અંબાલા43 મિનિટ પેહલા
- કૉપી લિંક
પોલીસે અંબાલામાં ખેડૂતોના ઘરે પહોંચીને પૂછપરછ કરી હતી. બીજી તરફ ખેડૂત નેતા સરવન સિંહ પંઢેરે દેશભરના ખેડૂતોને રેલ રોકો આંદોલનમાં જોડાવા હાકલ કરી છે.
આજે 10 માર્ચે ખેડૂત આંદોલન-2નો 27મો દિવસ છે. ખેડૂતો બપોરે 12 વાગ્યાથી 4 વાગ્યા સુધી દેશભરમાં ટ્રેનોને રોકશે. જેમાં મહિલા ખેડૂતો પણ ભાગ લેશે. પંજાબમાં 22 જિલ્લાઓમાં 52 સ્થળોએ ખેડૂતો પાટા પર બેસી જશે. હરિયાણાના સિરસામાં 3 સ્થળોએ રેલવે ટ્રેક બ્લોક કરવાની તૈયારી છે. કિસાન મજદૂર મોરચાના સંયોજક સરવન સિંહ પંઢેરે ઉત્તર ભારતના 30 જિલ્લાઓમાં ટ્રેનો રોકવાની હાકલ કરી છે.
રેલવે વિભાગ મુજબ, ખેડૂતોએ અંબાલા ડિવિઝનમાં ટ્રેક બ્લોક કરવા માટે 21 જગ્યાઓ પસંદ કરી છે. જેના કારણે ઘણી ટ્રેનોને અસર થશે. પોલીસે રેલ રોકો આંદોલનમાં ભાગ લેનારાઓ સામે કાર્યવાહી કરવાની ચેતવણી આપી છે.
અંબાલા પોલીસે ખેડૂત નેતાઓને નોટિસ ફટકારી
આ તરફ ખેડૂતોના રેલ રોકો આંદોલન પહેલા પોલીસે પણ કડક કાર્યવાહી શરૂ કરી છે. આંદોલન અંગે નોંધાયેલા કેસમાં અંબાલા પોલીસે ઘણા ખેડૂત નેતાઓના ઘરો પર દરોડા પાડ્યા અને કેસ મામલે તેમને પૂછપરછ માટે બોલાવ્યા છે. જો તેઓ હાજર નહીં થાય તો કાર્યવાહી કરવાની ચેતવણી આપવામાં આવી છે.
અંબાલા પોલીસે ખેડૂત નેતાઓને નોટિસ ફટકારી છે.
બીજી તરફ યુનાઈટેડ કિસાન મોરચા (SKM) એ 14 માર્ચે દિલ્હીના રામલીલા મેદાનમાં મહાપંચાયતનું આયોજન કર્યું છે. તેને ખેડૂત-મજૂર મહાપંચાયત નામ આપવામાં આવ્યું છે.
પત્રકારો સાથે વાત કરતા ખેડૂત આગેવાન સરવનસિંહ પંઢેર અને અન્ય.
પંઢેરે કહ્યું- સ્ટેશન કે ફાટક પર જ ટ્રેન રોકાશે
રેલ રોકો આંદોલનમાં ભાગ લેવા ખેડૂત નેતા સરવનસિંહ પંઢેરે અપીલ કરી છે. તેમણે કહ્યું કે ટ્રેનને રેલવે સ્ટેશન અને ફાટક પર જ રોકવામાં આવશે, કારણ કે જો તમે ટ્રેકની વચ્ચે બેસી જશો તો નુકસાન થઈ શકે છે. આ એક પ્રતીકાત્મક આંદોલન હશે. ખેડૂતોએ બપોરે 12 થી 4 વાગ્યા સુધી ટ્રેન રોકવી જોઈએ.
પંઢેરે વધુમાં કહ્યું કે મોદી સરકાર કહી રહી છે કે આ આંદોલન પંજાબનું છે. સરકાર હવે જાણશે કે આ કોનું આંદોલન છે. પંઢેરે માતાઓ અને બહેનોને રેલ રોકો આંદોલનમાં ભાગ લેવાની અપીલ પણ કરી છે.
