જમ્મુ-કાશ્મીરના કુલગામમાં સેના- આતંકવાદીઓ વચ્ચે એન્કાઉન્ટર ચાલુ: એક જવાન શહીદ, 2-3 આતંકીઓ છુપાયા; સેનાએ આતંકીઓનો ઘેરાવ કર્યો

સેના અને જમ્મુ-કાશ્મીર પોલીસના જવાનો આ સંયુક્ત ઓપરેશનને અંજામ આપી રહ્યા છે.

​​​​​​જમ્મુ-કાશ્મીરના કુલગામના મુદરધમમાં આતંકવાદીઓ સાથેની અથડામણમાં ઘાયલ થયેલા સેનાનો એક જવાન શહીદ થયો છે. શનિવાર (6 જુલાઈ) બપોરથી સુરક્ષા દળો અને આતંકવાદીઓ વચ્ચે એન્કાઉન્ટર ચાલી રહ્યું છે. આતંકવાદીઓની ગોળીથી ઘાયલ થયેલા જવાનને હોસ્પિટલમાં લઈ જવામાં આવ્યો હતો, જ્યાં તેનું મોત નીપજ્યું હતું.

જમ્મુ-કાશ્મીરમાં સુરક્ષા દળોનું ઓપરેશન ચાલુ છે. બંને તરફથી ગોળીબાર થઈ રહ્યો છે. આ સંયુક્ત ઓપરેશન સેના અને જમ્મુ-કાશ્મીર પોલીસના જવાનો દ્વારા હાથ ધરવામાં આવી રહ્યું છે. હજુ સુધી એ સ્પષ્ટ નથી થયું કે સુરક્ષા દળોએ કેટલા આતંકીઓને ઘેરી લીધા છે.

સેનાના ઓપરેશનની તસવીરો…

26 જૂને ડોડામાં 3 આતંકવાદીઓનો ઠાર કરવામાં આવ્યા હતા
26 જૂને ડોડા જિલ્લાના ગંડોહ વિસ્તારમાં સુરક્ષા દળોએ ત્રણ આતંકવાદીઓને ઠાર માર્યા હતા. સવારે આ વિસ્તારમાં 2-3 આતંકીઓ છુપાયા હોવાની માહિતી મળ્યા બાદ પોલીસ અને સેનાએ સર્ચ ઓપરેશન શરૂ કર્યું હતું, ત્યારબાદ સવારે 9.50 વાગ્યે એન્કાઉન્ટર શરૂ થયું હતું.

આ એન્કાઉન્ટરમાં જમ્મુ-કાશ્મીર પોલીસમાં તહેનાત સ્પેશિયલ ઓપરેશન ગ્રુપનો એક જવાન પણ ઘાયલ થયો હતો. આશિક હુસૈન નામના આ સૈનિકને ડોડાની સરકારી મેડિકલ હોસ્પિટલમાં દાખલ કરવામાં આવ્યો હતો. અહીં ડોક્ટરોએ જણાવ્યું કે તેના જમણા પગમાં ગોળી વાગી હતી.

અધિકારીઓએ કહ્યું હતું કે ડોડામાં 11 અને 12 જૂને આતંકી હુમલો થયો હતો. ત્યારથી સેના, CRPF અને જમ્મુ-કાશ્મીર પોલીસ સર્ચ ઓપરેશન ચલાવી રહી છે. આજે સવારે સિનુ પંચાયત ગામમાં 2-3 આતંકીઓ છુપાયા હોવાની માહિતી મળી હતી. આ દરમિયાન, આતંકવાદીઓએ જવાનો પર ગોળીબાર કર્યો હતો.