વારાણસી6 કલાક પેહલા
- કૉપી લિંક
વારાણસીના જ્ઞાનવાપી પરિસરમાં બનેલા વજૂખાનાની સફાઈનું કામ શનિવારે પૂર્ણ થયું હતું. સુપ્રીમ કોર્ટના આદેશ પર મ્યુનિસિપલ ફિશરીઝ વિભાગ સહિત 26 સભ્યોની ટીમે સફાઈની કામગીરી પૂર્ણ કરી હતી. વારાણસીના ડીએમ ઘટનાસ્થળે હાજર હતા. આ દરમિયાન CRPF અને પોલીસ દ્વારા ચુસ્ત બંદોબસ્ત ગોઠવવામાં આવ્યો હતો.
હિંદુ પક્ષના વકીલ સુભાષ નંદન ચતુર્વેદીએ જણાવ્યું હતું કે સુપ્રીમ કોર્ટના આદેશ મુજબ સફાઈ કરવામાં આવી હતી, બંને પક્ષોની સંમતિથી સફાઈ કાર્ય યોગ્ય રીતે કરવામાં આવ્યું હતું. ત્યાં કોઈપણ પ્રકારની છેડછાડ કરવામાં આવી નથી. સર્વે દરમિયાન જે સ્થિતિ હતી તેવી જ સ્થિતિ છે.
સફાઈ કામગીરી 2 કલાક સુધી ચાલી હતી. સ્થળની સફાઈ કર્યા બાદ માછલીઓને બહાર કાઢવામાં આવી હતી. જેમાંથી 17 માછલીઓ મૃત હાલતમાં મળી આવી હતી, જેને મહાનગરપાલિકાને સોંપવામાં આવી હતી. સાથે જ વહીવટી તંત્રની હાજરીમાં 38 જીવતી માછલીઓ મુસ્લિમ પક્ષને સોંપવામાં આવી હતી. આ પછી સમગ્ર સંકુલને ફરીથી સીલ કરી દેવામાં આવ્યું છે. સ્ટ્રક્ચર સાથે કોઈ છેડછાડ કરવામાં આવી નથી. બંને પક્ષોએ સંતોષ સાથે સહી કરી.
મ્યુનિસિપલ કોર્પોરેશનના કર્મચારીઓ અને મુસ્લિમ પક્ષના લોકોએ જીવતી માછલીઓને પરિસરમાંથી બહાર કાઢી હતી.
હિંદુ પક્ષની દલીલ એવી હતી કે માછલીઓ ભગવાનની છે
હિન્દુ પક્ષના વકીલ સુધીર ત્રિપાઠીએ ડીએમ પાસે માગ કરી હતી કે વજૂખાનામાં રહેલી માછલીઓ ભગવાનની છે. તેમને ગંગામાં વહેતી કરવી જોઈએ. જો કે, ડીએમએ કહ્યું કે વજૂખાનામાં મળેલી માછલીનો દાવો મુસ્લિમ પક્ષે કર્યો હતો. તેમનું કહેવું છે કે જે માછલીઓ જીવતી બહાર આવશે, તે તેમને સોંપવામાં આવે.
ટીમ સવારે 10 વાગ્યે પહોંચી હતી, ડીએમ સંપૂર્ણ સમય હાજર હતા
જ્ઞાનવાપી કેમ્પસની બહાર મોટી સંખ્યામાં ફોર્સ તહેનાત છે.
વજૂખાનાની સફાઈ શનિવારે સવારે 10 વાગ્યાથી શરૂ થઈ હતી જે બપોરે 1 વાગ્યા સુધી ચાલુ રહી હતી. બે કલાકમાં પાણી હટાવવામાં આવ્યું હતું. તેનો ફોટો અને વીડિયોગ્રાફી કરવામાં આવી હતી. વજૂખાનામાંથી પાણી કાઢવા માટે ફાયર બ્રિગેડની ગાડીઓને પણ બોલાવવામાં આવી હતી. અંદર ગયેલી 26 લોકોની ટીમમાંથી 15 કોર્પોરેશનના સફાઈ કામદારો હતા. આ ઉપરાંત CRPF કમાન્ડન્ટ, હિંદુ અને મુસ્લિમ પક્ષના હાજર રહ્યા હતા.
17 જાન્યુઆરીએ હિન્દુ પક્ષની અરજી પર સુપ્રીમ કોર્ટે ડીએમની દેખરેખ હેઠળ વજૂખાના સાફ કરવાનો આદેશ આપ્યો હતો. કોર્ટે કહ્યું હતું કે વજૂખાનામાં મળેલા સ્ટ્રક્ચર સાથે છેડછાડ ન કરવી જોઈએ. વાસ્તવમાં, હિંદુ પક્ષનો દાવો છે કે વજૂખાનામાં મળેલી રચના શિવલિંગ છે, જ્યારે મુસ્લિમ પક્ષ તેને ફુવારો ગણાવે છે. વિવાદને કારણે, સ્થળ પર બનેલા વજૂખાનું મે 2022થી સીલ કરવામાં આવ્યું છે.
