આજે ખેડૂતોની દિલ્હી કૂચ: પંજાબ-હરિયાણા, દિલ્હી, ચંદીગઢની તમામ સરહદો સીલ; ઈન્ટરનેટ બંધ, ગુરુગ્રામમાં નેશનલ હાઈવે પર ટ્રાફિકજામ

હરિયાણા-દિલ્હીની સિંધુ બોર્ડર સીલ કરી દેવામાં આવી છે. ખેડૂતોને રોકવા માટે બેરિકેડ અને કાંટાળા તાર લગાવવામાં આવ્યા છે.

​​​​​​ખેડૂતો આજે (મંગળવાર) સવારે 10 વાગ્યે દિલ્હી તરફ કૂચ કરશે. સોમવારે રાત્રે ચંદીગઢમાં સાડા પાંચ કલાક સુધી ચાલેલી બેઠકમાં ખેડૂત નેતાઓ અને કેન્દ્રીય મંત્રીઓ વચ્ચે MSP ગેરંટી કાયદો અને લોન માફી પર કોઈ સંમતિ સધાઈ ન હતી. જે બાદ કિસાન મજુર મોરચાના કન્વીનર સરવણ સિંહ પંઢેરે જાહેરાત કરી કે ​​​​​​ખેડૂતો આજે દિલ્હી કૂચ કરશે. તેમણે ખેડૂતોને પંજાબ-હરિયાણાની શંભુ, ખનૌરી અને ડબવાલી બોર્ડર પર ભેગા થવા કહ્યું છે.

તેમણે કહ્યું કે દરેક મુદ્દા પર ચર્ચા થઈ. ખેડૂતોની માંગણીઓ પર સરકાર ગંભીર નથી. ખેડૂતો સંઘર્ષ નથી ઈચ્છતા પરંતુ સરકારના મનમાં ખોટ છે. તેઓ માત્ર સમય પસાર કરવા માંગે છે. અમને કંઈપણ આપવા માંગતા નથી. અમે તેમને MSP કાયદા અંગે જાહેરાત કરવા કહ્યું હતું. સરકારના પ્રસ્તાવ પર વિચાર કરશે પરંતુ આંદોલન પર મક્કમ છીએ.

કેન્દ્રીય મંત્રી અર્જુન મુંડાએ કહ્યું કે દરેક વાતનો ઉકેલ વાતચીતથી થવો જોઈએ. કેટલાક મુદ્દાઓ છે કે જેના ઉકેલ માટે રચના કરવાની જરૂર છે. અમને હજુ પણ તેની આશા છે.

કેન્દ્રીય પ્રધાનો અર્જુન મુંડા અને પીયૂષ ગોયલે ચંદીગઢમાં ખેડૂત નેતાઓ સાથે બેઠક યોજી હતી. આ દરમિયાન પંજાબના મુખ્યમંત્રી ભગવંત માન પણ હાજર હતા.

સૂત્રોના જણાવ્યા અનુસાર, કેન્દ્રીય મંત્રીઓએ કહ્યું કે તેઓ MSP કાયદાને લઈને એક સમિતિની રચના કરી રહ્યા છે પરંતુ ખેડૂત નેતાઓ તેની સાથે સંમત ન હતા. જો કે, બેઠકમાં આંદોલન દરમિયાન ખેડૂતો અને યુવાનો પર નોંધાયેલા કેસો પાછા ખેંચવા અને લખીમપુર ખેરીની ઘટનાના મૃતક ખેડૂતોના પરિવારોને વળતર આપવા પર સહમતિ સધાઈ હતી. ઇલેક્ટ્રિસિટી એક્ટ 2020ને રદ્દ કરવા પર સર્વસંમતિની શક્યતાઓ પણ હતી.

અંબાલામાં શંભુ બોર્ડરથી એક કિલોમીટર પહેલા અવરજવર બંધ કરી દેવામાં આવી છે.

શંભુ બોર્ડર પર 6 લેયર બેરિકેડિંગ કરવામાં આવ્યું છે. સરહદને છાવણીમાં ફેરવી દેવામાં આવી છે.