- Gujarati News
- National
- He Was Trying To Enter The RS Pura Sector Of Jammu, But Did Not Stop Even After The BSF’s Warning.
શ્રીનગર4 કલાક પેહલા
- કૉપી લિંક
આ પહેલા 1 એપ્રિલના રોજ સેનાએ જમ્મુ-કાશ્મીરમાં નિયંત્રણ રેખા (LoC) પર 4-5 પાકિસ્તાની ઘૂસણખોરોને ઠાર કર્યા હતા.
જમ્મુ અને કાશ્મીરમાં નિયંત્રણ રેખા (LoC) પર BSF જવાનોએ એક પાકિસ્તાની ઘુસણખોરને ઠાર માર્યો છે. આ ઘટના 4 અને 5 એપ્રિલની રાત્રે જમ્મુમાં નિયંત્રણ રેખા (LoC) પર આરએસપુરા સેક્ટરમાં બની હતી જ્યારે સરહદ સુરક્ષા દળના જવાનોએ શંકાસ્પદ હિલચાલ જોઈ હતી.
બીએસએફના પ્રવક્તાએ જણાવ્યું હતું કે અબ્દુલિયાન સરહદ ચોકી પર તહેનાત જવાનોએ એક વ્યક્તિને સરહદ પાર કરતા જોયો હતો. તેને ચેતવણી આપવામાં આવી હતી, પરંતુ તે અટક્યો નહીં અને ભારતીય સરહદમાં ઘુસવાનો પ્રયાસ કરતો રહ્યો. તેમની સુરક્ષાને ધ્યાનમાં રાખીને, જવાનોએ તેને ગોળી મારી દીધી, જેના કારણે તેનું ઘટનાસ્થળે જ મોત થયું.
તેમણે કહ્યું કે ઘુસણખોરની ઓળખ અને હેતુ બાબતે તપાસ કરવામાં આવી રહી છે. ઉપરાંત, ઘુસણખોરના મૃતદેહને ઘટનાસ્થળેથી હટાવીને પોસ્ટમોર્ટમ માટે મોકલી દેવામાં આવ્યો છે.
આ પહેલા 1 એપ્રિલના રોજ, સેનાએ જમ્મુ અને કાશ્મીરમાં નિયંત્રણ રેખા (LoC) પર 4-5 પાકિસ્તાની ઘુસણખોરોને ઠાર માર્યા હતા. આ ઘટના પૂંછમાં નિયંત્રણ રેખા (LoC) પર કૃષ્ણા ઘાટી સેક્ટરના આગળના વિસ્તારમાં બની હતી.
1 એપ્રિલના રોજ, LoC ને અડીને આવેલા વિસ્તારમાં 2 માઈન બ્લાસ્ટ થયા હતા અને પાકિસ્તાન તરફથી પણ ગોળીબાર કરવામાં આવ્યો હતો.
1 એપ્રિલના રોજ પાકિસ્તાન દ્વારા યુદ્ધવિરામનો ભંગ કરવામાં આવ્યો હતો
1 એપ્રિલના રોજ, LoC નજીક આવેલા વિસ્તારમાં 2 માઈન બ્લાસ્ટ થયા હતા અને પાકિસ્તાન તરફથી પણ ગોળીબાર કરવામાં આવ્યો હતો. એવો દાવો કરવામાં આવી રહ્યો છે કે આ દરમિયાન આતંકવાદીઓએ ઘૂસણખોરીનો પ્રયાસ કર્યો હતો. ભારતીય સેનાએ ગોળીબાર કરીને જવાબી કાર્યવાહી કરી હતી. જેમાં 4 થી 5 ઘુસણખોરો માર્યા ગયા હતા.
ભાસ્કરે ગોળીબાર અને વિસ્ફોટ અંગે સેના સાથે વાત કરી. સેનાએ કહ્યું: 1 એપ્રિલના રોજ, પાકિસ્તાની સેનાએ નિયંત્રણ રેખા પારથી ઘૂસણખોરીનો પ્રયાસ કર્યો. આના કારણે કૃષ્ણા ઘાટી સેક્ટરમાં માઈન બ્લાસ્ટ થયો. પાકિસ્તાની સેનાએ ઉશ્કેરણી વિના ગોળીબાર કર્યો અને યુદ્ધવિરામનો ભંગ કર્યો હતો.
સેનાએ કહ્યું – અમારા જવાનોએ ગોળીબારનો જવાબ આપ્યો. પરિસ્થિતિ નિયંત્રણમાં છે અને તેના પર નજીકથી નજર રાખવામાં આવી રહી છે. ભારતીય સેનાએ LoC પર શાંતિ જાળવવા માટે 2021 ના DGSMO કરારને જાળવી રાખવાની અપીલ કરી છે.
