યુપીમાં ગાઢ ધુમ્મસ, 67 ટ્રેનો 10 કલાક લેટ: સિમલામાં 2 દિવસમાં પારો 11º ગગડ્યો; બિહાર-રાજસ્થાનમાં સ્કૂલોમાં રજા

દેશના ઉત્તર અને મધ્ય ભારતીય રાજ્યોમાં તાપમાનનો પારો સતત ગગડી રહ્યો છે. આ સાથે ગાઢ ધુમ્મસની અસર પણ જોવા મળી રહી છે.

યુપીના 64 જિલ્લામાં ગાઢ ધુમ્મસને કારણે વિઝિબિલિટી ઘટીને 50 મીટર થઈ ગઈ છે. જેના કારણે 67 ટ્રેનો 10 કલાક મોડી પહોંચી હતી. મહોબામાં ઠંડીના કારણે એક યુવકનું મોત થયું હતું.

હિમાચલમાં હિમવર્ષાને કારણે ઘણા શહેરોમાં તાપમાનમાં ઘટાડો નોંધાયો છે. છેલ્લા 48 કલાકમાં સિમલામાં મહત્તમ તાપમાન 11.4 ડિગ્રી ઘટીને 5.6 ડિગ્રી થયું છે.

સતત ઘટી રહેલા તાપમાન અને કોલ્ડવેવને જોતા બિહારના પટના સહિત 4 જિલ્લા અને રાજસ્થાનના જયપુર સહિત 19 જિલ્લામાં ધોરણ 8 સુધીની રજા જાહેર કરવામાં આવી છે.

હવામાન વિભાગે પંજાબ, હરિયાણા, ચંદીગઢ સહિત 15 રાજ્યોમાં ધુમ્મસનું એલર્ટ જાહેર કર્યું છે. તેમજ, અરુણાચલ, આસામ, મેઘાલય, નાગાલેન્ડ, તમિલનાડુ, પુડુચેરીમાં વરસાદની આગાહી કરવામાં આવી છે.

રાજ્યોના હવામાનની તસવીરો…

ચંદીગઢ: શહેરમાં રવિવારે સાંજે હળવો વરસાદ પડ્યો હતો.

રાજસ્થાન: જયપુરમાં ગાઢ ધુમ્મસ છવાયું હતું.

મહારાષ્ટ્રઃ મુંબઈમાં રવિવારે સવારે ધુમ્મસ છવાયું હતું.

દિલ્હીઃ ગણતંત્ર દિવસની તૈયારીઓ કર્તવ્ય પથ પર ચાલી રહી છે.

રાજસ્થાન: જોધપુરમાં પણ ગાઢ ધુમ્મસ છવાયું છે.

ઉત્તર પ્રદેશ: ઘણા દિવસોથી ગાઢ ધુમ્મસને કારણે આગ્રામાં વ્યુ પોઈન્ટથી તાજમહેલ બિલકુલ દેખાતો નહોતો. જોકે, રવિવારે તાજની ઝલક જોવા મળી હતી.

કાશ્મીરમાં તાપમાનનો પારો વધવા છતાં માઈનસમાં તાપમાન

• લઘુત્તમ તાપમાનમાં નજીવો વધારો થયો હોવા છતાં કાશ્મીરમાં રાતભર વાદળછાયા આકાશને કારણે પારો માઈનસમાં યથાવત છે.
• શ્રીનગરમાં -3°, ગુલમર્ગમાં -5.6°, પહલગામમાં -6.2°, કાઝીગુંડમાં -4°, કોનિબલમાં -3.6°, કુપવાડામાં -4° તાપમાન નોંધાયું હતું.
• જમ્મુ અને કાશ્મીરમાં કડકડતી ઠંડીનો સમયગાળો ચિલ્લાઇ-કલાંને હજુ 17 દિવસ બાકી છે. જે 30 જાન્યુઆરીએ પૂર્ણ થશે.

દિલ્હીમાં તાપમાન 9 ડિગ્રીએ પહોંચી ગયું છે

હવામાન વિભાગના જણાવ્યા અનુસાર, રવિવારે દિલ્હીનું મહત્તમ તાપમાન 17.3 ડિગ્રી સેલ્સિયસ હતું, જે સામાન્ય કરતાં બે ડિગ્રી ઓછું હતું, જ્યારે લઘુત્તમ તાપમાન એક ડિગ્રી વધીને 9 ડિગ્રી સેલ્સિયસ નોંધાયું હતું. વેસ્ટર્ન ડિસ્ટર્બન્સના કારણે શહેરમાં અને આસપાસ હળવો વરસાદ પડ્યો હતો.

કેવું રહેશે આગામી 2 દિવસમાં તાપમાન…

14 જાન્યુઆરી: 9 રાજ્યોમાં વરસાદ, ઉત્તર ભારતમાં ગાઢ ધુમ્મસ

• અરુણાચલ પ્રદેશ, નાગાલેન્ડ, મણિપુર, મિઝોરમ, ત્રિપુરા, આસામ, મેઘાલય, તમિલનાડુ, આંધ્રપ્રદેશમાં વરસાદ પડશે.
• હિમાચલ પ્રદેશ, ઉત્તરાખંડ, પંજાબ, હરિયાણા, યુપી, રાજસ્થાનમાં ગાઢ ધુમ્મસ જોવા મળશે.
• તમિલનાડુ અને પુડુચેરીમાં પણ વીજળી પડવાનું એલર્ટ આપવામાં આવ્યું છે. માછીમારોને દરિયાકિનારાથી દુર રહેવાની સલાહ આપવામાં આવી છે.

15 જાન્યુઆરી: 3 રાજ્યોમાં વરસાદ, 7માં ધુમ્મસ

• તમિલનાડુ, પુડુચેરી, કેરળમાં વરસાદનું એલર્ટ.
• હિમાચલ, યુપી, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં ગાઢ ધુમ્મસ રહેશે.
• પંજાબ, દિલ્હી, હરિયાણા, રાજસ્થાન, તમિલનાડુ, પુડુચેરી અને કેરળમાં વીજળી પડી શકે છે.

રાજ્યોમાં હવામાનની સ્થિતિ…

મધ્યપ્રદેશ: માલવા-નિમારમાં ઝરમર વરસાદની શક્યતા, 15 જાન્યુઆરીએ અડધો MP વાદળછાયું રહેશે

ભોપાલમાં વરસાદ પડી રહ્યો છે. મકરસંક્રાંતિના દિવસે માલવા-નિમાર એટલે કે ઈન્દોર-ઉજ્જૈન ડિવિઝનમાં વાદળછાયું અને ઝરમર વરસાદની શક્યતા છે. આવી સ્થિતિમાં પતંગ ઉડાડવામાં મુશ્કેલી પડી શકે છે. તેમજ, 15 જાન્યુઆરીએ એમપીના અડધા ભાગમાં વાદળછાયું વાતાવરણ અને ઝરમર વરસાદનું એલર્ટ છે.