુ આતંકીઓ સક્રિય હોવાની માહિતી મળી હતી.
2010માં કોંડવામાંથી પાકિસ્તાની આતંકવાદી સંગઠન લશ્કર-એ-તૈયબાના બે આતંકીઓની ધરપકડ કરવામાં આવી હતી. તેઓ બેંગલુરુમાં ઈન્ડિયન સાયન્સ ઈન્સ્ટિટ્યુટ પર હુમલો કરવાની યોજના બનાવી રહ્યા હતા. 2014માં NIAએ એક વ્યક્તિની ધરપકડ કરી હતી. 2022માં NIAએ ISIS મોડ્યુલ સાથે સંકળાયેલા 5 લોકોની ધરપકડ કરી હતી.