RPF અધિકારીઓએ કહ્યું- ટ્રેક જામ કરનારાઓ સામે કાર્યવાહી કરવામાં આવશે
આરપીએફ, જીઆરપી અને ગુપ્તચર એજન્સીઓ ખેડૂતોના રેલ રોકો આંદોલન પર નજર રાખી રહી છે. ટ્રેનો અને સ્ટેશનો પર સઘન ચેકિંગ ઝુંબેશ ચલાવવામાં આવી રહી છે. શંકાસ્પદ લોકોની પૂછપરછ કરવામાં આવી રહી છે.
આરપીએફના વરિષ્ઠ ડીએસસી નીતિશ શર્માએ કહ્યું કે આરપીએફ તરફથી સંપૂર્ણ વ્યવસ્થા છે. જ્યાં ખેડૂતો ટ્રેક પર બેસશે તે દરેક જગ્યાએ આરપીએફની ટીમો તહેનાત છે. જો ટ્રેક બ્લોક થશે તો ખેડૂતો સામે પણ કાર્યવાહી કરવામાં આવશે.
ડીઆરએમ મનદીપ સિંહ ભાટિયાએ જણાવ્યું કે અંબાલા ડિવિઝનમાં 21 સ્થળોએ ખેડૂતો બેસશે. આ ડિવીઝનમાં દરરોજ 220 મેલ, એક્સપ્રેસ, 100 પેસેન્જર અને લગભગ 150 માલગાડી ચાલે છે.
ખેડૂતો અને કેન્દ્ર વચ્ચે 4 રાઉન્ડની વાટાઘાટો થઈ ચૂકી છે
પંજાબ અને હરિયાણાની શંભુ અને ખનૌરી બોર્ડર પર 13 ફેબ્રુઆરીથી ખેડૂતો ઉભા છે. ખેડૂત નેતાઓ અને કેન્દ્ર વચ્ચે ચાર રાઉન્ડની વાતચીત થઈ છે. ચોથી બેઠકમાં કેન્દ્રએ ખેડૂતોને 5 પાકો (કપાસ, મકાઈ, મસૂર, તુવેર અને અડદ) પર MSPનો પ્રસ્તાવ મૂક્યો હતો. જો કે, ખેડૂત આગેવાનોએ સરકારના આ પ્રસ્તાવને ફગાવી દીધો હતો.
બીજી તરફ કેન્દ્રીય મંત્રી પીયૂષ ગોયલે કહ્યું કે સરકાર આ સિઝનથી આ પાક પર MSP આપશે.
હાઈકોર્ટે ખેડૂત આગેવાનોને ફટકાર લગાવી છે
પંજાબ અને હરિયાણા હાઈકોર્ટે શંભુ અને ખનૌરી બોર્ડર પર ચાલી રહેલા ખેડૂતોના આંદોલન પર કડક ટિપ્પણી કરી છે. ખેડૂત નેતા બલબીર રાજેવાલ અને અન્યો દ્વારા દાખલ કરવામાં આવેલી અરજી પર હાઈકોર્ટે કહ્યું કે ખેડૂતોના આંદોલનમાં બાળકોને આગળ કરવામાં આવી રહ્યા છે. બાળકોની આડમાં હથિયારો સાથે પ્રદર્શનો કરવામાં આવી રહ્યા છે તે ખૂબ જ શરમજનક બાબત છે. માતાપિતા કેવા છે? શું ખેડૂતો કોઈ યુદ્ધ કરવા માગે છે? આ પંજાબની સંસ્કૃતિ નથી.
પંજાબી સિંગરનું ગીત YouTube પરથી હટાવી દેવામાં આવ્યું
ખેડૂત આંદોલન-2 પર અંબાલાના પંજાબી ગાયક રેશમ સિંહ અનમોલનું ગીત YouTube પરથી હટાવી દેવામાં આવ્યું છે. ખેડૂત સંગઠનોએ પોતે આ માહિતી તેમના સોશિયલ મીડિયા ગ્રુપમાં શેર કરી છે. રેશમ સિંહ અનમોલ પહેલા દિવસથી આંદોલનમાં સક્રિય હતા અને લંગર સેવામાં પણ ભાગ લેતા હતા.
