4 મિનિટ પેહલા
- કૉપી લિંક
મંગળવારે મોડી રાત્રે એડનની ખાડીમાં અન્ય એક જહાજ પર ડ્રોન હુમલો કરવામાં આવ્યો હતો. જહાજમાં જ્યાં આગ લાગી તે જગ્યા લાલ વર્તુળમાં દેખાય છે.
યમન નજીક અરબ સાગરમાં ફરી વધુ એક જહાજ પર ડ્રોન હુમલો કરવામાં આવ્યો છે. આ હુમલા બાદ જહાજમાં આગ લાગી હતી. જો કે બાદમાં આગ પર કાબુ મેળવી લેવાયો હતો. જેન્કો પિકાર્ડી નામના આ જહાજ પર માર્શલ આઇલેન્ડનો ધ્વજ ફરકતો હતો. ભારતીય નૌસેનાએ જણાવ્યું કે આ હુમલો મંગળવારે રાત્રે લગભગ 11.11 વાગ્યે થયો હતો.
નેવીના જણાવ્યા અનુસાર હુમલા સમયે જહાજ યમનના એડન પોર્ટથી લગભગ 111 કિમી દૂર એડનની ખાડીમાં હતું. હુમલા પછી તરત જ જહાજે મદદ માટે સિગ્નલ મોકલ્યા હતા. જહાજમાં 22 ક્રૂ મેમ્બર છે જેમાંથી 9 ભારતીય છે. હુમલામાં કોઈને નુકસાન થયું નથી. ડ્રોન હુમલાની માહિતી મળતા જ નેવીએ યુદ્ધ જહાજ INS વિશાખાપટ્ટનમને મદદ માટે રવાના કરી દીધુ હતું.
રાત્રે લગભગ 12.30 વાગે યુદ્ધ જહાજ ત્યાં પહોંચ્યું અને હુમલાનું નિરીક્ષણ કર્યું. આગથી જહાજને નુકસાન થયું ન હતું. બોમ્બ નિષ્ણાતોએ જણાવ્યું હતું કે જહાજ તેની આગળની યાત્રા ચાલુ રાખી શકે છે. જો કે આ હુમલો કોણે કર્યો તે અંગેની માહિતી હજુ સામે આવી નથી.
જહાજમાં લાગેલી આગ ઓલવાઈ ગઈ છે. નેવીએ કહ્યું કે આ હુમલામાં કોઈને નુકસાન થયું નથી.
અમેરિકાએ હુતીઓ પર ચોથી વખત હુમલો કર્યો
અરબી સમુદ્રમાં જહાજ પર હુમલો ત્યારે થયો જ્યારે યુએસ સેનાએ બુધવારે ચોથી વખત યમનમાં હુતી વિદ્રોહીઓ પર હુમલો કર્યો. ન્યૂયોર્ક ટાઈમ્સના જણાવ્યા અનુસાર, હવાઈ હુમલામાં હુતીઓની 14 મિસાઈલો અને લોન્ચરનો નાશ કરવામાં આવ્યો છે.
અમેરિકાએ ટોમહોક મિસાઈલથી 3 સ્થળો પર હુમલો કર્યો. અમેરિકાનું કહેવું છે કે તે યમનમાં હુમલા કરીને અરબ સાગરમાં જહાજો પર હુતી હુમલાઓને રોકવાનો પ્રયાસ કરી રહ્યું છે. જો કે, હુતીઓએ કહ્યું છે કે તેઓ ગાઝાના સમર્થનમાં જહાજો પર હુમલા ચાલુ રાખશે.
જયશંકરે ઈરાનને જહાજો પર હુમલા રોકવાની અપીલ કરી હતી
અમેરિકા સતત ઈરાન પર હુતી વિદ્રોહીઓને હુમલા માટે શસ્ત્રો પૂરા પાડવાનો આરોપ લગાવે છે. આવી સ્થિતિમાં દરિયાઈ હુમલામાં વધારો થયા બાદ વિદેશ મંત્રી એસ જયશંકર સોમવારે ઈરાનની 2 દિવસની મુલાકાતે ગયા હતા. અહીં તેમણે રાષ્ટ્રપતિ ઈબ્રાહિમ રાયસી અને ઈરાનના વિદેશ મંત્રી સાથે મુલાકાત કરી.
બેઠક બાદ સંયુક્ત નિવેદનમાં જયશંકરે કહ્યું હતું કે- ભારતની આસપાસના જહાજો પર હુમલાઓ આંતરરાષ્ટ્રીય સમુદાય માટે ગંભીર ચિંતાનો વિષય છે. આની સીધી અસર ભારતના ઉર્જા અને આર્થિક હિતો પર પડે છે. આવી સ્થિતિમાં તેમને તાત્કાલિક રોકવા જોઈએ. વિશ્વના લગભગ 15% શિપિંગ આવરજવર આ દરિયાઈ માર્ગથી થાય છે.
