ઉત્તર પ્રદેશમાં પૂર, 350 ગામ ડૂબ્યા: ભારે વરસાદના લીધે 24 કલાકમાં 4નાં મોત; આજે 22 રાજ્યોમાં એલર્ટ; જુઓ, તબાહીના ડરામણાં ફોટોઝ

ઉત્તર પ્રદેશમાં ભારે વરસાદને કારણે અનેક જિલ્લાઓમાં પૂર જેવી સ્થિતિ પ્રવર્તી રહી છે. લખીમપુર ખીરી પૂરથી સૌથી વધુ અસરગ્રસ્ત છે. અહીં 5 તાલુકાઓના 350 ગામોમાં પાણી ફરી વળ્યા છે. તેમજ, લલિતપુરમાં વરસાદને કારણે ગોવિંદ સાગર ડેમના વધુ 4 દરવાજા ખોલવા પડ્યા હતા. પહેલેથી જ 16 દરવાજા ખોલાયા છે. જેના કારણે આસપાસના વિસ્તારોમાં પાણી ભરાઈ ગયા હતા.

શનિવારે ઉત્તરાખંડ અને ઉત્તર પ્રદેશમાં ભારે વરસાદને કારણે ચાર લોકોના મોત થયા હતા. ઉત્તરાખંડના નવી ટિહરીમાં ભૂસ્ખલનમાં એક માતા અને પુત્રીનું મૃત્યુ થયું હતું, જ્યારે ઉત્તર પ્રદેશના જાલૌન જિલ્લામાં વીજળી પડતાં બે લોકોના મોત થયા હતા.

મહારાષ્ટ્રના પુણેમાં 24 જુલાઈએ ભારે વરસાદમાં તણાઈ ગયેલા 26 વર્ષીય યુવકનો મૃતદેહ શનિવારે મળી આવ્યો હતો. પુણેમાં બુધવારથી અત્યાર સુધીમાં છ લોકોના મોત થયા છે. નવી મુંબઈમાં શનિવારે એક ઈમારત ધરાશાયી થતા ત્રણ લોકોના મોત થયા હતા અને અન્ય બે લોકો ઘાયલ થયા હતા. હવામાન વિભાગે આજે 22 રાજ્યોમાં ભારે વરસાદનું એલર્ટ જાહેર કર્યું છે.

ક્યાં અતિ ભારે અને ક્યાં ભારે વરસાદનું એલર્ટ

અતિ ભારે વરસાદનું એલર્ટ- રાજસ્થાન, ગુજરાત, મહારાષ્ટ્ર, ગોવા, કર્ણાટક, કેરળ

ભારે વરસાદનું એલર્ટ- ઉત્તરાખંડ, હિમાચલ પ્રદેશ, મધ્ય પ્રદેશ, છત્તીસગઢ, ઓડિશા, તમિલનાડુ, પુડુચેરી, પશ્ચિમ બંગાળ, સિક્કિમ, આસામ, મેઘાલય, નાગાલેન્ડ, ત્રિપુરા, મિઝોરમ, મણિપુર, અરુણાચલ પ્રદેશ.

વાવાઝોડું અને વીજળીની ચેતવણી: મહારાષ્ટ્ર, ગુજરાત, છત્તીસગઢ, મધ્ય પ્રદેશ, બિહાર, પશ્ચિમ બંગાળ, ઝારખંડ, આસામ, મેઘાલય, નાગાલેન્ડ, ત્રિપુરા, મિઝોરમ, મણિપુર, અરુણાચલ પ્રદેશ, સિક્કિમ, તમિલનાડુ, પુડુચેરી.

દેશભરમાંથી વરસાદની તસવીરો…

ઉત્તરાખંડના સોનપ્રયાગમાં પહાડો પરથી પથ્થરો પડ્યા હતા. ઘણા પ્રવાસીઓ માંડ માંડ બચ્યા હતા.

કર્ણાટકના મંડ્યામાં શનિવારે સામાન્ય કરતાં 199% વધુ વરસાદ નોંધાયો હતો. જેના કારણે રસ્તા પર પાણી ભરાઈ ગયા હતા.

ઉત્તરાખંડના બાગેશ્વરમાં વરસાદને કારણે ભૂસ્ખલન થયું, જેમાં એક કાર ફસાઈ ગઈ. ક્રેનની મદદથી કારને બહાર કાઢવામાં આવી હતી.

રુદ્રપ્રયાગમાં મંદાકિની નદીના કિનારે બનેલા ઘરોની નીચેની માટીનું ધોવાણ થઈ રહ્યું છે.

રુદ્રપ્રયાગમાં વરસાદને કારણે તુટેલા રસ્તા પર કેદારનાથના યાત્રિકો ચાલી રહ્યા છે.

ટિહરી-ગઢવાલમાં ભૂસ્ખલનના કાટમાળ નીચે માતા-પુત્રી દટાયા હતા. સર્ચ ઓપરેશન દરમિયાન બંનેના મૃતદેહ મળી આવ્યા હતા.

ચમોલીમાં ભારે વરસાદ બાદ થરાલી-કર્ણપ્રયાગ નેશનલ હાઈવે પર ભૂસ્ખલનને કારણે કાટમાળ રસ્તા પર વિખરાઈ ગયો હતો.

પંજાબના જલંધરમાં શનિવારે 9.4 મીમી વરસાદ નોંધાયો હતો, જે સામાન્ય કરતા 33% વધુ છે. જેના કારણે રસ્તાઓ પર પાણી ભરાઈ ગયા હતા.

હિમાચલમાં ચોમાસાની શરૂઆતથી અત્યાર સુધીમાં 56 લોકોના મોત
હિમાચલ પ્રદેશમાં ચોમાસાની શરૂઆતથી, વરસાદ સંબંધિત ઘટનાઓમાં 56 લોકોના મોત થયા છે અને રાજ્યને અત્યાર સુધીમાં 410 કરોડ રૂપિયાનું નુકસાન થયું છે. ઈમરજન્સી ઓપરેશન સેન્ટરના જણાવ્યા અનુસાર, 21 લોકો ઊંચાઈ પરથી પડી જવાને કારણે, 18 લોકો ડૂબી જવાથી, 8 લોકો સાપના ડંખને કારણે, 8 ઈલેક્ટ્રીક શોક લાગવાને કારણે અને એક વ્યક્તિ પૂરમાં તણાઈ જવાને કારણે મૃત્યુ પામ્યા હતા. ભૂસ્ખલન કે વાદળ ફાટવાના કારણે કોઈ મૃત્યુના અહેવાલ નથી.

આગામી દિવસોમાં હવામાન કેવું રહેશે…