અહીં કઠુઆમાં, સુરક્ષા દળોએ આતંકવાદીઓની શોધમાં સર્ચ ઓપરેશન શરૂ કર્યું. રાજૌરી જિલ્લાના સુંદરબનીના સિયા બદરાઈ વિસ્તારમાં એક વિશાળ સર્ચ ઓપરેશન શરૂ કરવામાં આવ્યું હતું. આ વિસ્તાર સરહદ નજીક આવેલો છે. જૂન 2024 માં, આતંકવાદીઓએ અહીં શિવ ખોરીથી પરત ફરી રહેલી બસ પર હુમલો કર્યો હતો.
કઠુઆમાં સર્ચ ઓપરેશનના ફોટા…
પાકિસ્તાન દ્વારા કૃષ્ણા ખીણ નજીક LoC પર ગોળીબાર કરવામાં આવ્યો હતો.
કઠુઆમાં પંચતીર્થી મંદિર પાસે આતંકવાદીઓને શોધી રહેલા સુરક્ષા દળો.
સેનાના જણાવ્યા અનુસાર, આ વિસ્તારમાં 3 આતંકવાદીઓ છુપાયેલા છે.
કઠુઆમાં 15 દિવસમાં આતંકવાદીઓ અને સુરક્ષા દળો વચ્ચે 3 એન્કાઉન્ટર
છેલ્લા 11 દિવસમાં કઠુઆમાં સુરક્ષા દળો અને આતંકવાદીઓ વચ્ચે ત્રણ એન્કાઉન્ટર થયા છે. પહેલું એન્કાઉન્ટર 23 માર્ચે હીરાનગર સેક્ટરમાં થયું હતું. સુરક્ષા દળોને જૈશ-એ-મોહમ્મદના પ્રોક્સી સંગઠન પીપલ્સ એન્ટી ફાસીસ્ટ ફ્રન્ટના પાંચ આતંકવાદીઓની હાજરીની માહિતી મળી હતી, પરંતુ તેઓ ભાગી જવામાં સફળ રહ્યા.
બીજું એન્કાઉન્ટર 28 માર્ચે થયું હતું. જેમાં 2 આતંકવાદીઓ માર્યા ગયા હતા. આ દરમિયાન સ્પેશિયલ ઓપરેશન ગ્રુપ (SOG)ના ચાર જવાનો, તારિક અહેમદ, જસવંત સિંહ, જગબીર સિંહ અને બલવિંદર સિંહ શહીદ થયા. આ ઉપરાંત ડીએસપી ધીરજ સિંહ સહિત ત્રણ સૈનિકો ઘાયલ થયા હતા. તેમની સારવાર ચાલુ છે.
ત્રીબીજું એન્કાઉન્ટર 31 માર્ચની રાત્રે કઠુઆના પંચતીર્થી મંદિર પાસે થયો હતો. આ વિસ્તારમાં ત્રણ આતંકવાદીઓ છુપાયેલા હોવાની માહિતી મળી હતી. એક આતંકવાદી માર્યો ગયો હોવાના સમાચાર પણ પ્રકાશમાં આવ્યા. પરંતુ કોઈ સત્તાવાર પુષ્ટિ કરવામાં આવી ન હતી.
સેનાના રાઇઝિંગ સ્ટાર કોર્પ્સના જણાવ્યા અનુસાર, 31 માર્ચની રાત્રે આ વિસ્તારમાં શંકાસ્પદ હિલચાલની જાણ કરવામાં આવી હતી, જેના પગલે સેનાએ રાજબાગના રુઇ, જુથાના, ઘાટી અને સાન્યાલના જંગલ વિસ્તારો તેમજ બિલ્લાવરના કેટલાક ભાગોમાં સર્ચ ઓપરેશન શરૂ કર્યું હતું.
પંચતીર્થીમાં આતંકવાદીઓ દ્વારા ગોળીબાર બાદ એન્કાઉન્ટર શરૂ થયું. જંગલમાં છુપાયેલા ત્રણ આતંકવાદીઓ ભાગી ન શકે તે માટે સુરક્ષા દળોએ આખી રાત આ વિસ્તારને ઘેરી લીધો હતો. કાશ્મીર પોલીસ, NSG, CRPF અને BSF સ્નિફર ડોગ્સ અને ડ્રોનની મદદથી આતંકવાદીઓને શોધી રહ્યા છે.