તસવીરમાં ભારતના વિદેશ મંત્રી જયશંકર ઈરાની વિદેશ મંત્રી અમીર-અબ્દુલ્લાહિયન સાથે વાત કરતા જોવા મળે છે. (ક્રેડિટ- IRNA)
હુતીઓ અને ચાંચિયાઓ દ્વારા હુમલા વધ્યા
દરિયામાં જહાજો પર હૂતીઓ અને ચાંચિયાઓ દ્વારા કરવામાં આવતા હુમલાઓ પણ ભારતને અસર કરી રહ્યા છે. બંને જૂથોએ ઘણી વખત ભારતમાં આવતા જહાજો અથવા ભારતીય ક્રૂ સાથેના જહાજો પર હુમલો કર્યો છે. આવા જ કેટલાક કિસ્સાઓ પર એક નજર…
5 જાન્યુઆરી 2024
4 જાન્યુઆરીએ, સોમાલિયાના ચાંચિયાઓએ અરબ સાગરમાં લાઇબેરિયન-ધ્વજવાળા જહાજ લીલા નોર્ફોકને હાઇજેક કર્યું હતું. ભારતીય નૌકાદળે 5 જાન્યુઆરીએ અહેવાલ આપ્યો હતો કે જહાજે UK મેરીટાઇમ ટ્રેડ ઓપરેશન્સ (UKMTO) પોર્ટલ પર સંદેશ મોકલ્યો હતો. એવું કહેવાય છે કે 4 જાન્યુઆરીની સાંજે 5-6 ચાંચિયાઓ હથિયારો સાથે જહાજ પર ઉતર્યા હતા.
માહિતી મળતાની સાથે જ ભારતીય નૌકાદળે અપહરણ કરાયેલા જહાજને બચાવવા યુદ્ધ જહાજ INS ચેન્નાઈ અને મેરીટાઇમ પેટ્રોલિંગ એરક્રાફ્ટ P8I રવાના કર્યા હતા. આ પછી, જહાજમાં સવાર 15 ભારતીયો સહિત તમામ 21 ક્રૂ સભ્યોને સુરક્ષિત રીતે બહાર કાઢવામાં આવ્યા હતા.
આ ફૂટેજ તે સમયના છે જ્યારે ભારતીય નૌકાદળની બોટ અપહરણ કરાયેલા જહાજની ખૂબ નજીક આવી હતી.
23 ડિસેમ્બર 2023
આ પહેલા 23 ડિસેમ્બરે ભારત આવી રહેલા કાર્ગો શિપ કેમ પ્લુટો પર હિંદ મહાસાગરમાં હુમલો કરવામાં આવ્યો હતો. તેમાં 21 ભારતીયો અને એક વિયેતનામી ક્રૂ મેમ્બર હતા. સાઉદી અરેબિયાથી ઓઈલ લઈને ભારત આવતું આ જહાજ જાપાનનું હતું અને લાઈબેરિયાના ધ્વજ હેઠળ ઓપરેટ થતું હતું. હુમલા સમયે, જહાજ પોરબંદરના દરિયાકાંઠે 217 નોટિકલ માઈલ (લગભગ 400 કિમી) દૂર હતું.
14 ડિસેમ્બર 2023
ચાંચિયાઓએ માલ્ટાથી જહાજને હાઇજેક કર્યું હતું. આ પછી, ભારતીય નૌકાદળે એડનની ખાડીમાં અપહરણ કરાયેલા જહાજ એમવી રુએનની મદદ માટે તેનું એક યુદ્ધ જહાજ મોકલ્યું. જહાજને 6 લોકોએ હાઇજેક કર્યું હતું.
ભારતીય નૌકાદળે માલ્ટાના જહાજમાંથી એક નાવિકને બચાવી લીધો હતો. ધ મેરીટાઇમ એક્ઝિક્યુટિવના અહેવાલ મુજબ, હાઇજેક કરાયેલું જહાજ કોરિયાથી તુર્કી જઈ રહ્યું હતું. ત્યારબાદ સોમાલિયાના ચાંચિયાઓએ તેના પર હુમલો કર્યો.
19 નવેમ્બર 2023
વીડિયોમાં હુતી વિદ્રોહીઓ હેલિકોપ્ટરમાંથી ઉતર્યા બાદ જહાજને હાઈજેક કરતા દેખાય છે.
હુતી વિદ્રોહીઓએ લાલ સમુદ્રમાં કાર્ગો જહાજ ગેલેક્સી લીડરને હાઇજેક કર્યું હતું. તેમણે તેનો વીડિયો પણ જાહેર કર્યો હતો. આ જહાજ તુર્કીથી ભારત આવી રહ્યું હતું. હુતી વિદ્રોહીઓએ તેને ઇઝરાયલી જહાજ સમજીને હાઇજેક કરી લીધું હતું. જે હેલિકોપ્ટરમાંથી હુતી વિદ્રોહીઓ જહાજ પર કૂદી પડ્યા હતા તેના પર પેલેસ્ટિનિયન ધ્વજ હતો.
