મણિપુરમાં આશાનું કિરણ: એક છત નીચે કુકી-મૈતેઈ કરે છે અભ્યાસ, આસામ રાઈફલ્સે ઉખરુલમાં શિક્ષણ કેન્દ્ર શરૂ કર્યું

આસામ રાઈફલ્સે મણિપુરના ઉખરુલમાં સેન્ટર ઑફ એજ્યુકેશનલ એક્સેલન્સ શરૂ કર્યું, જેમાં મૈતેઈ, કુકી અને નાગા સમુદાયની 37 વિદ્યાર્થિનીઓને આશ્રય અપાયો છે.

મણિપુરમાં કુકી અને મૈતેઈ સમુદાયો વચ્ચે હજુ પણ સંઘર્ષ ચાલુ છે. દરમિયાન બંને સમુદાયના વિદ્યાર્થીઓના અભ્યાસને અસર થઈ છે. આને ધ્યાનમાં રાખીને આસામ રાઈફલ્સે મણિપુરના ઉખરુલમાં એક સેન્ટર ઑફ એજ્યુકેશનલ એક્સેલન્સ શરૂ કર્યું છે, જેમાં મૈતેઈ, કુકી અને નાગા સમુદાયની 37 વિદ્યાર્થિનીઓને આશ્રય આપવામાં આવ્યો છે.

સેનાએ એક NGOના સહયોગથી આ આશ્રયસ્થાન ખોલ્યું છે. તેનો ઉદ્દેશ્ય બંને સમુદાયના વિદ્યાર્થીઓને અભ્યાસ કરવાની તક આપવાનો છે. આ 37 વિદ્યાર્થિનીઓમાંથી 22 નાગા, 8 મૈતેઈ અને 6 કુકી છે. આ ઉપરાંત પંગલ સમુદાયના એક વિદ્યાર્થીનો પણ સમાવેશ થાય છે. ઉખરુલ જિલ્લો ચુરાચંદપુરથી પાંચ કલાક દૂર છે. ચુરાચંદપુર બે સમુદાયો વચ્ચે હિંસાનું કેન્દ્ર હતું.

આસામ રાઈફલ્સે પોતાના નિવેદનમાં કહ્યું છે કે સેન્ટર ઓફ એજ્યુકેશનલ એક્સેલન્સ આ વિદ્યાર્થીઓ માટે આશાના કિરણ સમાન છે. તેમને તેમની કારકિર્દીના લક્ષ્યો હાંસલ કરવા માટે જરૂરી મદદ આપવામાં આવશે. આ કેન્દ્ર આ મુશ્કેલ પરિસ્થિતિમાં NIEDO અને આસામ રાઈફલ્સના સતત પ્રયાસોનું પરિણામ છે.

આ 37 વિદ્યાર્થિનીઓમાંથી 22 નાગા, 8 મૈતેઈ અને 6 કુકી છે. આ ઉપરાંત પંગલ સમુદાયના એક વિદ્યાર્થીનો પણ સમાવેશ થાય છે.

છાત્રાઓએ કહ્યું- અમે અલગ-અલગ સમુદાયના છીએ, પરંતુ અહીં કોઈ ફરક નથી
આસામ રાઈફલ્સની આ પહેલ અંગે ચુરાચંદપુરની કુકી વિદ્યાર્થિનીએ કહ્યું કે તેને આસામ રાઈફલ્સ તરફથી ઘણી મદદ મળી છે. વિદ્યાર્થીએ કહ્યું કે અમે આ સેન્ટરમાં સુરક્ષિત અનુભવીએ છીએ કારણ કે અહીં અમારી સાથે કોઈ ભેદભાવ નથી. મને લાગે છે કે શિક્ષણ દ્વારા જ મણિપુરની સ્થિતિ સુધરી શકે છે. અહીં અમે 37 છોકરીઓ છીએ અને તમામ અલગ-અલગ સમુદાયની છે. પણ અહીં અમને કોઈ ફરક નથી લાગતો. અમારું એક જ ધ્યેય છે- અમારો અભ્યાસ પૂર્ણ કરવાનો અને સમાજની સુધારણા માટે પરિવર્તન લાવવાનું.

મૈતેઈ સમુદાયની અન્ય એક છોકરીએ કહ્યું કે તે અહીં પોતાના સપના પૂરા કરવા આવી છે. આ વિદ્યાર્થીએ જણાવ્યું કે અમને સારી તક મળી છે. અહીં રહીને ઘણી વખત હું મારા પરિવારને યાદ કરું છું, પરંતુ અહીં અમે બધા એક પરિવાર બની ગયા છીએ. મને એમ પણ લાગે છે કે સારું શિક્ષણ આપણા સમાજમાં સકારાત્મક પરિવર્તન લાવી શકે છે.

