‘કોંગ્રેસનો અવિશ્વાસ પ્રસ્તાવ કાટ લાગેલી છરી’: ઉપરાષ્ટ્રપતિએ કહ્યું- બાયપાસ સર્જરી માટે ક્યારેય શાકભાજી કાપવાની છરીનો ઉપયોગ નથી કરતા

સંસદના શિયાળુ સત્રના 10મા દિવસે (10 ડિસેમ્બર) વિપક્ષી સાંસદોએ રાજ્યસભાના અધ્યક્ષ જગદીપ ધનખર વિરુદ્ધ અવિશ્વાસ પ્રસ્તાવ રજૂ કર્યો હતો. 20 ડિસેમ્બરે રાજ્યસભાના મહાસચિવ પીસી મોદીએ કહ્યું કે, આ પ્રસ્તાવને ઉપાધ્યક્ષ હરિવંશે ફગાવી દીધો છે.

ઉપાધ્યક્ષે કહ્યું કે, આ નોટિસ વિપક્ષનું ખોટું પગલું છે. જેમાં ઉપરાષ્ટ્રપતિનું નામ પણ ખોટું લખવામાં આવ્યું છે અને નોટિસ માટે 14 દિવસનો સમયગાળો પણ આપવામાં આવ્યો નથી. આ માત્ર અધ્યક્ષની છબી ખરાબ કરવાના હેતુથી લાવવામાં આવ્યું છે. આ નોટિસ દેશની બંધારણીય સંસ્થાઓને બદનામ કરવા અને વર્તમાન ઉપરાષ્ટ્રપતિની છબીને કલંકિત કરવાના ષડયંત્રનો એક ભાગ છે.

ખડગેએ કહ્યું- અધ્યક્ષ ધનખર શાળાના મુખ્ય શિક્ષકની જેમ વર્તે છે

ઈન્ડિયા બ્લોકે 11 ડિસેમ્બરે રાજ્યસભાના અધ્યક્ષ જગદીપ ધનખર વિરુદ્ધ લાવવામાં આવેલા અવિશ્વાસ પ્રસ્તાવ પર પ્રેસ કોન્ફરન્સ કરી હતી. કોંગ્રેસ અધ્યક્ષ મલ્લિકાર્જુન ખડગેએ કહ્યું- અધ્યક્ષ રાજ્યસભામાં શાળાના મુખ્ય શિક્ષકની જેમ વર્તે છે. જો વિપક્ષી સાંસદ 5 મિનિટ માટે ભાષણ આપે છે, તો તેઓ 10 મિનિટ માટે તેના પર ટિપ્પણી કરે છે.

સ્પીકર ગૃહની અંદર વિપક્ષના નેતાઓને પોતાના વિરોધીઓ તરીકે જુએ છે. વરિષ્ઠ હોય કે જુનિયર, તેઓ વાંધાજનક ટિપ્પણી કરીને વિપક્ષી નેતાઓનું અપમાન કરે છે. તેમના વર્તનને કારણે અમને અવિશ્વાસ પ્રસ્તાવ લાવવાની ફરજ પડી છે.

ખડગેએ અવિશ્વાસ પ્રસ્તાવ લાવવાના 5 કારણો આપ્યા…

જગદીપ ધનખર જુલાઈ 2022માં ભારતના ઉપરાષ્ટ્રપતિ બન્યા. ઉપરાષ્ટ્રપતિ રાજ્યસભાના અધ્યક્ષ છે.

• ગૃહમાં અનુભવી નેતાઓ, પત્રકારો, લેખકો અને પ્રોફેસરો છે. ઘણા ક્ષેત્રોમાં કામ કરીને ગૃહમાં આવ્યા છે. અધ્યક્ષ એવા નેતાઓને પણ ઉપદેશ આપે છે જેમને 40-40 વર્ષનો અનુભવ હોય.
• સામાન્ય રીતે વિપક્ષ ખુરશીનું રક્ષણ માગે છે, જો ખુરશી વડાપ્રધાન અને શાસક પક્ષના વખાણ કરતી હોય તો વિપક્ષનું કોણ સાંભળે.
• છેલ્લા ત્રણ વર્ષમાં ધનખરનું વર્તન પદની ગરિમાની વિરુદ્ધનું રહ્યું છે. ક્યારેક તે સરકારના ગુણગાન ગાય છે તો ક્યારેક પોતાને RSSનો એકલવ્ય કહે છે. આવા રેટરિક તેમના પદને અનુરૂપ નથી.
• જ્યારે પણ વિપક્ષ સવાલો પૂછે છે ત્યારે અધ્યક્ષ પોતે મંત્રીઓ સમક્ષ સરકારની ઢાલ બનીને ઉભા રહે છે.
• તેમની સામે અમારી કોઈ અંગત દુશ્મની, નફરત કે રાજકીય લડાઈ નથી. અમે દેશના નાગરિકોને નમ્રતાપૂર્વક જણાવવા માંગીએ છીએ કે અમે બંધારણ અને લોકશાહીને બચાવવા માટે ખૂબ વિચારણા અને મજબૂરીમાં આ પગલું ભર્યું છે.