કેનેડામાં ત્રીજી વખત તિરંગાનું અપમાન: ખાલિસ્તાનીઓએ પગ નીચે કચડીને પ્રદર્શન કર્યું; કેનેડાની પોલીસે પણ અટકાવ્યા નહીં, શીખોને ગેરમાર્ગે દોરી રહ્યા

કેનેડામાં ભારતીય દૂતાવાસની બહાર તિરંગાને પગ નીચે કચડીને વિરોધ કરી રહેલા ખાલિસ્તાનીઓ.

​​​​​​કેનેડાના વૈંકુવરમાં ખાલિસ્તાનીઓએ ભારતીય દૂતાવાસની બહાર તિરંગાને પગ નીચે કચડીને તેનું અપમાન કર્યું છે. કટ્ટરવાદીઓએ ભારત વિરોધી સૂત્રોચ્ચાર કરીને શીખોને ગેરમાર્ગે દોર્યા છે અને અમેરિકામાં ખાલિસ્તાન રેફરન્ડમમાં વધુને વધુ મતદાન કરવા કહ્યું છે. તિરંગાનું અપમાન થતું જોઈને કેનેડાની પોલીસ પણ તેમને અટકાવી રહી નહોતી. કેનેડામાં એક મહિનામાં આ પ્રકારનું ત્રીજું પ્રદર્શન છે.

આ વિરોધ પ્રદર્શન બાદ ભારતની પ્રતિક્રિયા હજુ સામે આવી નથી, પરંતુ ભારતીય તપાસ એજન્સી NIA તેને લઈને સતર્ક છે. એક મહિના પહેલા ટોરોન્ટોમાં ભારતીય દૂતાવાસની બહાર પ્રદર્શન થયું હતું. આ દરમિયાન પણ ખાલિસ્તાનીઓએ તિરંગાનું અપમાન કર્યું હતું. રસ્તા પર તિરંગો પાથરવામાં આવ્યો, તેના પર ચંપલ મુકવામાં આવ્યા અને તેને આગ ચાંપી દેવામાં આવી હતી.

ભારતીય રાજદ્વારી સંજય કુમાર વર્માની ધરપકડ કરવાની માંગ
આતંકવાદી હરદીપ સિંહ નિજ્જરની હત્યાને 140 દિવસ થઈ ગયા છે અને ખાલિસ્તાની સમર્થકો સતત ભારતીય રાજદ્વારી સંજય કુમાર વર્માની ધરપકડની માંગ કરી રહ્યા છે. આ દરમિયાન ખાલિસ્તાની સમર્થકો માઈક અને ખાલિસ્તાનના ઝંડા લઈને ભારતીય દૂતાવાસની બહાર પહોંચ્યા હતા.

અમેરિકામાં ઘણા ખાલિસ્તાની સંગઠનો સક્રિય થઈ રહ્યા છે
બીજી તરફ, શીખ ફોર જસ્ટિસ (SJF) અમેરિકામાં ખાલિસ્તાનનો મુદ્દો ઉઠાવવામાં એકલું નથી. અમેરિકામાં ઘણી નવી સંસ્થાઓ ઝડપથી સક્રિય થઈ રહી છે. વર્લ્ડ શીખ સંસદ (WSP) એ ખાલિસ્તાન સમર્થક સંગઠન છે, જેણે ન્યૂયોર્કમાં તેની 5મી સામાન્ય સભામાં અલગ પંજાબની માંગને સમર્થન જાહેર કર્યું છે.

શીખ યુથ ફોર અમેરિકા પણ એક નવું સંગઠન છે, જે ખાલિસ્તાનનું સમર્થન કરે છે. તેના 200થી વધુ સભ્યો છે. અમેરિકામાં શીખ ફોર જસ્ટિસ (SJF)નું ભારત વિરોધી અભિયાન ચરમસીમાએ છે. SJFએ પંજાબને ભારતથી અલગ દેશ બનાવવા માટે 28 જાન્યુઆરીએ સાન ફ્રાન્સિસ્કો, કેલિફોર્નિયામાં ખાલિસ્તાન લોકમત યોજવાની જાહેરાત કરી છે.

28 જાન્યુઆરીએ સાન ફ્રાન્સિસ્કોમાં ખાલિસ્તાન માટે રેફરેંડમ
અમેરિકા પણ ભારત વિરુદ્ધ ષડયંત્ર રચી રહેલા ખાલિસ્તાનીઓને રોકી રહ્યું નથી. ખાલિસ્તાની આતંકવાદી ગુરપતવંત સિંહ પન્નુની હત્યાના ષડયંત્રના ભારત પર અમેરિકાના આરોપોને કારણે બંને દેશોના સંબંધોમાં પહેલેથી જ તણાવ છે. આ દરમિયાન, કેલિફોર્નિયામાં થઈ રહેલા કથિત રેફરેંડમને કારણે બંને દેશો વચ્ચેના સંબંધો વણસી શકે છે.

ખરેખરમાં, ભારતે 2019માં અલગતાવાદને સમર્થન આપવા બદલ શીખ ફોર જસ્ટિસ સંસ્થા પર પ્રતિબંધ મૂક્યો હતો. SJFના પ્રવક્તાનું કહેવું છે કે 28 જાન્યુઆરીએ સાન ફ્રાન્સિસ્કોમાં મતદાન થવાનું છે. અગાઉ ખાલિસ્તાન માટે 2021માં લંડન, જિનીવા અને સ્વિટ્ઝર્લેન્ડ, 2022માં ઈટાલી, 2022માં ટોરોન્ટો અને બ્રેમ્પટન અને 2023માં ઓસ્ટ્રેલિયાના મેલબોર્નમાં રેફરેંડમ થયું હતું.

વડાપ્રધાન મોદી અને સીએમ યોગી હિન્દુ આતંકવાદી છે તેવા પોસ્ટર લગાવ્યા
ખાલિસ્તાનીઓએ વિરોધ પ્રદર્શન દરમિયાન વડાપ્રધાન નરેન્દ્ર મોદી અને ઉત્તર પ્રદેશના સીએમ યોગી આદિત્યનાથના ફોટાની નીચે ‘હિન્દુ આતંકવાદી’ લખ્યું હતું. ખાલિસ્તાનીઓએ કહ્યું કે હરદીપ સિંહ નિજ્જરને સુનિયોજિત કાવતરાના ભાગરૂપે એજન્સીઓએ શિકાર બનાવ્યો છે. તે હરદીપ નિજ્જરના પરિવારને ન્યાય અપાવશે.