તસવીરોમાં જુઓ…
15 સફાઈ કામદારોએ વજૂખાનાની સફાઈ કરી હતી. તેઓ સવારે 10 વાગે જ્ઞાનવાપી કેમ્પસ પહોંચ્યા હતા.
સફાઈ દરમિયાન મોટી સંખ્યામાં પોલીસકર્મીઓ તહેનાત કરવામાં આવ્યા હતા.
વજૂખાનામાંથી પાણી કાઢવા માટે ફાયર બ્રિગેડની ગાડીઓને પણ બોલાવવામાં આવી હતી.
એડવોકેટ વિષ્ણુ શંકર જૈને અરજી દાખલ કરી હતી
2 જાન્યુઆરી 2024ના રોજ હિન્દુ પક્ષના વકીલ વિષ્ણુ શંકરે સુપ્રીમ કોર્ટમાં અરજી દાખલ કરી હતી. જેમાં જ્ઞાનવાપી સંકુલમાં મળેલા કથિત શિવલિંગના સીલબંધ વિસ્તારની સફાઈ અંગે માગ કરવામાં આવી હતી. તેમણે દાવો કર્યો હતો કે કથિત શિવલિંગની પાસેની પાણીની ટાંકીમાં માછલીઓ મરી ગઈ છે. મે 2022થી તેની સફાઈ કરવામાં આવી નથી. મંગળવારે 17 જાન્યુઆરીએ આ અંગેની સુનાવણી દરમિયાન સુપ્રીમ કોર્ટે સ્પષ્ટતા કરવાનો આદેશ આપ્યો હતો.
કથિત શિવલિંગ 16મી મેના રોજ મળી આવ્યું હતું
વારાણસી કોર્ટના આદેશ પર, જ્ઞાનવાપી સંકુલનું કમિશનર સર્વે 2022માં 6 થી 16 મે વચ્ચે કરવામાં આવ્યું હતું. આ સમય દરમિયાન વજૂખાના ખાતે એક કથિત શિવલિંગ જેવી આકૃતિ મળી આવી હતી. હિંદુ પક્ષે આ આકૃતિને શિવલિંગ ગણાવીને કોર્ટમાં અરજી કરી હતી અને તે જગ્યાને સીલ કરવાની માગ કરી હતી. દલીલ એવી હતી કે મુસ્લિમ પક્ષ છેડછાડ કરી શકે છે. જે બાદ સિવિલ જજ સિનિયર ડિવિઝન દ્વારા તાત્કાલિક અસરથી જગ્યા સીલ કરવાનો આદેશ કર્યો હતો.
બીજા દિવસે એટલે કે 17 મેના રોજ ડીએમ એ જગ્યાને સીલ કરી દીધી હતી. સીઆરપીએફને સ્થળની સુરક્ષાની જવાબદારી સોંપવામાં આવી હતી. ત્યારથી વજૂખાના ખાતે 24 કલાક સુરક્ષા જવાનો તહેનાત છે. આ પછી હિંદુ પક્ષે કોર્ટમાં વજૂ સ્થળ સિવાયના સમગ્ર સંકુલનો સર્વે કરાવવાની માગ કરી હતી.
જ્ઞાનવાપી સંકુલનો ASI સર્વે 84 દિવસ સુધી ચાલુ રહ્યો
આ પછી, હિન્દુ પક્ષે વારાણસી કોર્ટમાં પરિસરના વૈજ્ઞાનિક સર્વેની માગ કરી. આ કેસ વારાણસી કોર્ટથી અલ્હાબાદ હાઈકોર્ટમાં ગયો. આ પછી વારાણસી કોર્ટના આદેશ પર ASIની ટીમે 24મી જુલાઈથી સર્વે શરૂ કર્યો હતો. જો કે, મુસ્લિમ પક્ષ એટલે કે અંજુમન ઈન્તેજામિયા મસ્જિદ કમિટી સર્વેના વિરોધમાં સુપ્રીમ કોર્ટમાં પહોંચી હતી. આ પછી તે જ દિવસે એટલે કે 24મીએ સાંજે સુપ્રીમ કોર્ટે સર્વે પર પ્રતિબંધ લગાવી દીધો હતો. આ પછી જ્ઞાનવાપી સર્વેને અલ્હાબાદ હાઈકોર્ટ અને પછી સુપ્રીમ કોર્ટની મંજૂરી મળી.
મહાનગરપાલિકાની ટીમ સફાઈ માટે જ્ઞાનવાપી કેમ્પસ સ્થિત વજૂ સ્થળ પહોંચી છે.
4 ઓગસ્ટથી દેશભરના ASI નિષ્ણાતોએ જ્ઞાનવાપીનો સર્વે શરૂ કર્યો હતો. 4 ઓગસ્ટથી શરૂ થયેલો સર્વે 16 નવેમ્બરે એટલે કે 84 દિવસમાં પૂર્ણ થયો હતો. ASIએ જ્ઞાનવાપી સંકુલમાં જીપીઆર, ફોટોગ્રાફ્સ, વીડિયોગ્રાફી સહિત તમામ પાસાઓ પર સર્વે હાથ ધર્યો હતો. ASI અને અમેરિકાના GPR સર્વે નિષ્ણાતોએ 36 દિવસમાં તેનો રિપોર્ટ તૈયાર કર્યો.
