Related posts
ચેન્નાઈ40 મિનિટ પેહલા
- કૉપી લિંક
તમિલનાડુની DMK પાર્ટીના સાંસદ ગણેશમૂર્તિનું 76 વર્ષની વયે નિધન થયું છે. તેમણે ગુરુવારે સવારે 5 વાગ્યે કોઈમ્બતુરની એક ખાનગી હોસ્પિટલમાં અંતિમ શ્વાસ લીધા હતા. ચાર દિવસ પહેલા તેમણે દવા પીને આપઘાત કરવાનો પ્રયાસ કર્યો હતો, ત્યારથી તેઓ હોસ્પિટલમાં દાખલ હતા. તેમના અંતિમ સંસ્કાર આજે કરવામાં આવશે.
મીડિયા રિપોર્ટ્સ અનુસાર, એવું અનુમાન લગાવવામાં આવી રહ્યું છે કે લોકસભા ચૂંટણી માટે પાર્ટી તરફથી ટિકિટ ન મળતા તેઓ ડિપ્રેશનમાં હતા, જેના કારણે તેણે આત્મહત્યાનો પ્રયાસ કર્યો હતો. જંતુનાશક દવા પીધા બાદ તેમને ઉલટીઓ થવા લાગી અને બેચેની થવા લાગી હતી.
જ્યારે તેમણે તેના પરિવારને દવા પીધી હોવા વિશે જણાવ્યું, ત્યારે તેમને પહેલા ઈરોડ શહેરની હોસ્પિટલમાં લાવવામાં આવ્યા, પરંતુ તેની હાલત ગંભીર હોવાને કારણે ડોક્ટરોએ તેને કોઈમ્બતુરની ખાનગી હોસ્પિટલમાં ખસેડ્યા હતા. જ્યાં તેમની હાલત વધુને વધુ ગંભીર હોવાનું જણાવાયું હતું.
ECMO સિસ્ટમથી સારવાર ચાલી રહી હતી
ગણેશમૂર્તિની સ્થિતિ ગંભીર હોવાને કારણે, ડૉક્ટરોએ તેમને ECMO (એક્સ્ટ્રાકોર્પોરિયલ મેમ્બર્સ ઓક્સિજન) સિસ્ટમ પર મૂક્યા હતા, પરંતુ તેમનું શરીર આ સારવારને રિસ્પોન્સ આપી રહ્યું ન હતું. તેમના મૃત્યુ પર ડીએમકે પાર્ટીના પ્રમુખ વાઈકોએ કહ્યું કે હોસ્પિટલમાં દાખલ કરતી વખતે તેઓ બેભાન થઈ ગયા હતા, અમને ખબર નથી કે તેમણે આવું કેમ કર્યું. પાર્ટીના સૂત્રોના જણાવ્યા અનુસાર સાંસદના પાર્થિવ દેહને ઈરોડના પેરિયાર નગર ખાતે તેમના નિવાસસ્થાને લઈ જવામાં આવશે.
1989માં પ્રથમ વખત ધારાસભ્ય, 1998માં લોકસભા સાંસદ બન્યા
ગણેશમૂર્તિ તેમના શાળાના દિવસોમાં DMK ની વિદ્યાર્થી વિંગના સંયુક્ત આયોજક હતા. 1984માં તેઓ DMK વિદ્યાર્થી વિંગના ઇરોડ જિલ્લા સચિવ તરીકે નિયુક્ત થયા. 1989માં, તેમણે પાર્ટીની ટિકિટ પર મોદાકુરાચી વિધાનસભા બેઠક જીતી.
1996માં, જ્યારે વાઈકોએ પાર્ટીને વિભાજીત કરી અને મરુમાલાર્ચી દ્રવિડ મુનેત્ર કઝગમ (MDMK) શરૂ કરી, ત્યારે ગણેશમૂર્તિ તેમની સાથે નવી પાર્ટીમાં જોડાયા. 1998 અને 2009માં તેઓ MDMKની ટિકિટ પર ઈરોડથી લોકસભામાં ચૂંટાયા હતા. 2019માં તેઓ DMKની ટિકિટ પર જીત્યા હતા.
સૂત્રોએ જણાવ્યું – પારિવારિક સમસ્યાઓના કારણે ગણેશમૂર્તિએ દવા પીધી
ગણેશમૂર્તિના મૃત્યુ બાદ MDMKના સૂત્રોએ જણાવ્યું હતું કે ટિકિટ ન મળવાના કારણે ગણેશમૂર્તિએ આત્મહત્યાનો પ્રયાસ કર્યો હોવાનું કહેવું ખોટું હશે. તેમણે કહ્યું કે આગામી લોકસભા ચૂંટણી માટે સીટ વહેંચણીની ચર્ચા વચ્ચે ગણેશમૂર્તિને ટિકિટ મળવાની તમામ શક્યતાઓ હતી. સૂત્રોએ આશંકા વ્યક્ત કરી હતી કે ગણેશમૂર્તિએ પારિવારિક સમસ્યાઓના કારણે દવા પીધી હશે.