કઠુઆના બિલ્લાવર વિસ્તારમાં સ્થિત પંચતીર્થી મંદિર, જ્યાં સોમવાર રાતથી આતંકવાદીઓ છુપાયેલા હતા અને ગોળીબાર કરી રહ્યા હતા.
સ્નિફર ડોગ્સની મદદથી આતંકવાદીઓને શોધવામાં આવી રહ્યા છે.
એક દિવસ પહેલા 30 માર્ચે ડીઆઈજી શિવકુમાર શર્માએ કહ્યું હતું કે જ્યાં સુધી છેલ્લો આતંકવાદી માર્યો ન જાય ત્યાં સુધી ઓપરેશન ચાલુ રહેશે. તેમણે સરહદ નજીક રહેતા લોકોને કોઈપણ શંકાસ્પદ હલચલ અંગે તાત્કાલિક સુરક્ષા દળોને જાણ કરવા અપીલ કરી.
ડીઆઈજી શિવકુમાર શર્માએ કહ્યું-
ઓપરેશન ચાલુ છે. જ્યાં સુધી એક પણ આતંકવાદી બાકી રહેશે, ત્યાં સુધી જમ્મુ અને કાશ્મીર પોલીસ પોતાના મિશન પર અડગ રહેશે. અમારી સેના આતંકવાદને નાબૂદ કરવા અને જમ્મુ અને કાશ્મીરની સુરક્ષા સુનિશ્ચિત કરવા માટે પ્રતિબદ્ધ છે.
28 માર્ચ: એન્કાઉન્ટરમાં 2 આતંકવાદીઓ માર્યા ગયા, 4 જવાન પણ શહીદ થયા
પોલીસે કહ્યું- આતંકવાદીઓએ હથિયારો લૂંટ્યા નથી, અફવાઓ પર ધ્યાન ન આપો
29 માર્ચે, જમ્મુ અને કાશ્મીર પોલીસે શનિવારે કહ્યું હતું કે જમ્મુ અને કાશ્મીરના કઠુઆ જિલ્લાના દૂરના જંગલ વિસ્તારમાં બે દિવસ સુધી ચાલેલી અથડામણ દરમિયાન આતંકવાદીઓએ કોઈ હથિયાર છીનવ્યું નથી.પોલીસ પ્રવક્તાએ કહ્યું કે માર્યા ગયેલા ચાર પોલીસકર્મીઓના તમામ હથિયારો અને અન્ય વસ્તુઓ મળી આવી છે.
પ્રવક્તાએ કહ્યું, “કેટલાક રાષ્ટ્ર વિરોધી તત્વો ઓપરેશન સફયાનમાં શહીદ થયેલા આપણા શહીદોના હથિયારો છીનવી લેવા અંગે સોશિયલ મીડિયા પર અફવા ફેલાવી રહ્યા છે. આ દાવાઓ ખોટા છે. શહીદોના તમામ હથિયારો અને વસ્તુઓ રિકવર કરવામાં આવી છે.
23 માર્ચ: આતંકવાદીઓએ એક પરિવારને બંધક બનાવ્યો હતો
23 માર્ચે હિરાનગર સેક્ટરમાં આતંકવાદીઓના એક જૂથને સુરક્ષા દળોએ ઘેરી લીધું હતું, પરંતુ તેઓ ભાગવામાં સફળ રહ્યા હતા. એવું માનવામાં આવે છે કે આ એ જ આતંકવાદીઓ છે જેઓ સાન્યાલથી નીકળીને જાખોલ ગામ પાસે જોવા મળ્યા હતા.
સુરક્ષા દળોએ હિરાનગર સેક્ટરમાં આતંકવાદીઓના એક જૂથને ઘેરી લીધું હતું. તે દિવસે આતંકવાદીઓએ એક બાળકી અને તેના માતા-પિતાને પકડી લીધા હતા. જ્યારે ત્રણેયને તક મળતા આતંકવાદીઓના ચુંગાલમાંથી ભાગી ગયા હતા.
આ દરમિયાન બાળકીને સામાન્ય ઈજાઓ થઈ હતી. તેણે જ પોલીસને આતંકવાદીઓના છુપાયા હોવાની માહિતી આપી હતી. મહિલાએ જણાવ્યું હતું કે તે બધાને લાંબી દાઢી હતી અને કમાન્ડોનો યુનિફોર્મ પહેર્યો હતો.
જાખોલે ગામ હીરાનગર સેક્ટરથી લગભગ 30 કિમી દૂર છે. માહિતી મળતાની સાથે જ સુરક્ષા દળોએ વિસ્તારને ઘેરી લીધો, ત્યારબાદ એન્કાઉન્ટર શરૂ થયું હતું.