કાંગપોકપી જિલ્લો પણ આ હિંસાથી ખરાબ રીતે પ્રભાવિત થયો હતો. આ જિલ્લાના એક વિદ્યાર્થીએ કહ્યું કે હિંસાને કારણે તમામ શૈક્ષણિક સંસ્થાઓ બંધ છે. આવા સંજોગોમાં અમારામાંથી કોઈ અમારો અભ્યાસ પૂરો કરી શક્યું નહીં. અમને અભ્યાસ કરવાની તક આપવા બદલ અમે આસામ રાઈફલ્સનો આભાર માનીએ છીએ.

ઉખરુલની એક છોકરીએ કહ્યું કે અહીં અમે બધા સુરક્ષિત છીએ અને અમને અમારો અભ્યાસ પૂર્ણ કરવાની મોટી તક આપવામાં આવી છે. મને ખબર નથી કે આવા હિંસક વાતાવરણમાં અમે અમારા સમુદાયોમાં કેટલું યોગદાન આપી શકીશું, પરંતુ અત્યારે અમારા માટે વસ્તુઓ વધુ સારી છે.

વિદ્યાર્થીઓએ કહ્યું કે અમે આ સેન્ટરમાં સુરક્ષિત અનુભવીએ છીએ કારણ કે અહીં અમારી સાથે કોઈ ભેદભાવ નથી.

આસામ રાઈફલ્સે કહ્યું- સેન્ટર વિદ્યાર્થીઓના સપનાને વાસ્તવિકતામાં બદલવામાં મદદ કરશે
વરિષ્ઠ અધિકારીઓના જણાવ્યા અનુસાર આમાંની ઘણી છોકરીઓને ઓક્ટોબરમાં હિંસા પ્રભાવિત વિસ્તારોમાંથી બચાવી લેવામાં આવી હતી અને તેમને ચુરાચંદપુરના આસામ રાઈફલ્સ કેન્દ્રમાં લાવવામાં આવી હતી. તેમને એરલિફ્ટ કરીને બુલેટપ્રૂફ વાહનોમાં સુરક્ષિત સ્થાનો પર લાવવામાં આવ્યા હતા.

આસામ રાઈફલ્સે એમ પણ કહ્યું કે આ શૈક્ષણિક કેન્દ્રમાં જોડાવું એ આ વિદ્યાર્થીનીઓ અને તેમના માતા-પિતા દ્વારા લેવામાં આવેલું એક ખૂબ જ હિંમતભર્યું પગલું છે. કેન્દ્ર આ વિદ્યાર્થીઓની હિંમત વધારવા અને તેમના સપનાને વાસ્તવિકતામાં ફેરવવામાં મદદ કરવાનું વચન આપે છે.

આસામ રાઈફલ્સે કહ્યું કે અમે બનાવેલ ઈન્ફ્રાસ્ટ્રક્ચર અને અહીંની ફેકલ્ટી મણિપુરમાં શ્રેષ્ઠ છે અને ભવિષ્યના પડકારો માટે તમને તૈયાર કરવા માટે યોગ્ય વાતાવરણ પૂરું પાડવા માટે પ્રતિબદ્ધ છે. અમે જે દિનચર્યાનું આયોજન કર્યું છે અને જે પ્રવૃત્તિઓ અમે આયોજિત કરી રહ્યા છીએ તે આ વિદ્યાર્થીઓને તેમના જીવનના લક્ષ્યોને પ્રાપ્ત કરવામાં મદદ કરશે.

આમાંની ઘણી છોકરીઓને ઓક્ટોબરમાં હિંસા પ્રભાવિત વિસ્તારોમાંથી બચાવીને ચુરાચંદપુરના આસામ રાઈફલ્સ કેન્દ્રમાં લાવવામાં આવી હતી.

મણિપુરમાં 3 મે, 2023થી હિંસા ચાલુ, અત્યાર સુધીમાં 200થી વધુ લોકોના મોત
મણિપુરમાં ગત વર્ષે 3 મેથી કુકી અને મૈતેઈ સમુદાયો વચ્ચે અનામતને લઈને હિંસા ચાલી રહી છે. રાજ્યમાં હિંસાની ઘટનાઓમાં અત્યાર સુધીમાં 200થી વધુ લોકોના મોત થયા છે. જ્યારે 1100થી વધુ લોકો ઘાયલ થયા છે. 65 હજારથી વધુ લોકોએ પોતાના ઘર છોડી દીધા છે.